Pisussat nutaat siunissami utaqqiinnarput

Gitte Adler Reimer decembarip aallaqqaataanni 2017-imi Ilisimatusarfimmi rektoritut atorfinitsinneqarpoq. Ukiuni tallimani sivitsorneqarsinnaasumik atorfeqassalluni isumaqatigiissuteqarpoq. Ukiut arfineq-pingasut atorfeqareerluni soraarnissamut piffissanngortoq, oqarpoq.

– Piffissaq atorfeqarfiga naappat atorfinnit soraarniarlunga aalajangernera nuannaarutigaara. Imminut piffissaqarfiginissaq ilisimatusarnermullu piffissaqarnissara amigaatigisarakkit. Rektoritut atorfeqarneq piumasaqaateqaqigami pisussaaffippassuaqarluni akisussaafferujussuullunilu.

Ukiut 30-t sinnerlugit Ilisimatusarfimmi

Gitte Adler Reimer ukiut 30-t sinnerlugit Ilisimatusarfimmiissimavoq — ilinniartutut, ilinniartitsisutut ilisimatusarnermilu ikiortitut, ph.d.-nngorniartutut, immikkoortortaqarfimmi pisortatut, institutimi pisortatut naggataatigullu rektoritut.

Inuunera tamarmi Ilisimatusarfimmit ilusilersorneqarpoq — ilinniakkamigut eqqarsartaatsimigullu pisuunnguutigilluakkaminik, soorlumi ukiumoortumik nalliuttorsiornermi oqalugiarnermini taama oqarsimasoq, tassa nalliuttorsiornermi naggataamik oqalugiarnermini.

– Piffissanngortoq isumaqarpunga. Anguniagarisimasama ilarpassui naammassineqarsimapput imaluunniit ingerlalluarlutik. Digitalimik ilinniagaqartitsinerup pilersinneqarnissaa ulapputigisimaqaara aamma naak suli sivisuumik aqqutissaqaraluartoq Ilisimatusarfik ingerlalluarpoq. Aamma ilinniakkanik nutaanik pilersitsivugut ilaatigut biologimi bacheloritut ilinniarnermik kiisalu qaffasinnerusumik ingerlaqqiffiusunik arlalinnik siornali aallartitaqarluta. Ph.d.-mik ilinniarfik pilersinneqarmalli Ilisimatusarfiup ilisimatusarnermut attaveqaatit ineriartortinniarlugit sulissuteqarpoq ilisimatusarnermut allaffimmik sivisuumik utaqqineqartumik pilersitsinermigut. Maannalu Campusip allilerneqarnissaa piareersimaffigaarput, ukiuni kingullerni arfineq-pingasuni Ilisimatusarfimmi ajunngitsorpassuarnik pisoqarpoq, Gitte Adler Reimer oqarpoq.

Corona aamma Amerikamit tikeraartoqarneq

Ingerlatsinerli ajornaatsuinnaasarsimanngilaq. Coronap tuniluunnera pissutigalugu Ilisimatusarfik 2020-mi matuneqarpoq, rektorilu allallu tamarmik piffissami sivisuumi angerlarsimaffimminnit sulisariaqarlutik.

– Eqqarsaatigilerpara: “Aah, naamik, taava rektoritut angerlarsimaannalissaanga”, qujanartumilli Nunatsinni siullerpaat ilagalugit inuiaqatigiit ammarpavut allaffinnullu uteqqilluta. Tamanna nuannaarutigaara. Aammami maanna 2025-mi nunani tamalaani tusagassiuutinit soqutiginninneq annertuvoq, aammali nunarsuarmi universitetit suleqatiginnikkusuttut amerlapput, tamatumalu kingunerisaanik erseqqissunik killiliisariaqalerluta silatusaarlutalu toqqaasariaqarluta. Kikkut suleqatigisinnaavavut aamma sooq?

Campus nutaaq 

Ilisimatusarfik ukiuni kingullerni annertuumik alliartorsimavoq. 2008-mi illup sananeqarnerani ilinniartut 130-t ilinniartitsisullu 20-t inissaqartinnissaat naatsorsuutigineqarpoq. Ullumikkut ilinniartut 615-iupput ilinniartitsisullu 112-iullutik. Tattorliuuttoqarpoq, taamaattumillu ukiualuit matuma siornatigut Ilisimatusarfimmi siulersuisut rektori siuttoralugu suliniut Uppik aallartippaat, taannalu maajimi 2025-mi Campusip allilerneqarnissaanik pisariaqartitsinermik misissuinermik pilersaarusiornermillu saqqummiussilluni, tamannalu piviusunngortinneqassappat 500-600 millionit koruuninik akeqassalluni.

– Campusip naafferartumik allilerneqarnissaa pillugu pilersaarusiorpugut, maannalu aningaasaliisussanut suleqatitsinnullu saqqummiussinnaallugu. Aammali tamatuma saniatigut sipaarniutinit aamma eqqugaaqqavugut, taamaattumik piviusunngortinnissaanut rektorinngortussaq ilungersuussassaqarluarluni, Gitte Adler Reimer oqarpoq, taannalu pisortatut soraarnerminut atatillugu nalunaarusiuleruttorluni.

- Illoqarfimmit qimagunnavianngilanga, sapinngisannillu ikiuuttuaannarnissannut piareeersimajuarlunga, Gitte Adler Reimer oqarpoq nangillunilu:

– Rektoritut kikkut tamaasa inissaqartissinnaasariaqarpatit, aammali tamatumunnga peqatigitillugu imminut paarisariaqarlutit. Akisussaaffiuvoq angisooq. Aammattaaq eqqaamasariaqarpat atorfiup nuannaarutiginissaa, tassami atorfik tamanna allannguiffiusinnaammat Ilisimatusarfiullu assigiinngitsutigut ineriartortinnissaanut periarfissaammat, taamaalilluni kalaallinut inuiaqatigiinnut inunnullu ataasiakkaanut iluaqutaasumik.

Ilinniarneq pillugu sammisaq uani atuaruk.