Piviusumi ilimagineqartut sinnerlugit pisoqartoq

- Piviusumi pisartut naatsorsuutigisatsinnit amerlanerupput. Inuussutissarsiornermut, Nukissiuuteqarnermut, Aatsitassanut, Inatsisinik Atuutsitsinermut Naligiissitaanermullu naalakkersuisoq Naaja H. Nathanielsen Nunani Avannarlerni politikerinut arlalinnut, sapaatip akunnerata siuliani piujuartitsilluni takornariartitsisarneq pillugu paasisaqarnerorusullutik Nunatsinnut tikeraartunut, ataasinngornermi taama oqarpoq.

Nunani Avannarlerni politikerit 18-it tamarmik Nunani Avannarlerni Siunnersuisoqatigiit siuarsaanermut ineriartornermullu ataatsimiititaliaanni ilaasortaapput, taakkualu ukioq manna aasaanerani ataatsimiinnerminni Nuummi ataatsimiinniarlutik aalajangersimallutik.

Nunani Avannarlerni Siunnersuisoqatigiit ataatsimiititaliaat juunimi Nunani Avannarlerni angalasarput Nunani Avannarlerni innuttaasunut iluaqutaasunik politikimik pilersitsinissaminnut paasisassarsiorlutik isumassarsiorlutillu.

Nuummut tikeraarnerminni siunertaraat, nunat Nunani Avannarlerneersut takornariartitsinermik ineriartortitsinissaminnut atatillugu suleqatigiissutigineqarsinnaasunik qulaajaanissaq. Politikerit alapernaatsut apeqqutissaqarluartullu piujuartitsilluni takornariartitsisarneq, Nunatsinnilu takornariartitsinermut inatsit nutaaq tamatumalu qanoq atorneqarsinnaanera pillugit paasisaqarusuttorujussuupput.

Eqqarsaatiginnilluarnissaq pisariaqartoq

- Aalisarneq Nunatsinni aningaasarsiornerup pingaarnerpaartarisimagaluarpaa. Takornariartitsinerup pingaaruteqassusia aamma maanna annertusiartorpoq. Inuussutissarsiut taanna annertusiartorpoq periarfissaqarluarluni, eqqarsaatiginnilluaqqaarlunili taamaaliortoqartariaqarluni, Naaja H. Nathanielsen nassuiaavoq.

- Piujuartitsisumik takornariartitsisalernissaq sulissutigineqarpoq. Ilaatigut tamanna pissutigalugu inatsisiliorpugut. Akuersissutinut piumasaqaatit tamatuminnga ukkatarinninnitsinnut iluaqutaapput. Aamma nunap immikkoortuinik immikkoortiterineq iluaqutaavoq. Tamanna piujuartitsisumik ineriartornermik qulakkeerinnissaaq, pinngortitallu naammassinnaasaanik takornariartitsisoqarnissaanik qulakkeerinnittoqassalluni.

Aningaasaliisussanik amigaateqarpugut

Christian Keldsen, Sulisitsisut Peqatigiiffianni pisortaq, oqalugiartut ilagaat, taassumalu erseqqissarpaa unammillernartorpassuit qaangerneqartariaqartut.

- Mittarfinnut nutaanut iluaqutaasussat attaveqaasersuutit pisariaqartinneqarput. Aqquserngit, angallannermut periarfissat, akunnittarfiit allallu pineqarput. Taamaattorli takornariartitsinerup ineriartortinnissaanut aningaasaliissutit piginnaasallu amigaatigaavut. Aamma naammattunik sulisussaaleqineq unammillernartorujussuuvoq, sulisitsisut peqatigiiffianni pisortaq oqarpoq.

Taanna Greenland Airportsimi pisortamit Jens R. Lauridsenimit taperserneqarpoq.

- Takornariat inuiaqatigiinni isumalluutitut isigisariaqarpavut, maani inuunissamut, sulinissamut najugaqarnissamullu kajungernarnerulersitsisinnaasutut. Inuiaqatigiit tamarmiusut ineriartortittariaqarpavut, Lauridsen oqarpoq, nassuerutigalugulu Nuummi mittarfissap nutaap pilersinneqarnerani unammillernartorpassuit pisimammata.

- Aallaqqaammut unammillernartoqarsimava? Aap, ingammik ukiuunerani aallartikkatta, ingerlallualeriartorpugulli, Jens R. Lauridsen taama neriorsuivoq.