Polar Seafoodip pisassiissutit pillugit Namminersorlutik Oqartussat eqqartuussivimmut suliassanngortikkai
Pisassiissutit tuniniarneqarsinnaasut pillugit nalunaarut nutaaq naapertorlugu aalisarnermik suliffeqarfissuaq Polar Seafood avataani qaleralittassiissutimi ilarujussuanik annaasaqalerpoq. Tamannalu inatsisinik unioqqutitsineruvoq, Polar isumaqarpoq.
- Sooq aalisariutaateqalerniartoq ingerlatseqatigiiffiit ukiuni qulikkuutaani suliffissanik akileraarutinillu isertitaqarsimasut ajoqutigalugit pisassiissuteqartinneqassasoq paasiuminaatsipparput, Naalakkersuisulli isumassarsiaq ima pingaartitsigigaat taamaaliorusunnginnerput erseqqissumik oqaatiginngikkutsigu pisassiissutit naggammik annaagugunarnatigit malugisinnaavarput, Miki Brøns oqarpoq.
Assi: Leiff Josefsen
Aalisarnermut inatsit nutaaq pillugu oqallittoqaqqilerpoq. Polar Seafoodip maanna Namminersorlutik Oqartussat eqqartuussivimmut suliassanngortippai
Kitaani sinerissap avataani qaleralittassiissutit pingajorarterutaannik annaasaqarumaarnermini tunngaviusumik inatsimmut unioqqutitsinerusoq taamaalillunilu inatsisinut unioqqutitsinerusoq nunami aalisarnermik ingerlatsiviit namminersortut annersaat isumaqarpoq.
Eqqartuussivimmut suliakkiissutaasoq tassaavoq pisassiissutit tuniniarneqarsinnaasut pillugit nalunaarut, PNNP-mik taaneqartartoq, Kalaallit Nunaanni aalisarnermut inatsimmik nutaamik ukiup nikinnerani atuutilersumik tunngavilik.
Soormiuna Polar Seafoodip pisassiissutit tuniniarneqarsinnaasut pillugit malittarisassat nutaat inatsisinut naapertuunnersut Sermersuup Eqqartuussiviani misissortinnissaat siunertaralugu Namminersorlutik Oqartussat eqqartuussivimmut suliassanngortikkai?
Aap, Polar Seafood naapertorlugu kilisaatit sinerissap avataani qaleralinniat nalunaarut tamanna pissutigalugu pisassatik pingajorarterutaat annaavaat. Tamannalu inatsisinik unioqqutitsineruvoq, ingerlatseqatigiiffik isumaqarpoq. Namminersorlutik Oqartussat naapertorlugit pisassiissutit ingerlatseqatigiiffinnit maanna atuuttunit peerneqartut ingerlatseqatigiiffimmut nutaamut suli atersineqanngitsumut tunniunneqarumaarput.
Miki Brøns: Artorsaateqarluta taamaaliorpugut
Polar Seafoodip Namminersorlutik Oqartussanik eqqartuussivimmut suliassanngortitsinera pillugu Polar Seafoodip pisortaanera Miki Brøns oqarpoq:
- Artorsaateqarluta taamaaliorpugut. Namminersorlutik Oqartussat suleqatigalugit aaqqiissuteqarusunnerugaluarpugut. Tamannali issuarneqarsinnaassasoq misigivugut, pisassiissutigisartakkagulli sapaatip-akunnialuisa ingerlanerini peerneqarsinnaappata aalisarsinnaanngilagut.
Polar Seafoodip Namminersorlutik Oqartussanik eqqartuussivimmut suliassanngortitsinera Naalakkersuisut tupaallaatigissanngikkaat Miki Brøns isumaqarpoq. Atorfilittammi inatsit Inatsisartunit akuersissutigineqanngitsorli taamatut pisoqarnissaa ilimagisimagaat Naalakkersuisut nittartagaanni atuarneqarsinnaavoq.
- Pisassiissutit ikilisinneqarpata tamanna unioqqutitsilluni pigisaanik arsaarinnissutigineqarsinnaasoq Aalisarnermut Naalakkersuisoqarfimmi atorfilittat aalisarnermut inatsisissamut tusarniaanermi mianersoqqussutigaat. Taamaammat PNNP pillugu nalunaarut Inatsisartunit akuerineqarmat Naalakkersuisut unioqqutitsillutik nalunngilaat, tamannali akuersaaginnarpaat, pisortaaneq oqarpoq.
Naalakkersuisunngortussat akuliunnissaat neriuutigineqartoq
Eqqartuussivimmulli suliassanngortitsineq sivisusinnaasoq Miki Brøns nassuerpoq.
Naalakkersuisunngortussat suliaq allatut isigilissagaat suliarlu eqqartuussivimmut ingerlateqqinnagu akuliutissasut aalisakkerinermi suliffeqarfissuaq neriuppoq.
- Pisassiissutit suli agguaanneqarsimanngillat, taamaammat aalisarnermullu inuiaqatigiinnullu pitsaanerusumik isumaqatigiinniartoqaqqilernissaanut aaqqiissuteqartoqarnissaanullu suli periarfissaqarpoq. Politikerit isumartik allanngortikkumaaraat neriuutigaara, ernumassuteqarnivummi tusaaniarneqarumallugit eqqartuussivimmut saaffiginninnittariaqaratta pissutsit aalisarnermut nunamullu alianartuupput, , Miki Brøns oqarpoq.
Nangilluni oqarpoq:
- Sooq aalisariutaateqalerniartoq ingerlatseqatigiiffiit ukiuni qulikkuutaani suliffissanik akileraarutinillu isertitaqarsimasut ajoqutigalugit pisassiissuteqartinneqassasoq paasiuminaatsipparput, Naalakkersuisulli isumassarsiaq ima pingaartitsigigaat taamaaliorusunnginnerput erseqqissumik oqaatiginngikkutsigu pisassiissutit naggammik annaagugunarnatigit malugisinnaavarput, Miki Brøns oqarpoq.
Sunniuteqangaarsinnaasoq
Umiarsuaatileqatigiiffiit qanoq sivisutigisumik pisassiissuteqarnissartik qulakkeersimanngippassuk tamanna Kalaallit Nunaanni aalisarnerup ineriartorneranut sunniuteqangaarsinnaasoq pisortaanerup aamma tikkuarpaa.
- Kilisaat aningaasaliineruvoq ukiut 30-t ingerlaneranni nalikilliartortartoq. Pissutsit tunngaviusut aalajaatsuunngippata aningaasaliinissaq ajornakusoortarpoq, aningaasalersornissaalu ajornarluinnarpoq. Tamatuma kingunerisaanik aalisarneq unittarpoq, Miki Brøns oqarpoq.
