ULLORMUT NALUNAARUSIAQ
Politiit toqusoqarnera pasinartoqarsinnaasutut misissuiffigigaat
Angut utoqqaq toqungasoq Alluitsup Paani marlunngornermi siumorneqarpoq, suliamullu atatillugu angut tigusarineqarluni. Tunumi ikuallattoqarpoq, Nuummilu meeqqat atuarfimmi ikuallattoqarneranik kalerrisaarut aallartissimagaat, politiit ulloq unnuarlu nalunaarusiaanni atuarneqarsinnaavoq.
Arkivfoto: Leiff Josefsen
Alluitsup Paani angutip utoqqaap toqusimanera pillugu Kalaallit Nunaanni Politiit marlunngormat unnukkut nalunaaqutaq 19.05 nalunaarfigineqarput.
Pigaartut pisortaat Poul Kreutzmann tamanna pillugu maannakkut annerusumik oqaaseqarsinnaannginnerarpoq, politiilli toqusoqarnera pasinartutut misissuiffigigaat oqaatigaa.
Angut utoqqaq nunaqarfimmi illup silataani toqungasoq nassaarineqarpoq.
Angut ataaseq suliamut atatillugu tigusarineqarpoq, pigaartullu pisortaata pingasunngornermi kingusinnerusukkut pisoq pillugu paasititsinerusinnaassallutik neriuutigaa.
- Misissuineq ingerlanneqaleruttorpoq, Poul Kreutzmann oqarpoq.
Tunumi ikuallattoq
Pasinartumik toqusoqarsimanerata saniatigut Tunumi nunaqarfimmi Sermiligaami illu marlunngornermi ikuallappoq.
Nalunaaqutaq 16.39 ikuallattoqarnera nalunaarutigineqarpoq, sanaartortoqarneranilu ikuallattoqalersimasoq ilimagineqarpoq.
Ikuallannermi ajoqusertoqanngilaq, nalunaaqutarlu arfineq-marluk missaani qaminneqarsimasoq pigaartut pisortaat oqaluttuarpoq.
Tasiilami politiit suliaq misissussavaat.
Meeqqat ikuallattoqartillugu kalerrisaarut aalartikkaat
Nuummi meeqqat atuarfianni USK-imi ikuallattoqarneranik kalerrisaarut aallartimmat qatserisartullu atuarfimmut ornigupput. Paasineqarporli meeqqat nuannariinnarlugu kalerrisaarut aallartissimagaat.
Taama pisoqartillugu akiligassiisoqarsinnaasartoq angajoqqaallu tamanna akusissaaffigisinnaagaat Poul Kreutzmann oqarpoq.
- Ikuallattoqartillugu kalerrisaarutit pinnguaanngillat, pigaartut pisortaat oqarpoq.
