Qarasaasiatigut saassussinerit peqquserluttuliornerillu aarlerinarnerulernerat mianersoqqussutigineqartoq
Nunarsuup sinneranit Kalaallit Nunaata soqutigineqarnerulernera qarasaasiatigut saassussinerit allatigullu peqquserlunnerit aarlerinarnerulersikkaat Kalaallit Nunaanni Politiit mianersoqqussutigaat.
Assi: Leiff Josefsen
Nunat tamalaat Kalaallit Nunaannut soqutiginninnerulernerat peqquserluttuliortartut qarasaasiakkullu pinerluttartut malinnaavigigunavippaat.
Qaammatini kingullerni innuttaasut arlallit nunanit allaneersunit mailinik, sianertunik SMS-inillu, nittartakkanut allanut innersuussutaasunik assigisaannillu imalinnik, tigusaqarsimasut Kalaallit Nunaanni Politiit ilisimatitsipput.
Linkit e-mailikkut SMS-ikkulluunniit nassiunneqartut ammartaqqunagit, nassiussisoq tatigigaluaraanniluunniit politiit sakkortuumik mianersoqqussutigaat.
Kalaallit Nunaata nunanit allanit nakkutigineqarnerata annertusiartornera qarasaasiatigut saassussinernik, hackerinernik, internetikkut peqquserlunnermik qarasaasiatigullu pinerlunnerit allat annertusiartornerannik kinguneqartoq, politiit Facebookimi allapput:
- Peqquserluttut sianersinnaasarput aningaaserivimminngaaneernerarlutik imaluunniit oqartussaasusininngaaneernerarlutik neriuutigalugu paasissutissat ilinnut tunngasut pissarsiarisinnaassallugit, uanilu siunnersuutaavoq: Kortinni imaluunniit MitID-inni paasissutissat ilinnut tunngasut telefonikkut, mailikkut imaluunniit SMS-ikkut tunniutinngisaannakkit – aammattaaq aningaaserivimmut politiinulluunniit tunniutinngisaannakkit. Aningaaseriviit pisortallu oqartussaasut qinnuiginngisaannassavaatsit aningaasanik nuusseqqullutit imaluunniit telefonikkut, mailikkut SMS-ikkulluunniit MitID aqqutigalugu akuerseqqullutit.
Politiit naapertorlugit peqquserluttut inuinnaat kisiisa saassunneq ajorpaat, aammali suliffeqarfiit, oqartussaasut NGO-t saassunneqariaannaapput.
- Taamaattoqarnera inuttut akeqarsinnaavoq aammalu annertuunik aningaasartuutaasinnaalluni, Kalaallit Nunaanni Politiit allapput.
