Qinersiviit nunanit tamalaanit malinnaavigineqaqalutik ammarneqassapput
Inatsisartunut marlunngornermi qinersisoqarnera USA-mi præsidentip oqariartuuteqartarnera pissutigalugu tusagassiorfiit nunanit allaneersut malinnaarujussuarnerannik pissuteqarpoq.
Allagartarsuit qineqqusaarnerutit Nuummi bussit unittarfiini takussaapput, aamma tusagassiortut nunanit tamalaaneersut.
Foto: OSCAR SCOTT CARL
Qinersiviit marlunngornermi nalunaaqutaq 09.00 ammassapput Inatsisartunullu ilaasortat 31-t qinerneqassallutik.
Naalakkersuisut siulittaasuata Múte B. Egedep (IA) februaarip sisamaani qinersisoqarnissaanik siunnersuuteqarmalli taperserneqarlunilu, nunanit tamalaanit Kalaallit Nunaanni qinersineq soqutigineqartorujussuuvoq.
Taamanimiilli suli taamaappoq.
Nunani tamalaani tusagassiuutit soorlu The Guardian, BBC, Aljazeera CNN-ilu nittartaggat iserfigigaanni Inatsisartunut qinersinissamut tunngatillugu misissueqqissaarlutillu piareersaateqarsimasut takuneqarsinnaapput.
Nunani tamalaani tusagassiuutit ataatsimut sammisaat tassaavoq USA-p præsidentiata Donald Trumpip oqariartuutigisartagai. The Guardian nittartagkkamini qulequtami aperaaq: "Kalaallit Nunaanni qinersineq: Qeqertami qinersineq pingaartuteqarnerpaaq?
"Qeqertap inissisimaffia pissutaalluni sammineqartorujussuanngortoq"
Inatsisartunut qinersineq nalinginnaasumik nunami kisimi sammineqarnerusaraluartoq soqutigineqarpallaarnanilu, maanna "qeqertap inissisimaffia pissutaalluni USA-p præsidentiata Donald Trumpip ammasumik — arlaleriarlunilu — oqartussaaffigilerniarlugu nalunaaruteqartarnerani pivoq“, Aljazeera allappoq.
Juullip nalaani Trump tupaallannartumik oqariartuuteqarpoq, tassa USA-p isumannaatsuunissaanut Kalaallit Nunaat pingaaruteqarmat oqartussaaffigilerusullugu pigilerlugulu. Kingorna ernera Donald Trump Jr. Trumpillu aallartitai arlallit Nuummut tikeraarput, sapaatiummallu unnukkut præsidenti Kalaallit Nunaat pillugu nutaanik oqariartuuteqaqqippoq.
Tamatumuuna milliardilikkaanik aningaasaliinissamik neriorsuuteqarluni USA-mullu ilanngunnissamut qaaqqusilluni.
Politikkerit arlallit Trumpip soqutiginninnera aallaqqaammut nuannaajallaatigaat, tamannalu suleqatigiinnerulernissamut inuussutissarsiornermillu ineriartortitsinissamut periarfissatut isigalugu. Siumup siulittaasuata Erik Jensenip Trump ilaatigut Kalaallit Nunaannut tikeraaqquaa.
Taamanimiilli Donald Trump præsidentinngorpoq, partiillu siuttuisa amerlanersaasa Trumpip qaninnerulerniarnera orniginngilaat.
Trumpip nunat tamalaat akornanni politikkimi suleqatiminut periaasia, ilaatigut Ukrainemut sakkutooqarnikkut tapersersuiunnaarnera, nunanut saniliminut Mexicomut Canadamullu niuernikkut sorsulernera ilaatigut pissutigalugit. Trumpip Canada USA-mut ilanngunnissaanik kissaateqarnini aamma oqaatiginikuuaa.
Partiini siuttut Trump tatiginngilaat
Naalakkersuisut siulittaasuata IA-llu siulittaasuata Múte B. Egedep DR-imi sapaatiummat apersorneqarnermini Trump siornatigornit sakkortunerusumik isoraa:
- Nunarsuarmi pisartut maannakkorpiaq ernummatigingaatsiarpakka. Nunarsuarmi aaqqissuussaaneq assigiinngitsorpassuartigut nalorninartoq, immaqalu USA-mi præsidenti inuit toqqissisimajunnaassutigisaattut pissusilersortoq, DR-imut oqarpoq.
Partiit Siumut, Demokraatit aamma Atassut assingusumik sapaatip-akunnerani kingullermi nalunaaruteqarput.
Partiit siuttui arfinillit KNR-imi naggataarutaasumik ataasinngormat unnukkut oqallinneranni Trump tatigineqarsinnaanersoq tamarmik aperineqarput.
Karl Ingemann partiimi nutaajunerusumi Qullermi siulittaasoq kisimi aappimik akivoq. Partiit sinneri naaggaarput - Trumpi tatigisassaanngilaq.
Qinersinermit naalakkersuisooqatigiit nutaat qanoq isikkoqarnissaat aalajangerneqassaaq, qularnanngitsumillu Amerikamiut akuliunniarnerat qanoq iliuuseqarfigineqassanersoq sammineqangaatsiassaaq.
