KOMMUNIMUT QINERSINEQ
Sapaatip akunneranut nalunaaquttap akunnerini 36-37-ini sulisarnissaq Micha Simonsenip angorusuppaa
Siumut sinnerlugu kommunimut qinigassanngortittoq, Micha Simonsen, Qeqqata Kommuniani suliffissaqartitsineq pillugu takorluugaqarpoq. Siuariartortitsinissaq Sisimiullu innuttaasui amerlinissaat anguniarlugu sapaatip akunneranut nalunaaquttap akunnerini 36-37-ni sulisoqartarnissaa anguniarpaa. Tamanna Sisimiut TV-mi sisamanngornermi marsip 13-ani toqqaannartumik aallakaatinneqartumi oqaatigaa.
Assi: Siumut
Sapaatip-akunneranut nalunaaquttap akunnerini 40-ni sulinak, nalunaaquttap-akunnerini 36-37-ini sulisalernissat takorloorsinnaaviuk?
Tamanna Micha Simonsenip Qeqqata Kommuniani kommunalbestyrelsimut qinigaassaguni anguniarusuppaa.
Taassuma aamma parteeqanni Malik Berthelsen unammillerlugu borgmesterinngorusuppoq. Tamanna nammineq Sermitsiamut uppernarsarpaa.
Allaanerusumik anguniagaqarusuppoq
- Kommunimut qinersinermi Siumut ajugaappat kina borgmesterinngussanersoq partiip nammineq aalajangissavaa, Sermitsiamut oqarpoq.
- Nalunngilara Qeqqata Kommunianut allannguuteqaqataasinnaallunga. Illoqarfik ineriartortikkusuppara, allaanerusumik nutaajunerusumillu. Allaanerusumik iliuuseqarusunnera tassaavoq sapaatip akunneranut nalunaaquttap akunnerini 36-37-ini sulisarnissaq, taamaaliornikkut illoqarfimmi innuttaasut amerlanerulissammata, Micha Simonsen sisamanngornermi Sisimiut TV-mi toqqaannartumik aallakaatitsinermi oqarpoq.
Ineriartortitsissaaq
Micha Simonsenip oqarnera naapertorlugu sapaatip akunneranut suliffiit akunneri ikilippara Sisimiunut najugaqarusulerlutik nuuttut amerlissapput, taamaaliornikkut kommuni inuussutissarsiornikkut ineriartortinneqassalluni.
- Inuit kajumissuseqalernissaat angorusuppara. Sisimiut avataaneersut eqqarsalersikkusuppakka "Sisimiunukarusuppunga". Aamma ineriartortitsinikkut illoqarfitsinni namminersortut, soorlu kaffisorniartarfiit neriniartarfiillu iluaqutigissavaat. Nunalu pinngortitarsuaq tusaamasaalluartoq atorluarneqarsinnaalissalluni, Micha Simonsen nassuiaavoq.
Malik Berthelsen Siumumeersoq kommunimi qinersinerni kingullermi, 2021-imi aappassaa borgmesteriusussatut qinigaavoq. Qinersisartut borgmesteritut qineqqikkusussaneraat apriilip aallaqqaataani kommunimut qinersigutta paasinarsissaaq.
Taassuma qinigassanngorteqqilluni nalunaarami allappoq kommunip akisussaassusilimmik piviusorsiortumillu aqunneqarnissaa pingaarutilerujussuusoq. Isumaqarlunilu tamatumani suli siuttuunissannut kommunip atorfissaqartikkaa, taamaattumik qinigassanngorteqqinniarluni aalajangerpoq.
Malik Berthelsen kommunimut kingullermik qinersigatta 976-inik taaguunneqarluni qinerneqarpoq.
