SIK-p siulittaasua mianersoqqusivoq: Aningaasatigut tapersiisarneq ilanngarterneqarpat nunatta avataanut nuuttut amerlisinnaapput
Naalakkersuisut siulittaasuata sulisinnaagaluarlutik suliffeqanngitsunut tapiissutit annikilliniarai. SIK-mili siulittaasup Jess G. Berthelsenip Naalakkersuisut isornartorsiorpai suliffissaaleqisut ikiorsiissutaannik ikilisaanerup kingunerisinnaasaanut mianersoqqusilluni.
Assi: Arnaq Nielsen
Jens-Frederik Nielseni isumaqarpoq assaat sulisinnaasut sulissasut - SIK-li isumaqataanngilaq.
Sulisunnaasut tamarmik sulisariaqarput. Naalakkersuisut siulittaasuat sulisinnaallutik sulinngitsunut ikiorsiissutit annikillisinniarlugit KNR-imut oqarpoq.
Taanna pingasunngornermi KNR-mit apersorneqarami oqarpoq:
- Nappaateqarnak allatigulluunniit nalunaarsorneqaruit sulisinnaasutut taava tassa sulisariaqarnermut eqqarsarpugut. Taamaammat pisartagarineqartartut taakkununnga apparneqarnissaannik siunniussaqarpugut, KNR-mut oqarpoq.
Taamaattumik naalakkersuisut suliffeqanngitsut suliffeqarsinnaasutut nalilerneqarpata ikiorsiissutinik ikilisaanissamik aaqqiissutissamik sulissutiginnissapput.
SIK-mi siulittaasup, Jess G. Berthelsenip tamanna tusaramiuk qisuariarpoq:
- Upperaara inuk sulisussanngorlugu pinngortinneqartoq. Taamaammat inuk peqqissoq piaaraluni suliffissaaleqinavianngilaq. Pinngitsaaliinikkut sulisitsilersinnaaneq uppe-rinngilara. Sulisitsisup aammalu sulisartup tamarmik iluaqutiginavianngilaat imminut tulluutinngitsumik suliffimmut pinngitsaalillugu sulisinneqalersinnaanera, SIK-ip siulittaasua tusagassiuutitigut nalunaarummi allappoq.
Sulisussaaleqineq
SIK-p kisitsisaataasa takutippaat innuttaasut ikittuinnaat suliffissaaleqisuusut. Tassa Nuummi suliffissaaleqisut 1,95 procentiupput, Qaqortumi 5,21 procentiullutik, Ilulissani 0,95 procentiusut Narsami 8,36 procentiupput. Tasiilamilu 6,38 procentiullutik.
Jess G. Berthelsenip naqissuserpaa sulisunnaasut illoqarfinni anginerni sulisut.
- Takuneqarsinnaavoq illoqarfinni anginerni sulisinnaavissortut tamarluinnarmik sulisut. Taakkunani illoqarfinni sulisussaaleqipput.
Kujataani Tasiilamilu ajornartorsiutit allaapput:
- Kujataani aammalu Tasiilami suliffissaaleqisoqavissortoq naluneqanngilaq, tassami sulif-fissat naammanngimmata. Illoqarfinni taakkunani qanoq arpaqattaartigigaluarunik sulif-fissanik nassaarnavianngillat.
- Aap soorunami sulisussaaleqiffiusunut nuutsinniarsinnaa-vagut, kisianni nalunngilarput inissaqartinneqanngitsut.
Siunnersuineq aqqutissaavoq
Aaqqiissummik allamik tikkuaavoq:
- Illuatungaatigut isumaqarpunga suliffissaaleqisumininnguanut siunnersuineq pitsaaneru-lersinneqartariaqartoq. Tassa suliffissaaleqisoq peqatigalugu ingerlariaqqissinnaanissaanut aammalu tulluartumik nassaarsinnaaneq aallunneqarnerusariaqarmat.
- Kiisalu aamma ilinniarsinnaanissaanut siunnersuineq pitsaanerulersinneqartariaqartoq isumaqarpunga.
Jess G. Berthelsen kajumissaarilluni naggasiivoq:
- Suliffissaaleqisut ajornerusumik pineqarnerisigut Nunatta aningaasaqarnera aaqqinneqarnavianngilluaasarpoq. Maani nunami atugarissaarnerulernissaaq sulissutiginiarsiuk, aningaasarsiat qaffanniarsigit, inissianullu akiliutit appartinniarsigit, qineqqusaarassi sorpas-suarnik neriorsorpatsigut, tamatta atugarissaarnerulernissatsinnik oqariartorlusi.
- Ernumatigaara taamatut sukaterinerup kingunerisaanik kalaaleqatigut Danmarkimut nu-uttut amerlareeqisut suli amerleriassasut, tamannalu Nunatta pisariaqartinngilluinnarpaa. Aamma taamaattumik SIK-p isumaqatiginngilluinnarpaa suliffissaaleqisut atugaasa ajorseriartinneqarnissaat.
