Sisimiuni qineqqusaarnermi assortuuttoqartoq: Naleqqamit qinigassanngortittoq oqallinnermit peersinneqartoq

Nunarput namminiilivissappat qanoq aningaasalersorneqassava?

Apeqqut taanna ilaatigut Sisimiut TV-kkut toqqaannartumik qineqqusaartitsinermi qineqqusaartuniit akineqartussaavoq. 

Oqallinnermi aqutsisup oqallinneq aquttussaavaa, qineqqusaartut tamarmik apeqqut akisinnaaniassammassuk.

Naleqqamiilli qineqqusaartup Lars K. S. Olsenip oqallinneq aqunniarsarilerpaa, oqallitsitsisoq oqaluttoq qalleqattaalerlugu Siumullu siulittaasuat Erik Jensen, oqallinnermi peqataasoq apeqquteqarfiginiarsaralugu.

- Siunnersuutigerusuppara Aningaasaqarnermut naalakkersuisoq siulliulluni akissuteqassasoq, maaniinnera iluatsillugu, Naleraq sinnerlugu qineqqusaartoq oqarpoq, Erik Jensenilu tikiminik tilluarlugu.

Apeqqut akineqartoq

Erik Jensenilli apeqqut akiniarlugu aalajangerpoq.

Naleraq sinnerlugu qinigassanngortittoq aammaarluni siunnersuuteqaqqippoq naalakkersuisoqatigiit siulliullugit akitinneqassasut, nammineq isumaa malillugu taakkuummata misilittagaqarluartut.

- Uanga aqutsineq aqussavara, tamannalu ataqqisariaqarpat, oqallitsitsisoq, Ole Peter Lennert Petersen oqarpoq. Taama oqarpoq qineqqusaartoq qalleraalluni oqaluinnalermat.

Qineqqusaartut amerlanerit apeqqut akereermagu Naleraq sinnerlugu qinigassanngortittoq oqaaseqarsinnaalerpoq. Apeqqutigineqartorli akinagu Erik Jensen apeqquteqarfigerusuppaa.

- Aningaasaqarneq eqqartoriaratsigu, iluatsitsisorujussuuvugut Aningaasaqarnermut naalakkersuisoq, Erik Jensen maaniimmat. Taamaattumik apeqquteqarusuppunga. Erik Jensen, Inatsisissatut siunnersuut 2025, qassiua?

Inimi nipaannersuaqalerpoq.

Taamaattoqarmat oqallinnermi aqutsisoq killiliinialerpoq aqutsinerlu pisussaaffini malillugu aqunniarsaralugu. Lars K. S. Olsenili aqutassaanngimmat oqallinneq pilersaarutaanngitsumik minutsini tallimani unikaallatsinneqarpoq. 

Partiiminit peersinneqartoq

Oqallinneq aallarteqqimmat, Naleraq sinnerlugu qinigassanngortittoq, Lars K. S. Olsen ersinngilaq.

Oqallinnermi aqutsisup, Ole Peter Lennert Petersenip Sermitsiamut ilisimatitsissutigaa qineqqusaartoq oqallinnermiit anisinneqanngitsoq. Nalerarli nammineq ataatsimiipallassimanerarpaa.

Ataatsimiipallannermi qanoq aalajangertoqarsimanersoq ilisimaneqanngilaq. Qineqqusaartorli TV-kkut nueqqinngilaq, unnuulli sinnera isiginnaartutut issiavoq.

Naleraq Sisimiuni siulittaasoq, Steffen Johansen Sermitsiap attavigaa. Taassuma uppernarsarpaa qineqqusaartup Erik Jensen oqaatsitsigut saassussimagaa, Erik Jensenillu apeqqutit sillimaffiginngisai apeqqutigisaqattaarlugit.

Steffen Johansenip nassuiaataa naapertorlugu partii aalajangersimavoq Lars K. S. Olsen unnuup sinnera sassartinneqaqqissanngitsoq, taamatut pisoqaqqinnginnissaa anguniarlugu.

- Taamatut pisoqaqqinnginnissaa anguniarlugu sassarteqqinngilarput, Steffen Johansen oqarpoq.