Sisimiut qinersinissamut piareerpoq: – Aatsaat taamak qinersinissaq pingaaruteqartigaaq

Inatsisartunut qinersinissaq aqaguttoq Sisimiuni sila issigani siallerpoq. 

Innuttaasut ilaat taasinissaminnut piareersimapput, taakkunani ilaavoq 70-inik ukiulik, Katrine Christensen. Taassuma kina qinissanerlugu qulanngilaq:

- Tassa...qinigassannut allaat tamaasa piareeqqatippakka. Nalunngilata kina qinissanerlugu, tusarnaarama. Qineqqusaartitsinerit tamaasa tusarnaarpakka. Kalaallit oqaatsigut taavalu kalaaliunerput, kalaggarinnerput ukkataraakka. Pissangaqaanga, taanna oqarpoq.

Aalisarnermut inatsit oqallisaasoq

Dorthe Ingemann aamma qinersinissaminut aalajangiusimavoq, taassuma ilaatigut aalisarnermut inatsit eqqarsaatigaa:

- Piareersimavunga taasinissannut, allannguerusukkama. Aalisarnermut inatsit uagutsinnut tulluanngilaq, aalisartut eqqorneqarput.

Isak Schmidt taasinissaminut piareeqqavoq, Naleqqakkunnik qinersiniarpoq, kinarpiarli taassanerlugu suli eqqarsaatigaa:

- Taasinissaq aatsaat taamak pingaaruteqartigaaq. Namminiilivinnissaq eqqarsaatigaara, akit qaffakkiartorit, aalisarnermut inatsi. Aamma meeqqerivinni atukkat, perorsaasullu atugaat akissarsiaallu aamma pitsanngorsarneqarnissai eqqarsaatigaakka.

Inuit nittartakkakkut attaveqaqatigiittarfiitigut oqallinnerit

Isak Schmidtip najaa, Mona Schmidt inuit nittartakkakkut attaveqatigiittarfiitigut malinnaasimalluni taasinissaminut piareersimanerarpoq.

- Sociale mediakkut malunnaagama, taasinissannut piareersimavunga. Namminiilivinnissaq akillu qaffakkiartupiloornerit eqqarsaatigaakka, Mina Schmidt oqarpoq.

Nunanit allaniit isiginiarneqarneq

Sisimiunut tikeraat, allakkatigut taasisimalluni oqarpoq. Taassuma nunatta avataaniit ukkatarineqaleraluttuinnarnera eqqarsaatigalugu taasisimanerarpoq:

- Aatsaat taamak pingaaruteqartigaaq, avammiit, soorlu USA-mut ukkatarineqarnerput eqqarsaatigalugu. Aamma nunatsinni iluarsisariallit eqqarsaatigalugit taasivunga.