NATO-mi
ilaasortaanissap tapersersornera Siumup politikikkut 2023-26-mut anguniagaasa
ilagaat. Partiip qineqqusaarutaani tamanna atuarneqarsinnaavoq.
”Nunarput NATO-mi ilaasortaanermigut
Amerikap avannaata Europallu akornanni attaveqaqatigiinnermut aqqutaasinnaavoq."
NATO-mi
ilaasortaanissap tapersersornera Siumup politikikkut 2023-26-mut anguniagaasa
ilagaat. Partiip qineqqusaarutaani tamanna atuarneqarsinnaavoq.
”Nunarput NATO-mi ilaasortaanermigut
Amerikap avannaata Europallu akornanni attaveqaqatigiinnermut aqqutaasinnaavoq."
"Ilanngullugulu Siumup kissaatigaa NATO-mi ataatsimiittarnerni nunatsinni
Naalakkersuisut peqataatinneqartarnissaat. Aammalu Siumup anguniarpaa Nunatta
nammineerluni NATO-mut isumaqatigiissuteqartalernissaa. Nunarsuaq
inuuffigisarput allanngorpoq, issittoq annertuumik nunarsuarmioqatigiinnit
isigineqarpoq, tamannalu tunngavigalugu NATO-mi namminerisatsinnik
aallartitaqarnissaq uani qinigaaffimmi anguarput. Siunertaajuaannassaarli
namminerisatsinni Naalagaaffittut NATO-mi ilaasortanngornissaq.”
Nunat allat sakkutuuinik isumalluuteqarneq
Allatut
oqaatigalugu Kalaallit Nunaata namminiilivinneruleriartornerani nunatta
illersornissamut nunanit allanit atorneqarnera aalajangiiffiginerulernissaa
Siumup kissaatigaa.
Kalaallit
Nunaat Danmarkip NATO-mut ilaasortaaneranut maanna ilaavoq. Siunissami
allaanerusumik pisoqassappat Kalaallit Nunaat nammineq sakkutooqannginnami
nunamik allamik immikkut isumaqatigiissuteqartariaqarpoq,.
Forsvarsakademimi
ilisimatusartoq Peter Viggo Jakobsen oqarpoq.
– Kalaallit
Nunaata illersorneqarnissaa pillugu nunamik allamik immikkut
isumaqatigiissusiortariaqarpoq. NATO-mi nunatut namminersortutut
ilaasortaassagaanni imminut illersornissamut sakkutooqartariaqarpoq, Kalaallit
Nunaalli soqanngilaq.
– Nunalli
allat, assersuutigalugu USA, immikkut
isumaqatigiissusiorfigineqarsinnaasuuppata tamanna ajornassanngikkaluarpoq.
Sakkutuunullu tunngatillugu piviusut qiviassagaanni, USA sorsunnersuup
aappaaniilli Kalaallit Nunaanniippoq. USA Kalaallit Nunaanni sakkutooqarpoq,
Danmarki sinerissamik nakkutilliisoqartoq, taakku immami annaassiniartarput,
immap naqqanik uuttortaasartunik il.il.
Amerikamit
oqartussaaffigineqarneq
USA-p
Kalaallit Nunaat aqukkusullugu erseqqissumik oqariartuutiginikuugaa Peter Viggo
Jakobsenip tikkuarpaa.
–
Taamaattumik Kalaallit Nunaat qallunaanit oqartussaaffigineqarnermiit
Amerikamiunit oqartussaaffigineqalernissamik periarfissaqarpoq, USA-llu tamanna
akuerippagu NATO-mut atatillugu aamma piviusunngortitsisoqarsinnaavoq, Peter
Viggo Jakobsen oqarpoq, taassumali qularutiginngilaa taamatut
allannguisoqarnera Kalaallit Nunaata aalajangiissuseqalernerunissaanik
kinguneqassasoq, akerlianilli.
– USA-p
piffissami kingullermi qanoq pissusilersornersoq takuiuk? Taava aperivutit
isumaqarnersunga USA-p Kalaallit Nunaat Danmarkimit tusaaniarnerussagaa?
Kalaallit Nunaata Danmarki qanorluunniit maanna iliortissinnaalluarpaa – aamma
pissaaneqarniarluni naatsorsuutigineqarsinnaanngitsunik. Kalaallit Nunaat
USA-mut nunasiaataanerarsimasutut iluaqutissani anguniarlugu
inississinnaanngilaq. Danmarkimut taamaallaat taamaaliortoqarsinnaavoq.
Taamaattumik isumaqatiginninniarnermi kalaallit politikeriisa pissaaneq
paarisaat amerikamiut ataani inissisimaleraluarunik malunnaatilimmik
sanngiillissaaq. Ilisimasariaqarporli aalajangiisimagaanni aalajangigaq
allanngortinneqarsinnaanngimmat, Peter Viggo Jakobsen oqarpoq.
Namminiilivinnissaq
sakkutooqarnermut tunnganngitsoq
Peter Viggo
Jakobsen naapertorlugu Kalaallit Nunaata Naalagaaffeqatigiinnermit
ilaajunnaassasoq politikerinit aalajangerpassuk tamanna sakkutooqarnermut
tunngatillugu allannguuteqarpallaarnavianngilaq. USA-mi Kalaallit Nunaanni
pissaaneqarujussuareerpoq.
–
Taamaattumik namminiilivinnissaq pillugu oqallinneq sakkutooqarnermut
tunngassuteqanngilaq. Atugarissaarnermulliuna aningaasaqarnermullu
tunngassuteqartoq. Kalaallit inuiaqatigiit kikkut aningaasalersussavaat,
qallunaammi politikerii ersarissumik nalunaarput Kalaallit Nunaat
namminiilivinniarluni nalunaarpat aningaasanik tapiissuteqartarneq
unitsinneqassasoq. Tamanna siunissami qaninnerusumi namminiilivittoqassappat
unammilligassaassaaq. Namminiilivinnissarli ima aaqqinneqassappat USA-p
ataaniilerluni, taava kalaallit inuiaqatigiit aningaasalersorneqalerlutik
tamanna piumasaqaatinik nassataqassaaq. Nalunngilara Donald Trump ukiuni
sisamani tulliuttuni præsidentiusussaasoq taamaattumik siunissaq ungasinnerusoq
eqqarsaatigalugu immaqa præsidentimik iluarnerusumik peqalissasoq. Donald
Trumpiliuna USA-mut taamaallaat iluaqutaasumik iliuuseqarusuttoq. Allanik
soqutigisaqanngilluinnarpoq. Isumaqarpunga sapaatit akunnerini kingullerni
iliusai tamatuminnga ersersitsilluartut. Taamaattumik kalaaliuguma amerikamiut
illersuinerannut ilanngunnissara ulapputigivallaassanngikkaluarpara. Tamannali
nammineerlusi aalajangigassaraarsi, Peter Viggo Jakobsen oqarpoq.
