Stine Egede: Iluarsaaqqinniarluta qineqqusaarpugut, tamannalu ingerlapparput

Stine Egede, 2021-mi Siumumeersup Kiista P. Isaksenip borgmesteritut atorfianik paarlatsisuusoq, tamatumalu kingorna nunap kommuniisa kujasinnerpaartaanni, Kommune Kujallermi, siuttuusoq, Inuit Ataqatigiit kommunimut qinigassanngortitaannut 15-inut ilaavoq. Kommuni takornariartitsinermi aatsitassaqartitsinermilu siuariartornissamut periarfissaqarluarpoq, maannali aningaasaqarnikkut ajornartorsiungaarnini pissutigalugu ajorluinnartumik inissisimavoq.

Aaqqissuusseqqinnerit nuannarineqarpallaanngitsut 

Kommunimut qinersisoqarpat qinersisartut naliliinerat sakkortusinnaasoq Stine Egedep nalunngilaa, oqarneratuulli; aaqqissuusseqqinnerit iluarsaaqqinnerillu nuannarineqarneq ajorput, Kommune Kujallermili pisariaqarsimapput. 

– Qinersisoqarnissaanut pissangasoqartuaannarpoq, nalunarpormi aalajangiinerit nuannarineqartuaannanngitsut qanoq naliliiffigineqassanersut. Kisiannili iluarsaaqqinniarluta 2021-mi qineqqusaarpugut, aallartikkattalu ajorsinnaasut tamarmik saqqummersinneqarput. Soorunami piffissaq pisoqarfiusoq uggornarpoq, pissutsimi qanoq ilungersunartiginera nalunngikkaluarutsigu aningaasaqarneq aallarniutigisimassagaluarparput, Stine Egede oqarpoq. 

Naatsorsuutit tukattut 

Akileraarutit A-t arlaleriarlutik akilerneqarsimanngitsut kingullermillu 2023-mi 40 millionit koruunit sinnerlugit akileraarutitigut akiitsoqalersimalluni kommunip nammineerluni 2024-mi apriilimi paasivaa. Tamatuma kingunerisaanik kommunalbestyrelsi aningaasat tigoriaannaat tatineqarnerat annikillisinniarlugu taarsigassarsiani aninngaaserivimmiittut 100 millionit koruuninut annertusarniarlugit 2024-mi maajimi ataatsimiinnermini aalajangerpoq. Tamatuma saniatigut naatsorsueqqissaarnermi arlaleriarluni kukkusoqarsimallunilu, piffissamut naatsorsuinerit nalimmassaanerillu amigaataanerat kiisalu missingersuutinut sanilliullugu 8 millionit koruuninik atuivallaartoqarnera paasineqarpoq.

Qummumi sulisunut inissianik 22-nik pisineq isumaginninnermilu atuinerup annertusiartornera pissutigalugit kommunip aningaasaateqarnera tatineqarnerulersimasoq juunimi oqaatigineqarpoq. 

Innuttaasunik ataatsimiisitsinerit pilersitseqqinnissamullu pilersaarut 

Stine Egede kommunalbestyrelseip aningaasaqarnikkut pilersitseqqinnissamut pilersaarummik oktobarimi akuersinnginnerani Nanortalimmi, Qaqortumi Narsamilu akileraarutitigut akiitsut kommunillu aningaasaqarniarnera ajorluinnartoq pillugit aasap naajartornerani innuttaasunik ataatsimiititsivoq. Tamatuma kingorna Naalakkersuisut, borgmesterip ikioqqunera tunngavigalugu, kommunimi isumaginninnermut ingerlatsivimmut, suli Isumaginninnermut Aqutsisoqarfimmi sulisunit ingerlanneqartumut, ikiuutissallutik aalajangerput. 

– Aningaasaqarnermut tunngasunik siunnersortitut suleqatit ikiortigalugit aningaasaqarneq iluarsaallugu aallartikkatsigu akileraarutitigut akiitsugut saqqummerput. Ammasunissaq siunertaralugu qineqqusaarpunga, taamaammat ajortoqartoq paasigatsigu ingerlaannaq ilisimasavut saqqummiuppavut. Aamma innuttaasunik ataatsimiititsinerni pisut oqaluttuaralugit angalasarpunga, inuilli assigiinngitsumik tusaasartut ersarippoq, qineqqusaarnitsinnilu aningaasaqarneq tukattoq uagutsinnut akerliissutaasarluni. Aningaasaqarnermili aqutsineq qangarsuarli atorneqarsimasoq iluarsaatilerparput. Tamatuma saniatigut borgmesteritut suleqatikka tatigivallaarsimagunarpakka. Maanna tatiginninneq pitsaasuusoq, kisianni nakkutilliineq ilaannikkut pitsaanerusoq paasivara, Stine Egede oqarpoq.

 Kommuni sulisukillisarneqassasoq 

Aningaasat 70 millionit koruunit taakkunanngalu sulisoqarnermut aningaasartuutit 40 millionit koruunit sipaarutiginissaat pilersitseqqinnissamut pilersaarummut ilaavoq. Stine Egede naapertorlugu kommuni angissusaanut sanilliullugu sulisoqarpallaarpoq. 

– Qeqertalimmiut amerlaqatigingajappavut, kommunimili 1300-nik sulisuqartugut Qeqertalimmi 900-nik sulisoqarpoq. Sulisut ikilisartariaqarpagut. Nalunngilara tamanna nuannarineqarpallaanngitsoq, pisariaqarporli, Stine Egede oqarpoq, taassumalu aamma borgmesteriunermini kommunip aningaasaqarneranik paasinnissinnaanermik ammasumillu ingerlatsilersimanera, aamma partiit tamarmik sipaarniuteqarnissamut pilersaarut isumaqatigiissutigisimammassuk tulluusimaarutigaa.

– Aaqqissueqqinneq sivisussaaq, aallartereerpugulli. Tamanna tulluusimaarutigaara.