ILINNIARNEQ
Suleqatigiilluni suliaq: Atuartut nunani allani atuartinneqartut
Køgemi Grunduddannelsenimi (FGU) atuartut qulit Nuummut qanittukkut tikeraarput, upernaamullu Nuummi Majoriami atuartut Køgemut angalassapput. Paarlaaqatigiilluni angalaneq inuusuttut naalakkersueqataaneq pillugu paasisaqarnissaannut inuiaqatigiinnilu peqataanerulernissaannut siunertaqarpoq.
Køgemi tunngaviusumik ilinniarfiup FGU-p ”Omsorg & Sundhed”-imi immikkoortuani atuartut qulit ilinniartitsisut marluk ilagalugit Nuummut paasisassarsiorlutik 25. august – 1. septembar angalapput, angalanermi Majoriaq Nuuk suliniummi nutaami ilinniarfittut suleqatigineqarluni.
Assi: FGU Køge
Køgemi
tunngaviusumik ilinniarfiup FGU-p ”Omsorg & Sundhed”-imi immikkoortuani
atuartut qulit ilinniartitsisorisatik marluk ilagalugit sapaatip akunnerani
ataatsimi Nuummut paasisassarsiorlutik angalapput. Pilersaarutit malillugit
Nuummi Majoriami inuusuttut qulit ilinniartitsisut marluk ilagalugit maajimi
2026-mi Køgemi FGU-mut aamma paasisassarsioriarlutik angalassapput.
Inuusuttut Danmarkimeersut ilaatigut Inatsisartunut pulaarput. Majoriami atuartut inuusuttut Danmarkimut maajimi tikeraarnissaat pilersaarutaavoq.
Assi: FGU Køge
Nuummi
sammisat ilaatigut tassaapput Majoriami inuusuttut workshoppertinneqarnerat,
Inatsisartuni takornariarneq, meeqqerivinni Apissimi aamma Annersuarmi meeqqat
nutaaliornermik suliaqartinneqarnerat, Peqqissaanermik Ilinniarfimmi
isumaginninnermut peqqinnissamullu tunngasunik ilinniagaqarnermik paasisaqarneq
kiisalu Nuup Kangerluani nalunaaquttap akunnerini tallimani aalisarneq.
Sulisut
nuttarsinnaanerannut suliniut
Atuartut
aallartinnatik angalanissamut piareersarsimapput, ilaatigut kalaallit
oqaluttuatoqaat pillugit atuartinneqarlutik Københavnimilu Kalaallit
Illuutaannut kiisalu Nationalmuseumimut pulaarlutik.
Paasisassarsiorluni
angalaneq ”inuiaqatigiit peqataatinneruniarluagit ilinniarfiit
suleqatigiinnermikkut isumassarsiornerat paasisassarsiorneranillu"
taallugu suliniutaavoq, taannalu naalagaaffeqatigiinneq qitiutillugu
ingerlanneqartoq Nuummi Majoriap suleqataaffigaa. Inuusuttut qulit
ilinniartitsisullu marluk Nuummi Majoriamit Køgemi FGU maajip 4-11-ani 2026
tikeraassavaat, Sofie Tønsberg-Jensen, FGU-mi ineriartortitsinermut
atuutilersitsinissamullu pisortaagallartoq ilisimatitsivoq.
Naalagaaffik
pillugu ilisimasaqarnerulerneq
Suliniummi
inuusuttut 25-t inorlugit ukiullit suliffeqanngitsut ilinniagaqanngitsullu 20-t
soqutiginnilersinnissaat anguniagaavoq.
Inuusuttut Danmarkimeersut immikkoortumi ”Omsorg og sundhed”-imi atuarput taamaattumillu Nuummiinnerminni peqqissaanermik ilinniarfik aamma pulaarneqarpoq.
Assi: FGU Køge
”Isumaqarpugut
inuusuttut naalagaaffeqatigiinneq pillugu ilisimasaqalernissamut
kajumissuseqarnerulersinnaasut inuusuttoqatitik naalagaaffeqatigiinni
allaneersut qanoq inuunersut qanimut misigisinnaagunikku. Inuusuttut akornanni
attaveqatigiinnikkut kissaatigaarput inuusuttut avammut isiginiarnerat
imminnullu ilisimaarinerat annertusassallugu, taamaasiornikkut misigissammassuk
annertunerujussuarmut attuumassuteqarlutik imminnullu ataqatigiiffeqarlutik.
Aammattaaq siunertarineqarpoq inuusuttut angerlarsimaffitsik qimallugu
ungasissorsuarmut angalanermikkut, ilinniagaqarnikkut inuttullu peqatigiittut
inuttut nammineq piginnaasaminnik misileraanissaat,” Sofie Tønsberg-Jensen
oqarpoq.
Angalaneq
ilinniarfiuvoq
FGU-mi
ilinniarfik naapertorlugu Danmarkimut Kalaallit Nunaanulluunniit angalaneq
namminermini ilinniarfiuvoq, tassanilu inuttut aporfiusinnaasut periarfissallu
eqqumaffigineqarnerulersinnaallutik, ilaatigut inuiaqatigiinni allani
inooriaatsit periaasaannik ilikkagaqarneq nalimmassarsinnaanerlu, kulturillu
kiisalu oqaatsit assigiinngissusaannik ataqqinninnermik akaarinninnermillu
takutitsisinnaaneq ilanngullugit.
Atuartuutigut
qilanaarput
Nuummi
Majoriami aqutsisoq Nuka Nielsen Larsen oqaluttuarpoq qallunaat atuartut Nuummi
takornariartillugit atuartut nuannarilluarsimagaat, taamatullu upernaamut
Køgemut tikeraarnissartik qilanaaralugu.
–
Danmarkimit atuartut siullermeerlutik Kalaallit Nunaannut tikeraarput.
Inuusuttut ulluinnarni inuunerat atuarnerallu misigerusuppaat.
Assigiinngitsunik sammisaqarput, ilaatigut atuartitsinermut peqataallutik
kalaalimineerniarfimmullu pisuttuaqataallutik. Atuartuutitta qallunaat atuartut
naapillugit nuannaraat qallunaatullu oqaloqateqarnertik nuannaralugu. Tamanna
oqaatsitigut ineriartortitsisimavoq. Pilersaarutit ilagaat atuartuutivut
maajimi 2026-mi Køgemi FGU-mi atuartunut tikeraarnissaat. Køgemit atuartut
Nuummut tikinnginnerminni piareersarluarsimaqaat, atuartuutittalu
Køgemiilerunik misigisassatik pilersaarusiulereerpaat.
Ilinniarneq pillugu sammisaq uani atuaruk.
Suliniut,
angalanerit najugaqarnerlu ilanngullugit, Nordplusimit (Nunat Avannarliit
Ministeriisa Siunnersuisoqatigiivisa ilinniartitaanermut tunngasunik
attaveqatigiinnermik suliniutaat) aamma Meeqqanut Ilinniartitaanermullu
Naalakkersuisoqarfimmit Savalimmiunut Kalaallit Nunaannullu paasisassarsiorluni
angalanissamut aningaasaliissutinit aningaasalersorneqarpoq.
