Sulinerup nalaani pujortaqqusinnginneq aqagumit atorunnaassaaq

Qeqqata Kommuniani sulinerup nalaani pujortaqqusaannginneq oqaluttuaannanngorpoq.

Sulisut maanna sulinerup nalaani pujortassanerlutik pujortassannginnerlutilluunniit nammineq aalajangersinnaalerpaat.

Kommunalbestyrelsimi ilaasortat aqqanillit pujortaqqusinnginnerup atorunnaarsinneqarnissaanut akuersillutik taasipput. Pingasut akerliullutik taasipput, ataaserlu taasinani.

Taamaalilluni amerlanerussuteqartut akuersissutigaat.

Atorunnaarsinneqarnissaanut taasisut ilagaat, Siumumit ilaasortaq Evelyn Mølgaard. Borgmesteri Malik Berthelsen pujortaqqusinnginnerup atorunnaarsinneqarnissaanut akerliulluni taasivoq, amerlanerussuteqartulli aalajangernerat akueralugu:

- Isertuutissanngilara kingumut uternertut isigigakku, borgmesteri Malik Berthelsen oqarpoq.

Aalajangernerup kinguninngua kommunip silataani biilinit siggartartoqarpoq, aalajangerneq nuannaarutigineqarluni.

Aalajangerneq tallimanngornermi juunip 27-ani atuutilisissaaq.