Sulisut oqaaseqarput: Pujortaqqusinnginnerup atuutiinnarnissaa akerleraat
Sulisut oqariartuutaat kommunalbestyrelsip tusaassavaa imaluunniit naamik? Tamanna kommunalbestyrelsi sisamanngornermi ataatsimiinnerani paasinarsissaaq.
Kommunimi sulisut sulinerup nalaani pujortaqqusaannginneq pillugu qanoq isumaqarnersut Qeqqata Kommuniata paasiniaqqammerpaa.
Siumut aamma Inuit Ataqatigiit akornanni suleqatiginnissamik isumaqatigiissumi nutaami pujortaqqusinnginnermut politikki pilllugu tamamik misissuinermik aallartitsisoqarnissaa kissaatigineqarnikuuvoq. Tassani sulinerup nalaani kommunip suliffeqarfiutaani pujortaqqusinnginneq paariinnarneqassanersoq pillugu sulisut akornanni piaartumik taasititsisoqassasoq isumaqatigiissutigineqarluni
Misissuinermi digitaliusumik SurveyXact atorneqarpoq. Maajip arfineq-aappaaniit 28-ata tungaanut sulisut apersorneqarlutik, tassani sulisut 631-it akissuteqarput - kommunimi sulisut 57,3%-ii peqataapput.
Pujortaqqusaannginnerup atuutiinnarnissaa akerlerigaat
Sulisut 50 procentiisa paasissutissiissutigivaat, sulinerup nalaani nikotinitalinnik atuineq ajorlutik, sinnerisalu paasissutissiissutigivaat pujortartarlutik.
Sulinerup nalaani nikotinitalinnik atuinissamut inerteqquteqarneq pillugu kommunip politikkianut akissuteqartut 18 %-iisa kommunip politikkia ajunngilluinnartutut nalilerpaat.
11%-iisa ajunngitsutut, 18 %-iisa naammaannartutut, 20 %-iisa naammaginanngitsutut kiisalu 33%-iisa naammaginanngilluinnartutut oqariartuutigivaat.
Sulisut 58 %-iisa nikotinitalinnik unitsitsisininissaq inuit ataasiakkaat nammineq akisussaaffigigaat oqariartuutigaat.
Tamatuma suliffeqarfik tapersuinermi suliniutini akuunissaa suleqataasut arlallit naatsorsuutiginngikkaat, kisiannili inuit ataasiakkaat namminneerlutik suliassarigaat tikkuarpaat.
Kingumoornissaq innersuussutiginngillaat
Naak misissuisitsisoqareeraluartoq Qeqqata Kommuniani allaffeqarfiup nalilerpaa pujortaqqusinnginneq atorunnaarsinneqassanngitsoq.
Taakkumi nalilerpaat kommunip pujortaqqusinnginnermut politikkianut, pilersaarusiornermi periusissiamut, kommunip suliniutigeqqaagaanut, peqqinnissamut pinaveersaartitsinermullu politikkimut, meeqqanut inuusuttunullu politikkimut aamma nuna tamakkerlugu peqqinnerulernissamut periusissiamut Inuuneritta III-mut akerliussasoq.
Kommunalbestyrelsi sulisut isumaannik tusarniaanertik tusaassavaat? Imaluunniit kommunip politikkia isiginiarnerussavaat? Tamanna kommunalbestyrelsi sisamanngornermi ataatsimiinnerani paasinarsissaaq.
