Trumpip qinersineq sioqqutitsiarlugu Kalaallit Nunaat milliardilinnik neriorsoraa
Donald Trump naapertorlugu USA Kalaallit Nunaanni suliffinnik pilersitsinissamut dollarinik milliardilinnik aningaasaliissuteqarniarpoq.
Assi: Kevin Lamarque/Reuters/Ritzau Scanpix
USA-p Kalaallit Nunaat dollarinik milliardilinnik aningaasaliiffiginiarlugu kalaallillu pisuunngortinniarlugit piareersimavoq.
Taama USA-p præsidentia Donald Trump inuit attaveqaqatigiittarfianni Truth Social-imi allappoq.
Aningaasat taakku præsidentip oqarneratut kalaallit suliffissaannik pilersitsinissamut atorneqassapput.
- Suliffeqarfinnik nutaanik pilersitsiumalluta ilissilu pisuunngortikkumallusi Kalaallit Nunaanni dollarinik milliardilinnik aningaasaliinissamut piareersimavugut, præsidenti allappoq.
Marlunngornermi Inatsisartunut qinersinissaq sioqqullugu præsidenti taama nalunaaruteqarpoq.
USA-p præsidentiata Kalaallit Nunaata tigunissaa sapaatip-akunnera ataaseq qaangiutinngitsoq kingullermik tamanut ammasumik eqqartorpaa.
- Soorlu Kongressimi oqalugiarninni erseqqissariga, USA-p kalaallit siunissartik pillugu namminneq aalajangiisinnaatitaanerat tapersersorpaa, Trump allappoq.
Aamma illersuinissaq neriorsuutigigigaa
Trumpip kalaallit isumannaatsuunissaat isumaginiarlugu allaaserisami aammattaaq neriorsuivoq.
- Sorsunnersuup aappaaniilli illersorsimanitsitut illersortuarumaarpassi, præsidenti allappoq.
Her kan du se hele Trumps opslag.
Foto: Truth Social
USA sorsunnersuup kingulliup kingornali Kalaallit Nunaanni sakkutooqarpoq, soorluttaaq danskit sakkutuui Kalaallit Nunaanni eqqaanilu aamma sulisartut.
Donald Trumpip, 2019-imi Kalaallit Nunaata pisiarinissaanik kissaateqarnerminik siullermik oqaatiginnittup, qeqertarujussuup Amerikamiunit tiguneqarnissaanik eqqarsaatini siorna decembarimili
uteqattaareerpaa.
Sakkutooqarnikkut pissaaneqarnissaq atorsinnaagaa
Tamanna Issittumi, ingammik Ruslandip sakkussiaqalerfigisaani, isumannaallisaanikkut pissutsit aqunnerulerniarlugit pivoq.
USA-p Kalaallit Nunaat aqussinnaajumallugu sakkutooqarnikkut pissaaneqarnini atorsinnaagaa Trump kingusinnerusukkut sukannernerusumik oqaaseqarpoq.
Præsidentip kissaataa Naalakkersuisut siulittaasuannit Múte B. Egedemit ministeriunermillu Mette Frederiksenimit (S) arlaleriarluni itigartinneqarsimavoq.
Trumpip oqaasii tunngavigalugit Kalaallit Nunaat Danmarkilu Amerikamiut saassussinerannit navianartorsiortinneqarnavianngitsoq Mette Frederiksenip januaarip naanerani oqaatigaa.
