Trumpip upperaa Kalaallit Nunaat amerikamut atalerumaartoq

USA-p præsidentiata Donal Trumpip oqaaseq ilaalersitsineq, nammineq naalagaaffimminut ilanngutititsinermik isumaqartoq atunngilaa, kisianni "ilaalersitsisinnaanermut" eqqarsaateqarnersoq aperineqarpoq.

- Ilimagaara taama pisoqassasoq, Trump oqartoq Reuters allappoq.

Præsidentip illorsuani Det Hvide Husimi Natop generalsekretæriata Mark Ruttep ataatsimeeqatiginerani taama oqaaseqarpoq.

Trump siusinnerusukkut oqaaseqartarnermini "nunarsuarmi eqqissisimanissamut atatillugu pisariaqartipparput " oqaatiginikuuaa.

Taassumalu sineriammi suliaqarnerit innersuussutigalugit USA Kalaallit Nunaat pillugu isumaqatigiissuteqartariaqartoq oqaatigaa.

Nunatsinni inatsisartunut sapaatip akunnerani matumani siusinnerusukkut qinersisoqarnerata kingorna præsidenti nunatsinnut tunngatillugu siullermeertumik taama oqaaseqarpoq.

Qinersisoqarnerani Demokraatit qinigaanerpaapput. Partiip nunatsinni – naalakkersuisuugallartutulli aamma danskit naalakkersuisuisatulli – pisisoqarnissaa itigartitsissutigaat.

- Erseqqissartigu. Kalaallit Nunaat tuniniagaanngilaq. Ullumikkuunngitsoq. Aqaguunngitsoq Qaquguluunniit tuniniagaanavianngilaq, partii qineqqusaarnermi programmimini allappoq.

Trump: Qinersineq uagutsinnut pitsaasuuvoq

Minnerunngitsumik Trumpip tusagassiortunik katersortitsinermi Kalaallit Nunaanni qinersineq "qinersineq uagutsinnut pitsaasutut“ taavaa.

- Angusarissaarnerpaaq inutsialaavoq, Trump Demokraatit siulittaasuat Jens-Frederik Nielsen qineqqusaarnermi qinerneqarnerpaaq pillugu oqarpoq.

Trumpip Kalaallit Nunaata Danmarkimut ilaanera qularilerseqqippaa. Amerikamiut Kalaallit Nunaata Danmarkimut ilaanera siullermik 1916-imi akuerinikuuaa De Dansk-Vestindiske Øer USA-mut tunineqarnerani.

- Danmark ungasissumiippoq iliuuseqarpiarsinnaananilu. Susoqartoruna? Umiatsiaq ukiut 200-t matuma siorna tulakkunarpoq. Oqartussaaffigalugu oqarput tamannalu ilumoornersoq naluara. Taamaassorinngilara, Trump oqarpoq.

- Danmarkili Kalaallit Nunaallu attaveqarfigisimavavut, taamaaliortariaqarpugulu nunarsuaq tamakkerlugu isumannaatsuunissaamut pisariaqartilluinnaratsigu, taamaattumillu isumaqarpunga Nato arlaatigut akuliuttariaqartoq.

- Kalaallit Nunaanni sakkutooqarfeqareerpugut, sakkutuullu amerlaqaat. Immaqa sakkutuut amerlanerit tassungarsinnaapput. Naluara, Trump oqarpoq.

USA isumannaallisaanermik annertusaajumalluni sikusiutinik 48-nik pisisoq aamma oqarpoq.

USA-p Kalaallit Nunaat pisiarerusukkaa Trumpip arlaleriarluni oqaatiginikuuaa.

Taanna januaarimi tusagassiortunik katersortitsinermi Panamakanalimut aamma nunatsinnut atatillugu sakkussanik aningaasaqarnikkulluunniit pinngitsaaliissuteqarniarnersoq toqqaannartumik aperineqarama tamanna itigartitsissutiginngilaa.

/ritzau/