Tunumi qaleralittassaqarnerulissaaq Kitaani saarullittassaqarnerulersoq

ICES aamma Pinngortitaleriffiup aalisakkat assigiinngitsut pillugit pisassiissutissatut innersuussatik saqqummiuteqqammerpaat, ilaatigut kitaani saarullittassanut Tunullu avataani qaleralittassanut suluppaagartassanullu tunngasunik. Aalisartunut nutaarsiassatsialaqarpoq aammali akerlianik.

ICES Pinngortitaleriffiullu siunnersuutaa malillugu saarullittassat Kitaata Avataani pisassiiffigineqartussat aammalu Nuup avannaani sinerissap qanittuani kiisalu Tunumi, Islandimi, Savalimmiunilu qaleralittassiissutissat amerlineqarnissaat innersuussutigineqarput.

Kitaani Nunap Isuaniit Nuuk tikillugu sinerissap qanittuani saarullittassat aammalu suluppaagarsuit Tunumi Islandimilu pisarineqartartut ikilisaaffigineqartussatut innersuussiffigineqarput.