Utoqqarmiut Kangerluarsunnguanni alliliinissamik suliaq siumut ingerlavoq

Namminersorlutik Oqartussat suliffeqarfiutaata NunaGreen Construction Nuuk A/S-ip Utoqqarmiut Kangerluarsunnguanni erngup nukinganik nukissiorfiup allilerneqarnissaanut suliaq nangeqqippaat.

Suliassanut tamakkiisunut sanaartugassamut akigititassanut piukkunnartussarsiuussineq maanna ingerlanneqareersoq, sanaartugassanillu suliakkerneqartartut pingasut suliassap suliarineqarnissaanut neqerooruteqarnissamut piukkunneqartut suliffeqarfik naluaarpoq.

Sanaartugassanik suliakkerneqartartut piukkunneqartut tassaapput:

•  JV COBRA -MTH BUKSEFJORDEN HPP (Spanien/ Danmark)
•  Pennecon Aecon Partnership (Canada)
• Association between Thyssen Schachtbau GmbH and Alberto Couto Alves, S.A. (Tyskland/ Portugal)

- NunaGreen A/S-ip suliassap soqutigineqarnerujussua nuannaarutigisorujussuuaa, neriunarluni missingersuutit iluanni unammillersinnaassusilinnik neqerooruteqartoqarnerani inerneqassasoq, NunaGreen A/S-imi pisortaaneq Aviaaja Karlshøj Knudsen oqarpoq.

Sulloq 16 km aamma innaallagiamut aqqut 36 km

Erngup nukinganik nukissiorfiup allineqarnerani illoqarfiit pingaarnersaanut pilersuinermi pingasoriaatingajanngussaaq, tassa pilersuineq 45 MW-imit 121 MW-imut annertusissalluni.

16 km-isut takissusilimmik sulluliorneq, pingasunik kaavittulimmik nutaamik innaallagissiorfiliorneq kiisalu erngup nukinganik innaallagissiorfittaassamiit innaallagissiorfimmut pioreersumut atassusiisussaq innaallagiamut aqqut 36 km takissusilik suliassami ilaasut NunaGreen Construction Nuuk nassuiaavoq.

Sanaartorneq 2026-mi aallartinnissaa erngup nukinganik nukissiorfiullu nutaap 2032-mi atulernissaa naatsorsuutigineqarpoq.

2025-mi marsimi piareersaataasumik nunap suliarineqarnissaa pillugu neqeroortitsineq alla saqqummiunneqassasoq NunaGreen aamma nalunaarpoq.

- Suliassaq taanna suliassanut pingaarnernut sanaartugassamut akigititanut isumaqatigiissutitut, najukkaneersunut suliaqartuusunut siunnerfeqartinneqartutut, neqeroortitsivigineqassaaq aammalu ilaatinneqassalluni aqqusernup pioreersup 14 km-iusup nutarterneqarnera kiisalu sanaartornermi aqqusinermut 8 km-isut takissusilimmut allamut periarfissaqassalluni, NunaGreen Construction Nuuk allappoq.