Arsaannermik takorluugaq Qeqertarsuarmiit avalattoq

Qeqertarsuup avataani imaannarsuarmi ningittagaq nipeqarnani imaanut tungutsorissumut nillertumullu siatsinneqarpoq. Ulloq anorimit aqunneqarpoq, nipiliornerillu ikittuinnaapput, immap nipaa angallatillu neeqqulunnera kisimik tusarsaapput. Maani nipaassuarmik ukiunilu untritilinni aalisartut ileqquinit avatangersimaneqarluni, 21-nik ukiulik Aqqaluk Jensen Heilmann assassortilluni eqqarsaatai illoqarfiit pingaarnersaanni arsaattarfimmi qorsooqqissumiipput.

Qeqertarsuaq illoqarfeerannguuvoq 800-t missaannik inulik, piffik kikkut tamarmik imminnut ilassisarfigisartagaat, immallu sanilerisap inuussutissarsiorfiunerani. Maani Aqqaluk Jensen Heilmann peroriartorpoq. Angutaata aalisarnermik ilinniartippaa – sarfamik anorimik silarlummilu eqqissisimanermik ilikkartillugu. Maanissaaq, imaannarmi sinnattut siulliit ilusinikkiartorput, piniarluarnerinnaanngitsut, Kalaallilli Nunaata arsarnermik atisaanik atikkersorsimalluni siunissaqarnissaq. Ullumikkut 21-nik ukioqarluni ileqqutoqqat anguniakkallu ingiaqatigiissillugit inuuvoq. Maannalu Nuummi ivigaasani arsaaffimmiippoq, pingajussaa Kalaallit Nunaanni arsarnermik pissartanngorniarnissamut piareerluni.

Immap namminerlu arsaattarfigisap akornanni

Aqqaluk Jensen Heilmann ilaqutariinni aalisartuni piniartunilu kinguaariit sisamaraat. Sila atorsaatillugu qaleralinnut ningitsiartortarpoq – oqummersat 500-t angullugit, ammassanillu nutaanik ullaakkut qalusaminik neqitsertarpoq. 800 meterisut ititigisumut ningitsisussaavoq, pisaqarluartillunilu aalisakkat 900 kiilut angullugit qaqittarpai. Inuunerli aamma aarlerinartoqarpoq. Ulluni ningittakkaminik kittorartoortilluni, Aqqaluk Jensen Heilmannip aalisakkat tuusintillit annaasarpai. Taamaakkaluartorli imaani inuuneq nuannaaraa.

- Motoori unitsillugu immap nipaassusersuata uannik ulitsisarnera inuunermi misigisani nuannernersaavoq, Aqqaluk Jensen Heilmann eqqissisimasumik nipeqarluni oqarpoq.

Aalisartutut ilungersunartumik inuunermi saniatigut G-44-mi arsaattartuuvoq. Taakku imminut ataqatigiissinniaruminaappasissinnaapput – Aqqaluk Jensen Heilmannimulli piumassusermut pissusissamillu eqquutsitsinermut tamanna attuumavoq.

- Aallaqqaammut sakkortoqaaq. Sinimmik amigarsisarpunga, timikkullu tarnikkullu ilungersortarlunga. Piffissalli ingerlanerani taamatut inuusaaseq atiartulerpara. Ningittagassara sungiusariannginninni piareersartalerpara, nalunaaqutaq arfineq marlunnut sungiusariartarlunga, kingornalu aallarlunga unnuaq tamaat ningittakkerisarpunga. Tikikkaangama nalunaaquttap akunneri sisamat angullugit sinittarpunga, makeriarlungalu arpattarpunga, kingornalu angerlarlunga nalunaaquttap akunnerini marlussunni sineqqittarlunga. Taamatut ullut tamarmik ingerlasarput, Aqqaluk Jensen Heilmann oqaluttuarpoq.

Taamaakkaluartorli aalisarnermik arsaannermillu ulluinnaqarnermi piumassuseq kisimi naammanneq ajorpoq. Tamanna avatangiisinik paasinninnermik nalimmassarnermillu sanarfisaavoq. Taamaammallu sungiusaasoq Nukannguaq Zeeb arsaattartunut Qeqertarsuarmeersunut pingaaruteqarpoq.

Arsaqatigiit Qeqertarsuarmut uummatillit

Piumassutsip saniatigut sungiusaasoq Nukannguaq Zeeb aamma pingaaruteqarpoq. Nukannguaq Zeeb ilinniartitsisutut ilinniarsimavoq, perorsaanermillu aallaavilimmik sungiusaasutut periuseqarpoq, tamannalu ilaatigut piffissap sungiusarfiup aalisartunut nalimmassagaaneranik kinguneqarpoq.

- Arsaateqatigiinni aalisartut arlaqarput. Taamaammallu sungiusarneq taakku ulluinnarni inuunerannut naleqqussarniartarpara, Nukannguaq Zeeb nassuiaavoq, imalu ilassusiilluni:

- Sakkortuumik periuseqarlunga piumasannik naammassinnitsitsiniaasutut sungiusaasoorusunngilanga. Tapersersuerusuppuga – ingammik arsaattartunut Aqqaluttut ittunut.

Ullumikkut Nukannguaq Zeeb Islandimi najugaqarpoq, Qeqertarsuarmeersuuvorli. Aasat tamaasa angerlarluni arsaattartut sungiusariartarpai, taamaalillunilu arsaaneq illoqarfeeqqami aallunneqartuarpoq.

- Ilaqutariinnit aalisartuneersuuvunga, ataataga qatanngutigalu aalisartuullutillu piniartuupput. Qanoq ilungersunartigisumik inuuneqarnerat takunikuuara, qanoq aalisarnerup nunguttartigigai. Taamaammallu Aqqaluup arsaanermik aalisarnermillu peqateqatigiissitsilluarnera pikkunartuuvoq. Tulluusimaarutigeqaara, Nukannguaq Zeeb killitseqqajaasutut nipeqarluni oqarpoq.

- Tusarlugu nuannaajallappunga, Aqqaluk Jensen Heilmann nipikitsumik akivoq, Nukannguaq Zeebilu qungujullugu, allaanngilaq aatsaat taamak qanilaartigisumik imminnut oqaloqatigiittut.

Aallussilluartut taakku marluk imminnut ataqatigiinnerat ersarippoq – inuusuttoq ilinniartitaq, ilinniartitsisup tumiinik atuisoq. Piviusorli ilumoortumut qanippoq: Islandimi Qeqertarsuarmilu nikittaattumik najugaqartilluni Nukannguaq Zeebip kisimiilluni arsaqatigiit sungiusartarsinnaanngilai. Taamaammat Aqqaluk Jensen Heilmann, Nukannguup aallaqqatillugu holdlederiusarpoq. Nukannguup Aqqaluk aamma soraluaraa.

- Arsaattartut ingerlateqqikkusuppakka, arsarnerlu ima nuannaritigaara, allaat piffissakikkaluaqalunga sungiusarnernut akisussaaffeqarnissannut akuersillunga, Aqqaluk Jensen Heilmann oqarpoq.

Nukannguaq Zeebip Aqqaluk Jensen Heilmannillu suleqatigiinnerisa qanoq arsaqatigiit siuariartortinnerat, Qeqertarsuarmilu arsaattarnermik ingerlatsinerat malunnarpoq.

Asanninnerup unamminerullu akornanni

Imaani ullut sivisuuni ivigaasaaqqanilu arsaannerup ingermik inuk 21-nik ukiulik nalinginnaalluinnartoq ingerlatsivoq, allallu assigalugit asanninnermik kissaateqarpoq. Tamannalu Aqqaluk Jensen Heilmannip Juliane Eriksen Nielsenimik naapitsinermini nassaaraa. 

- Meeraagallarattali immitsinnut nalunngisaraagut. Taamani nukappiararujussuuvoq angisuujullunilu nukittooq, maannali qanilaarlunilu asannittorujuuvoq, Julianep Aqqaluk asarpasillugu qiviaatigalugu illalaarluni oqarpoq.

Oqitsuinnaanngilarli. Aqqaluk Jensen Heilamann ulluinnarni angumeriniagassarpassuaqarpoq. Piffissat ilaanni maqaasisarpoq. Aalisarnermummi arsaannerullu akornanni asanninnermut piffissarsiniapiloorsinnaasarpoq. Taamaakkaluartorli aappariit ulluinnarni periarfissaqartillutik imminnut piffissaqarfiginiartarput, taakkumi tamarmik ataqatigiissinnissaannut piumassuseq nukittuvoq.

- Taamaariarluni ajornakusoortarpoq, immitsinnullu maqaasisarpugut, aalisakkalli qaqinneqareeraangata, arsaannerlu naammassilluni, taava piffissaqarfigisarpara, Aqqaluk Jensen Heilmann oqaluttuarpoq.

Nuullu arsaattarfiata qattunertaani issiavoq nunatsinnilu arsamik pissartanngorniunnernik malinnaajuarluni. Aqqaluk arsaattoq malinnaaffigaa. Juliaanna tapersersuiartorluni Qeqertarsuarmit Nuummukarpoq. Tapersersuineralu pingaaruteqartorujussuuvoq.

- Maanngaqataanera pingaaruteqaqaaq, Aqqaluk Jensen Heilmann qungujulluni oqarpoq.

Taamaakkaluartorli Aqqaluk Jensen Heilmann arnaasisaariartorluni Nuummukanngilaq. Sammisaa ersarippoq. Naak ukioq manna – Nukannguaq Zeebip eqaatsumik periuserisaatut - arsaattut unamminerit nalaanni avataani sinissinnaasaraluartut qanilaarneq akisussaaffillu oqimaaqatigiissarpai. 

- Arsaqatikka Julianelu unammisaqattaarnerup ingerlanerani paarlakaallugit sineqatigisarpakka. Ullormi unammiffissami ilikka pisarnertut ilaginerusarpakka, anguniakkap ataqatigiinnerulli aallunnissaanut iluaqutaavoq. Aammali pitsaanerpaamik arsarumallunga eqqissisimaarnissara toqqissisimanissaralu pisariaqartittarlugit, oqarpoq.

Nuannaartorisaq inuppalaartoq

Aqqaluk Jensen Heilmann siusinnerusukkut nunatta nunanut allanut arsaattartuinut ilaavoq, ajoquserneratali kinguariartippaa. Maanna bruttotruppimut ilaavoq, anguniagaalu suli periarfissaavoq. Naallu aalisarneq inuunerani imartugaluartoq, oqummersat ningittakkallu kisiisa sammillugit inuuneq assigiiaarpallaassaaq.

- Arsartuaannarsimavunga, tallimanillu ukioqarallaramali nunanut allanut unammisartunut peqataanissaq sinnattorisimavara. Aalisarnerup eqqissisillungalu kiffaanngissuseqartippanga – arsaannerullu ataatsimoortuniitsittarpaanga. Taakku iluatsittumik ingerlaqatigiittariaqarput, taanna erseqqissaavoq.

G-44-mut sungiusaanerup saniatigut Nukannguaq Zeeb, nunanut allanut unammisartuni sungiusaasoqatigiinnut ilaasoq, Aqqalummut neriuuteqarluarpoq:

- Oktobarimi unammisartussat toqqarneqarpata Aqqaluup nunanut allanut unammisartunut ilannguteqinnissaa upperilluinnarpara.

Sungiusaasumut Nukannguaq Zeebimut piginnaanngorsaaneq teknikikkut piginnaasaannarnut tunnganngilaq – aammali arsaattussanik maligassiusinnaallutillu nunami imaannaanngitsunik atugassaqartitsisumi arsaannermik neriuuteqarnermik takutitsinissaq pingaaruteqarput. Piffissammi silami arsaaffiusinnaasut sivikipput, illoqarfiillu imminnut ungaseqaat, atortussallu killeqartorujussuullutik. Peqatigisaanik arsaattartut ulluinnarni sulineq, ilaquttat timersornerlu imminnut ataqatigiissinniartussaasarpaat.

- Maligassiuilluarpoq. Qeqertarsuarmi meeqqanut inuusuttunulliinnaanngitsoq, nunatsinnulli tamarmut. Aamma illoqarfeerannguameersuugaluarluni saniatigut ilungersunartumik aalisartuugaluarluni, tamanna naammassineqarsinnaasoq Aqqaluup takutippaa.

Sungiusaasup oqaasiisa Aqqaluk Jensen Heilmannip qasuttuilluni sulinerata qanoq maligassiuisuullunilu, illoqarfiup angerlarsimaffiup immallu qanoq sakkortutigisumik imminnut ataqatigiinnerat eqqaasitsissutigaa.

Talittarfimmut uteqqinneq

Maanna pissartanngorniunneq naammassivoq. Aqqaluk Jensen Heilmann Qeqertarsuup talittarfiani oqummersanik neqitsersueqqilerpoq. Nipaatsumik avatangerneqaqqavoq, pissartanngorniunnermilu pisut qaffakaaterusaarlugit.

G-44 pissartanngorniutivinnissamut anngunniuppoq, unammeqatini apparmilu illersuinera suli eqqaamavai. Nunanut allanut unammisartuunissamik takorluugaq aatsaat taama qanitsigilerpoq. Taamaakkaluartoq Aqqaluk Jensen Heilmannip immap sinaani kiserliorneq misigaa.

- Eqqumiippoq. Arsaqatigisartakkat sivisuumik pikkunartumillu ilagiinnavissimagaanni kisimeeqqilerneq kiserliornarpoq - misigisarli nuanneqaaq, Aqqaluk Jensen Heilmann imaanut avalannginnermini nipikitsumik oqarpoq.