Kalaallit Nunaat nunarsuarmi karatemi tusaamasaalerpoq: Lissi Ottosen EM-imi marloriarluni kuultinnappoq
Nuuk Shotokan Karate-do aamma Kalaallit Nunaat tamakkerlugu oqaluttuarisaanermi angusaqarluarsimanermik nalliuttorsiornissamut pissutissaqarput, klubbimi sungiusaasuuneq Lissi Ottosen Europami Shotokanimi pissartanngorniunnermi Kretami marloriarluni kuultinnappoq.
Assi: Nuuk Shotokan Karate-Do
Lissi Ottosen 64-inik ukiulik Europami Shotokanimi pissartanngorniunnermi Kretami ingerlanneqartumi karatemi marloriarluni kuultinnappoq:
- Peqataanermigut ajugaanermigullu Lissi Ottosenip Nuuk Shotokan Karate-Do siuarsaannarnagu aammali Europami Kalaallit Nunaat sinnerlugu aallartitaalluarpoq. Angusaasa takutippaat tunniusimaneq eqiasuillunilu suliniuteqarneq pissutigalugu nunat mikisut timersortarfissuarni tusaamasaalersinnaasut, Nuuk Shotokan Karate-Do tusagassiuutinut nalunaarummi allappoq.
Lissi qallunaat nunanut allanut unammisartuinut ilaavoq, Nuummili timersoqatigiiffik sinnerlugu unammeqataasarluni.
- Lissi Ottosen ukiorpassuarni timersoqatigiiffiup ilaasortaanut meeqqanullu maligassiuivoq, EM-imilu angusarissaarnera takorluukkat piviusunngorsinnaanerannik erseqqissaataavoq, nunarsuarmi suminngaanneeraluaraanni qanorluunniillu ukioqaraluaraanni, Nuuk Shotokan Karate-Do allappoq.
Kretami angusarissaareernerup kingorna Lissi Ottosen aamma Nuuk Shotokan Karate-do 2026-mi nunarsuarmi pissartanngorniunnissamut peqataanissartik pilersaarusiulereerpaat.
