Aasap qaangiutilernerani timiminnik aalatitsisorpassuit

Seqinnarissuarmi silami minguitsumi silaannarissumilu septembarip 13-ianni Nuummi Marathonip affaanut arpannissaq aallartimmat arpattussarpassuit aqquserngit ulikkaarsimavaat, – Runderful Nuuk aaqqissuisoralugu. Peqatigiiffiup taaguutaatut nuannisarnissamut piareersimasoqarpoq: Arpannermik, ataatsimoornermik pinngortitamillu attorneqarsimanngitsumik nuannarisaqartut, arpaqatitik naapittarpaat.

Ataatsimoorneq arpannermillu nuannarisaqarneq

Nuummi Marathonip affaanut ukioq manna arpannissaq aaqqissuisut tunniusimasut tallimat 28-nit 31-nut ukiullit – tassaasut Anna Moeslund, Rebekka Nygård Bak, Andreas Nygård Bak, Mads Christensen aamma Mie Skou Larsen – tamarmik Danmarkimit sorlaqartut ukiunilu pingasunit arfinilinnut Nuummi najugaqarsimasut aaqqissuisoralugit aaqqissuunneqarpoq. Arpattartut peqatigiiffiat Runderful Nuuk aqqutigalugu imminnut ilisarisimapput, ataatsimoorlutillu siullermeerlutik marathonip affaanut arpatsitsinissamut aaqqissuussillutik.

- Naak piffissarujussuarmik atuiffiugaluartoq ilungersunaraluartorlu marathonip affaanut arpannermik siullermeerluta aaqqissuussinerput nuannaarutigeqaarput, arpannissamik aningaasarsiornissaq siunertarinagu arpannermik aaqqissuussinermik suliaqartut oqaluttuarput.

Aatsaat taama amerlatigisut, najugaqavissut nunanillu allaneersut 180-it missaanniittut peqataanerisigut, nuannisarnissaq, nukissaqarnissaq ataatsimoornissarlu ullormi pisussatut qilanaarineqarput.

- Arpaqataasussat tamaasa naapinnissat – nunaqavissut nunanilu tamalaanneersut qilanaareqaarput. Taamaattumik ulloq nuannersumik, nukissaqarluarfiusumik ataatsimoorfiusumillu ingerlassasoq neriuutigalugulu ilimagaarput, aaqqissuisunit taama oqarput.

Arpaffissaq aaqqissuisut namminneq aqqutigiumasaattut ukioq manna aaqqissuunneqarpoq, kangerlummut, Akianut Sermitsiamullu alutornartunik isikkiveqarluni – Katuamit aallartillunilu apuuffissaqartumi aqqusaarneqassallutik Qaqortoq, Ilisimatusarfik, mittarfik aamma Qinngorput.

Aaqqissuussineq kajumissutsiminnik suleqataasunit aningaasaliisunillu tapersersorneqarluarpoq. Kajumissutsiminnik suleqataasut imermik imerfissanut immiisarlutillu, qungujulallutik arpaffissamik innersuussisarlutillu ersaartarlutillu assorooqqusisarput. Aningaasaliisut soorlu Garmin, Pisiffik, Grønlandsbanken aamma Katuaq ullup ingerlanneqarnissaanut piviusunngortitseqataapput. Aaqqissuussisunummi arpannerup isorartussusia kisimi eqqarsaatigineqarani ataatsimoornerli kinaassuserlu eqqarsaatigineqaramik.

- Ataatsimoornermik nukittorsaasinnaassalluta, timimik aalatitsisarnissamut inuulluataarnissamillu kajumissaarisinnaassalluta aamma Nuummi arpannermik timimillu aalatitsinermik soqutiginninnermut nukittorsaaqataasinnaassalluta neriuutigaarput, aaqqissuisunit taama oqarput. Inuiaat assigiinngitsut qulit ukioq manna arpatsitsinermut peqataammata, taakku aamma nuannaarutigaat.

Ilungersunartorsiornermit ingerlallualernermut

Arpattut akornanni seeqquni tikillugit aappaluttunik alersilik, 36-nik ukiulik Charlotte Bengstrøm qungujulaqaluni arpaqataavoq. Taanna Nuummi Marathonip affaanut ukioq manna arpaqataasorpassuarnut arpaqataavoq. Taanna Nuummut januaarimi nuuppoq, maannalu Nunatsinni illoqarfiit pingaarnersaat angerlarsimaffigilerlugu. Charlotte arpattartutut nutaajunngilaq. Sapaatip akunneri tamaasa marathonip affaanut arpattarnissani 2023-mili nammineq anguniagarilersimavaa – tassa 21,1 kilometerit ataannagit – sapaatip akunneri tamaasa arpattalerami.

- Ibiza-mi marathonip affaanut arpaqqaarninnit aallartippunga, tamatumalu kingorna sapaatip akunneri tamaasa taama isorartutigisumut arpattarnissara aalajangiullugu. Isorartuumut arpakkaangama nukittuutut ajoquserneqarsinnaanngitsutullu misigisarpunga. Timiga siumut ingerlatikkaangakku, qaqqat nunallu ilusai assigiinngitsut sanioqquallugit arpakkaangama, nunarsuaq tamaat sanioqquasutut misigisimasarpara. Isorartuumut arpakkaanni sorpassuarnik takusaqarnartarpoq, Charlotte eqqissisimasumik nipeqarluni oqarpoq.

Charlottemulli arpanneq taamaallaat isikkivinnut nukittussutsimullu attuumassuteqanngilaq – eqqarsartaatsikkulli aamma sungiusarnerulluni, inuunermini allanut atatillugu atorluartagaa.

- Arpanneq eqqarsartaatsikkut iluaqutigingaartarpara. Ajunngitsuliornerit ilaannikkut ilungersunarsinnaasartut eqqaasarpara. Pinertusaarnerli naggataatigut naammagisimaarlersitsisarpoq — ingammik 21,1 kilometerit naallugit arpakkaanni, taanna oqarpoq.

Anniaraluaraanniluunniit attassiinnarneq Charlottep kingullertigut misileraqaa.

- Aqqusinermi ajutoornermi seeqqora saamerleq ajoraluartumik ajoqusingaatsiarpara. Taamaammat aggustip sisamaaniilli sapaatip-akunneranut maratonip affaa arpassinnaasimanngilara, Charlotte Bengstrøm nikallungalluni oqaluttuarpoq.

Taamaammat Charlotte Nuummi Marathonip affaanut peqataanissaminut assut pissangavoq. Arpannermi anguniagaanut tunngaannarani – aammali piumassuseqarluarluni timimi qanoq nukittutigisinnaaneranik misilieraanissaanut tunngatillugu. Charlotte nalinginnaasumik piffissaq nakkutigalugu namminerlu rekordiliinissaq arpattartarpoq. Ullumikkulli allamik anguniagaqarpoq.

- Arpannermi nammineq angusarissaarnerujumallunga piffissaq aalajangersimasoq anguniagarisarpara, maannali angusarissaarnissara pinnagu arpalluartaleqqinnissara pingaarnerutippara, arpannerma naammassinissaa - tamanillu pingaarneq: nuannersumik misigisaqarnissara, qungujulalluni oqarpoq.

Unammillerpalaartuuneq imminut sunniuteqarpallaarsinnaasoq nammineq eqqaavaa.

- Unammillerninngupallassinnaavoq, sapinngisamik pitsaanerpaamik angusaqarnissap pingaartinneqarnera pissutigalugu avatangiisit nuannaarutiginninnissarlu puigorneqarsinnaalluni. Taamaammat arpannissaq manna immikkut ittuuvoq – arpanninni nuannisarnissara qilanaaraara, Charlotte Bengstrøm qungujulalluni oqarpoq.

Apuuffissamullu apuuppoq. Nukissaqarluarluni, sinngualaarlunilu – misigaluni arpalluaqqissinnaajartorluni. Charlottep oqaluttuaa taamaalilluni tamatsinnut eqqaasitsissutaavoq: Arpanneq sukkassusermut inissinnermullu tunngaannanngilaq, aammali kiffaanngissuseqarnermut, pinngortitamut timersoraannilu eqqarsaatikkut nukissaqarluarnermut tunngavoq. Immaqalu pingaarnerpaamik – timip nukittuup siumut ingerlatitsisup pingaartinnissaanut eqqaasitsissutaavoq.

Illoqarfik timersortoqarluartoq

Imminut unammillernissaq, ataatsimoornissaq seqinnisaarnissarluunniit anguniagarigaluaraanni Nuummi marathonip affaanut arpanneq inuit ataatsimoorlutik timersoqatigiinneranni susoqartarneranut assersuutaalluarpoq. Inuiaassutsit qulit. Arpattartut 180-it. Oqaluttuarpassuit – ataatsimoorlunilu Nuup ukiaalluni alianaannerani allorissaaqatigiinneq. Ulloq taanna illoqarfimmiut arpaqatigiipput. Pinngortitaq, uummaarissuseq nuannaarnerlu ataqatigiipput. Allornerit ataasiakkaarlugit. Uummatit tilleqatigiittut. Aqqut tamaat – 21,1 kilometerit.