U18 VM ASSAMMIK ARSARNERAT
Alaa - Arnat inuusuttut Argentina-mut unammilluarput
Presidents Cup-imi U18 arnat Kinami Chuzhouimi Kalaallit Nunaat Gruppe 3-mi unammeqaarneranni Argentinamut
ajorsaqqalaarput 22-19-mik, muminnermi naligeeriarlutik 8-8-mik.
Unamminerup immikkoortuani siullermi minutsit qulingiluat ingerlareersut Argentina ataaseraarpoq, taamaasinerani Kalaallit Nunaat pingasoraareerluni. Argentina qanilliartuaarpoq, 3-3-ermatali unammisut imminnut unammilluaqaat unamminermilu immikkoortoq siulleq pissanganartumik ingerlavoq.
Kalaallit isertitsisartut Argentina unammineranni
- Pilunnguaq Olsen Petersen- 12 isertitat
- Madeline Bjørnestad - 5 isertitat
- Arnannguaq Berthelsen - 1 isertitaq
- Amaunalik Møller - 1 isertitaq
Nunanut allanut unammisartut sungiusaasuat Victoria Budek Svendsen imatut naliliivoq:
- Kinesisk Taipai-imut unamminermi immikkoortoq siullermi Kalaallit arnartai inuusuttut imminnut pakatsissutiginertik mumisikkusuppaat takutitsilluarusullutik aalajangersimallutik. Kinesisk Taipai-mut unamminermi naammassiartuaarneratut Argentina-mut unamminermi immikkortoq siulleq ingerlappaat assersuineq pitsassuaq ingerlakkamikku. Uatsinnut tulluarnerusoq Argentina assersueriaaseqartoq unammivarput. Sulili ajornartorsiutigaarput saassussinermi isertitsisarnissaq.
Unamminermi minutsit 29-it ingerlareersut Argentinap arsartua nr. 5, Lopez, toqqaannartumik allagartamik aappaluttumik nittaaffigineqarpoq, tassani sakkortuumik Pilunnguaq Olsen Petersen assersuiffigigamiuk.
Unamminerup immikkoortuisa appaanni Argentina siuariartorpoq
Unamminerup immikkortup aappaa immikkortoq siulleq assigalu aallartinneqarpoq, 11-11 naligiiffiusup nalaa tikillugu, taamaasinerani Argentina sassasissumik assersuilernerani, taamaasillunilu 17-13 Argentina siuaqqalerluni.
Victoria Budek Svendsen nangippoq:
- Unamminerup immikkoortuata aappaani assersiulluarnerput ingerlatiinnarparput, kisiannilu minutsit 15-t ingerlareersut målinik sisamanit kinguarluta. Unamminerup sinnerani qanilliallattaraluarpagut, angunngitsoortarlugilli.
- Sulili tulluussimaarutigeqaakka niviaaluit tunniutiinnaratik akersuuttarmata, taavalu uani unamminermi arsarluarnerpaatut Pilunnguaq Olsen Petersen toqqarnerqarmat, tamannalu pissusissamisoortoq tulluusimaarutigeqaarput. Unamminerniit unamminernut siuariartortut malunnarpoq, sulilu pingasoriarluta unammisussaalluta. Tassani ineriartornerput ingerlatiinnassavarput, minnerpaamillu ataatsimik ajugaanertaqarsinnaasoq neriutigeqaarput. Victoria Budek Svendsen naggasiivoq.
Titarnerup killinganiittoq målinik paarsisunngorallartoq
Måliniittoq Jaliina Jakobsen Kinesisk Taipai.mut unamminermi assamigut ajoquserpoq, assaa sisamanik kilulerlugu mersortittariaqarlugu, ajoraluartumillu unamminerni sinneruttuni ilaasinnaajunnaarluni.
Kina-mut målmand-imik taartissamik aggersaanissaq ajornarsimammat, titarnerup killinganiittartoq Nadia Lundblad målmand-itut taartissamaatut sassartinneqarpoq. Taanna Futsal-imi målmand-iusareerami Nadia-mut nutaajunngilaq.
