Arfivik maassakinnerugami neriuminarneruvoq

Lone Nikolajsen Hansenip Kapisilinni illup aappaluttup silataani ingilluni Fairbanksimi Alaskamiittumi misigisani oqaluttuarai. 

Fairbanksimi Issittormiut Indianerillu nunarsuaq tamakkerlugu unammiuaarnerisa (WEIO) 64-issaat 2025-mi juulip 16-iannit 19-iannut ingerlanneqarpoq.

- Misigisaq nuannerluinnarpoq. Pakassumminneq kisiat pinnagu unammissutigineqartut allat misilinnikuunngilavut, Lone Nikolajsen Hansen oqarpoq, taannalu Marie Josefsen Ringstedimik aamma Sara Larsenimik, assassukkaminik tuniniaasumik angalaqateqarpoq.

WEIO-mi unammissutigineqartut 21-upput. Lone Nikolajsen Hansen aamma Marie Josefsen Ringsted unammissutigineqartunut ukununnga peqataapput: Pakassumminneq, Bench Reach, nutsuunneq, four man carry, Greased Pole Walk, nutsuunneq, tisaneq, aamma mattattullaqqinneqqusaanneq.

Unammiuaarnerit Four Man Carry-mik aallarnerneqarput, paasinarsillunilu angutit kisimik peqataaffigisinnaagaat. Arnani kisiartaallunga naammassivara, angutilli kisimik peqataaffigisinnaammassuk ujaminnatsinneqanngilanga. Peqataasunilli allanit ataqqineqarlualerlunga, Lone Nikolajsen Hansen oqaluttuarpoq, taannalu inunnit sisamanit 200,6 centimeterisut takitigisumut akiarneqarluni.

Ulu Walmart-imi pisiarineqartoq

Lone Nikolajsen Hansenip angerlaappai ujammit kuultit marluk ujamerlu siilvi ataaseq, pakassumminnermit ataaseq marlullullu qiterlerminnermit, taakkulu saniatigut mattattullaqqinnerpaanngorluni.

- Sukkaneqqisaalluni mattattornissamut uloqartussaagatta, taamaattumik Walmart-imut (Amerikamiut pisiniarfissuarnik ingerlatsiviannut, aaqq.) ulumik pisiniarpugut. Eqqaamasakka naapertorlugit 11 dollarinik akeqarpoq.

- Mattattornermik unamminermi peqataasut ilaat eqqissivillutik mattattoramik allallu usserniaannarllug oqummersisarlutik. Uagulli unammissutigaarput. Arfiviup mattaa itummatut annertussuseqarpoq, mattammillu maani sungiusimasatsinnit maassaqannginnerulluni, Lone Nikolajsen Hansen oqarpoq, taassumalu mattattugassani minutsi ataaseq sekundinilu 13-ini nerivaa.

Peqataasut taakku marluk aamma peqataaffigaat aalisakkamik tisaneq, aalisakkallu tisaneqartut qanoq isikkoqarnerat tisanermilu sukkassuseq ajugaanissanut aalajangiisuullutik.

- Tamanna taamaatiinnarparput. Puisimik pilanneq aamma unammissutigineqarpoq. Tamanna pikkoriffigigaanni aamma misilinneqarsinnaagaluarpoq. Mattattorluni sukkaneqqusaanneq, aalisakkamik tisaneq aamma puisimik pilanneq kulturikkut unammiuaarnerupput, arnanit angutinillu naligiimmik peqataaffigineqartartut, Lone Nikolajsen Hansen nassuiaavoq.

Lone Nikolajsen Hansenip oqaatigaa, unammeqataasut Nunatsinni Issittormiut unammisarnerannit unammillernerusartut. Nunatsinni peqataasut tapersersuillutillu qiimmassaqatigiittarput pitsaanerusumillu angusaqarnissamut siunnersuutissaqarluartarlutik.

Ataaseq qanoq iliornissaanik siunnersorakku nuannaartorujussuuvoq. Alaskami unamminermi tamarmik imminnut unamminissaat nalinginnaavoq, Lone Nikolajsen Hansen, siunissami peqataaqqikkusuttoq, oqarpoq.

- Maani unammisaqattaarnerit aalajangersimasumik ingerlanneqartarput. WEIO-mi unammissutigineqartartut ukiut tamaasa allanngortinneqartarput, assersuutigalugu pakassumminnermut taarsiullugu aarrup saarnganik nutsoruuttoqarsinnaasarluni. Unammissutigineqartartut allanngorartinnerisigut unammisarnerit uumassuseqarnerulersinneqartarput.

- Angusakka illersorusukkakkit. Imaassinnaagami tullianik arnanut Four Man Carry-mi ujaminnattoqarsinnaassasoq, oqarpoq.

Utoqqarnut akeqanngitsut

Lone Nikolajsen Hansen angalaqataalu illoqarfimmiunit unammeqataasunillu tikilluaqquneqarluaqaat.

- Ilaat inunnik Nunatsinneersunik takusimanngisaannaramik. Sara oqaluttuarpoq inummik Nunatsinneersumik ilassinnikkusuttumit saaffigineqarsimalluni. Qaanaarmiumik Fairbanksimit 21 kilometerinik avannarpasinnerusumi najugalimmik aamma naapitsivugut, oqaluttuarpoq.

WEIO ishockey-imik unammisarfissuarmi ingerlanneqarpoq. Unammiuaarnerit saniatigut 60-it sinneqartunik tuniniaaveqarpoq, tamakkunani ilaatigut tuniniarneqarlutik sanalukkat aamma assassukkat.

Sara Larsenip tuniniaaviani ilaatigut arnat annoraavi, umimmaat qiviui nammineq qissisat assassukkallu allat tuniniarneqarput.

- Tuniniaavinni tuniniarneqartut akisupput. Aarrup niaquata saarnga kusanartoq takuara, kisianni 600 dollarinik akeqarpoq. Umimmaallu qiviui 28 gramit maani 50 gramit akiisa assigaat. Immaqa akisuumik nioqquteqarsinnaapput tuniniarneqartut ikippallaarmata. Naluara. Akerlianik utoqqartaminnut isumassuilluartuupput. Utoqqaat akeqanngitsumik isersinnaapput, akeqanngitsumillu kaffillerfigineqarlutillu nerisinnaassarlutik, oqaluttuarpoq.

Lone Nikolajsen Hansenip WEIO-mut peqataasinnaasimanertik nuannaarutigeqaa. Arctic Winter Gamesimi siusinnerusukkut timersoqataalluni peqataasarsimavoq Nuummilu najugaqarnermini crossfittertartutut nukittuujusimalluni.

- Nunaqarfimmi najugaqartunut timigissarnermut periarfissat assigiinngillat, piumagaannili timigissartoqarsinnaalluni. 

- Peqataanera iluaqutigisorujussuuara. Kinaassutsinnut nakussatsissutigaara inuttullu nukittunerulerlunga. Maani Nunatsinni oqaatsivut attatiinnarsimavavut. Tasamani oqaatsitik annaasimavaat, kulturimilli ingerlatsinerat nukittulluni, oqarpoq.