Arnat inuusuttut Ikerasammeersut Two Foot High Kick-imi ajugaasut
Timersortartut inuit pinnguaataannik pissartanngorniuttut Qaqortumi timersortarfimmi uani sapaatip akunnerani takussaapput. Arnat inuusuttut Ikerasammeersut immikkut maluginiagassaapput, taakkumi arnani unamminermi Two Foot High Kick-imi ataasinngormat ingerlalluarput.
Randi Z. Sigurdsen Ikerasammeersoq Two Foot High Kick-imi ajugavoq.
Poul Hard
Inuit pinnguaataannik pissartanngorniunnerit ataasinngormat aallartimmata Two Foot High Kick unammissutigineqarpoq.
Unamminermi tassani unammisut — amerlanertigut arsaaqqamik imaluunniit amimik nivingasumik— isikkatik marluk atorlugit natermit nivingasoq isikkaminnik attorniarlugu pissillutik unammissarput. Isikkatillu marluk atorlugit natermut nakkartitsinatik tuttarlutik.
Arnat inuusuttut pingasut, Randi Z. Sigurdsen, Majka Qvist kiisalu Kiva Trolle ataasinngormat ajugaapput. Tassani Randi Z. Sigurdsen ajugaavoq, Majka Qvist tulliulluni kiisalu Kiva Trolle arnani ajugaasuni normu pingajunngorluni.
Angutit inuusuttut Nuummeersoq, Ilulissaneersoq Ukkusissaneersorlu aamma Two Foot High Kick-imi angutini ajugaapput. Tassani Lars Muumu Jeremiassen Nuummeersoq, Abia Zeeb kiisalu Inunnguaq Amossen tulleriillutik ajugaapput.
Arfininngorpat tungaanut unammersuarnerit
Arctic Sportsimi nunatsinni pisortatigoortumik pissartanngorniunnerit 122-init peqataaffigineqarpoq.
Ullumikkut triple jump, fingerpull kiisalu headpull unammissutigineqassapput.
Unamminermi inernerit Arctic Sports Greenlandip Facebookiani aamma Youtubemi takuneqarsinnaapput.
