KL

DK

Grothip assammik arsartarnermi suliaqarnini annertusigaa

Angutit assammik arsarlutik nunanut allanut unammisartut sungiusaasuat Johannes Groth 2025-mi januaarip aallaqqaataaniit ineriartortitsinermut siunnersortinngorpoq. Angut misilittagaqarluartoq taamaalilluni pilersaarutit ineriartortitassallu naapertorlugit suliassanik arlalinnik akisussaaffeqalissaaq.

Nunanut allanut unammisartunut sungiusaasoq Johannes Groth assammik arsartartut kattuffianni TAAK-imi ineriartortitsinermut siunnersortinngussaaq. Assammik arsarnerup ineriartortinnissaa inuuniutaalersinnaanissaalu periusissiornikkut anguniassavaa.
KASSAALUK KRISTENSEN
Digitalredaktøri
Saqqummersinneqarpoq

Assammik arsartartut kattuffiat, TAAK, nutaamik isumaqatigiissusiornermigut nukittorsaavoq, tassani angutit nunanut allanut unammisartuisa sungiusaasuat, Johannes Groth, 2025-mi januaarip aallaqqaataanit assammik arsartartut kattuffianni ineriartortitsinermut siunnersortitut atorfinippoq. Tamanna kattuffiup ineriartortinneqarnerani Kalaallit Nunaannilu assammik arsartartut inuussutissarsiutitut ingerlalerneranni pingaarutilittut alloriarneruvoq, kattuffik tusagassiuutinut nalunaarummi allappoq.

- Johannes Groth-ip angutini nunanut allanut unammisartunut annertuumik

sunniuteqarsimavoq, aammalu atorfinitsinneratigut suleqatigiinnissarput nukittorsarnissaa

qilanaaraarput. Suleqatigiinnissarput aaqqissuussinerullu ineriartortinnissaa

pingaarutilimmik inissisimassaaq, TAAK-imi siulittaasoq Carsten Olsen oqarpoq.

Periusissiorneq, pilersaarusiorneq ineriartortitsinerlu

Johannes Groth angutit nunanut allanut unammisartuinut sungiusaasuuginnassaaq. Nunanulli allanut unammisartunut sungiusaasuunerup saniatigut aamma kattuffimmi ineriartortitsinermut siunnersortinngussaaq, tassanilu assammik arsarnermi ineriartortitsinermut tunngasunik suliassaqassalluni.

Groth ineriartortitsinermut siunnersortitut kommunit timersoqatigiiffiillu suleqatigalugit nuna tamakkerlugu ataatsimiinnerit pilersaarusiornissaannik ataqatigiissarnissaannillu suliaqartussaavoq. Suleqatissanik aningaasaliisunillu attaveqarnermik ineriartortitsissaaq. Taamatuttaaq avammut attaveqarnermik nukittorsaaqataassaaq.

Nunanut allanut unammisartunut sungiusaasoq suliassani nutaat pillugit ima oqarpoq:

- TAAK-imi suliaqarninnik ineriartortitsinissannut qilanaarpunga, kalaallini assammik arsarnermik assigiinngitsorpassuartigut nukittorsaallunga. Suliassaq pissanganarpoq, aammalu kommuninik, klubbinnik aamma sponsorerinik suleqateqarluni suleqatigiinnerit nukittorsarnissaannut qilanaarpunga.

TAAK-ip Johannes Grothimik suleqateqarnissamut pissangagalugulu assammik arsarnerup nunatsinni ineriartortinneqarnissaa – isikkivinni tamani – suleqatigiissutigissallugu qilanaaraa, taama oqarpoq.

taak timersorneq håndbold sport johannes groth

ATORFIIT Se alle jobs

Powered by Labrador CMS