Niviarsissat assammik arsartartut Kinamukalersut: Upperiuminaappoq
Niviarsissat U18-it assammik arsarlutik nunanut allanut unammisartut ilarpassui taama eqqarsarsimassapput.
Nunanut allanut unammisartut Pilunnguaq Olsen Petersen aamma Madeline Bjørnestad.
Assiliisoq: Knud Fl. Larsen
18-inik ukiullit Pilunnguaq Olsen Petersenip aamma Madeline Bjørnestadip Københavnimiit ataasinngornermi unnukkut timmisartumut ilaallutik Kinamut ungasissumut angalanissartik takorloorsinnaanngilaat. Taakku Kinap illoqarfiisa ilaannut millionilikkuutaanik inulimmut Chuzhoumut, nunanut allanut unammisartut U18-it nunarsuarmi pissartanngorniunnermut peqataajartulerput.
Skærbækcenterimi Sønderjyllandimiittumi sungiusaqatigiinnerup naammasseqqammernerani, tassa tallimanngormat sungiusarluni unamminerup kingorna assammik arsartartut taakku marluk oqaloqatigaavut.
Nunanut allanut unammisartunut sungiusaasoq Victoria Budek Svendsen.
Assiliisoq: Knud Fl. Larsen
Angusaqarluarusuttut
Namminneq ilitillu sapinngisamik piareersarluarnerpaasimallutik oqarput.
Pilunnguaq Olsen Petersen Sverigemi Malmømi najugalik København Håndbold Talentimi unammisartuuvoq. SAK-mi GSS-imilu unammisartuusimavoq qaammatinilu kingullerni sungiusartorujussuulluni.
- Annertuunik takorluugaqarpunga. Kinami tamaviaassaagut. Ajugaasinnaagutta marloriarlutaluunniit torraassaqaaq. Assammik arsarneq siunissarlu eqqarsaatigigaangakkit Danmarkimi ligami unammisartunngornissaq takorloortarpara.
Pilunnguaq Københavnimi Niels Brock Handelsskolemi ilinniartuuvoq.
Madeline Bjørnestad Furesø Håndbold Klubimi arsartartuuvoq. Ukiorpassuarni Nuummi najugaqarsimavoq ilinniarnertuunngoqqammerlunilu. Piffissami kingullermi ullormut marloriarluni sungiusartarpoq.
- Uangattaaq assammik arsartartutut annertuunik takorluugaqarpunga, tassa assammik arsarnermi ligami nunanullu allanut unammisartuunissaq.
Marluullutik unammillerneqarneq nuannaraat, taamaaliornermimi aatsaat siumukarsinnaallutillu eqqortumut ingerlasinnaallutik isumaqarput.
Aamma qularissanngilaat Kinami unammilligassanik nalaataqarnissartik, tassanimi unammisassat sakkortulluinnartuupput.
Pilunnguaq isertitseriartoq.
Assiliisoq: Knud Fl. Larsen
Kinamiit attaveqarneq
Unamminerit inerneri, minnerunngitsumik Kalaallit Nunaata unammineri, qanoq nalunaarutigineqartassanersut suli ilisimaneqanngitsut Skærbækimi sungiusarnermi nunanut allanut unammisartunut sungiusaasoq Victoria Budek Svendsen oqarpoq.
- Chuzhoumut apuukkatta tamanna paasissavarput, KAAK Timersoqatigiit Assammik Arsartartut Kattuffiata Facebookikkut quppernerani nalunaarutigiumaarparput.
Victoria Budek Svendsenip Chuzhoumut ungasissumut angalanissani annilaangaginngilaa.
- Puerto Ricomut anngunniulluni unammiartoratta ajorneruvoq, nunanut allanut unammisartunut sungiusaasoq qungujulluni oqarpoq.
Madaline isertitseriartoq.
Assiliisoq: Knud Fl. Larsen
