Nunatsinni takisuumik arpattartup ujaminnannissani angunianngilaa - imminulli naniniarpoq

Nittaalat isugutattut Orlap kiinaa kiaguttoq tuffigisarpaat. Uisorerpoq.

Aqqusinermi apummik qallersimasumi allorneri tamaasa aput arpaataasa HOKA-t ataani qeraarpalaartarpoq. Allorartarneri unissanatik tulleriiaaginnavipput.

Alloqqiinnarnissaq ajornanngippasingaarmat Orlap anguniagaa annertooq puigortuusinarpoq.

Maajip ingerlanerani 3500 kilometerinik isorartussusilimmik arpannissamik anguniagaqarnermik aallartippoq, maannali allanngorpoq. Orlap maajip aallaqqaataani aallartilluarluni 103 kilometerit arpareerai ullup aappassaani timaa piumajunnaarpoq. Anguniakkani allanngortittariaqarpaa, maannalu maajip ingerlanerani timimi pisinnaasaata killissaa malillugu sapinngisaminik kilometerit angusinnaasami arpannissaat anguniagaalerpoq. Imminut ilikkarumalluni.

Ullup aappassaani anguniakkaminik allanngortitsisariaqarnera Orlamut oqittuinnaanngilaq:

- PIareersarlunga piffissarujussuaq atorpara. Inuit pakatsissappat? Aningaasaliisukka qanoq oqarfigissavakka? Naammattunik nukissaqannginnera ajorsarnertut uannut misinnarpoq, oqaluttuarpoq. Taamatuttaarli 3500 kilometerinik isorartussusilimmik arpannissap iperarnera Orlamut aamma oqiliallaataavoq. Maanna anguniagaajuaannartoq ukkatarisinnaalerpaa. Nammineq killissami nikisinnissaat. Eqqarsartaatsini qanoq innersoq paasiniarlugu pulaffiginissaa, sumullu killissinnaanerluni:

- Aallaqqaammut oqimaatsotujussuarmik nammataqartutut misigivunga. Maajimi anguniagara allanngortikkakku nammatara oqilivoq.

Pitsaanerusinnaasut

Orlap maajimi anguniagaa inuit ilaasa isumassaqartinngissinnaavaat. Arlallit isumassarsiorfigisinnaavaat. Amerlanerpaat ajasoornaringaatsiassavaat. Orlaliuna sooq taamarsuaq anguniagaqartartoq? Tamanna Orlap imaaliallaannaq akisinnaanngilaa.

Sooq taama isorartutigisumik arpattarnersoq aperiganni ima akivoq:

- Naluara. Arpanneq nuannarerpianngilara. Nuanniiginngilara, kisianni pikkunaagaara. Sooq taama isorartutigisumik arpattarneranut akissutit ilaat immaqa Orlap assaata saamerliup tunuani takuneqarsinnaavoq.

Oqaatsit marluk, piumassuseq imminullu piumaffigineq takujuaannarsinnaaniassammagit pilikki atorlugu amianut kakiorneqarsimapput. Piumassuseq ataatigut titarlugu allinngorlugu kakiorneqarsimavoq. Imminut piumaffigineq qullinngorlugu anninngorlugulu. Kajumissuseq ingerlatitsisuunngitsoq paasineqartariaqarpoq. Imminut piumaffigineq ingerlatitsisuuvoq. Ullaakkut makilluni arpaatit atinissaannut imminut piumaffigineq. Ingerlaannarnissamut imminut piumaffigineq. Nutaanik anguniagaqalertarnissaq anguniaasarnissarlu. Tamannarpiarlu, Orlap qaffasissunik anguniagaqarlunilu angunnittarnera, kalaalerpassuarnut isumassarsiorfiuvoq. Tamanna Orlap tulluusimaarutigaa:

- Aallaqqaammut imminuinnaq pivunga, iliuusikkali kalaallinut allanut sunniuteqarput, tamannalu tulluusimaarutigaara. Kalaallit Nunaanni pitsaanerusinnaavugut, tamannalu peqataaffigalugu ilimagaara. Tamatigummi annertuumik anguniagaqaraangama kalaallit allat immaqa pisinnaasorisaminniit annerusunik aamma anguniagaqalertarput.”

Ulluinnarsiut nutaaq

Orlamut uteqqeriarutta, ullumikkut arpannermini 20 kilometerit angoreerlugit oqariataarpoq:

- Spania eqqarsaatinniippoq. Maani nillerpoq, aasarnissaalu qilanaaraara. Aappaagu Spaniamiissaanga. Arpannanga eqqissisimaaginnarlunga. Orla 2020-mi maajimi 600 kilometerinik isorartutigisumik arpappoq. 2021-mi maajimi 1000 kilometerinit isorartunerusumik arpappoq. Tamatigut arpareeraangami qaammammi ataatsimi taama isorartutigisumik arpaqqinngisaannarniarluni arpaqatigisartakkani oqarfigisarpai.

Taamaakkaluartoq 202-mi maajimi 3500 kilometerinik isorartussusilimmik arpannissani angunialerpaa.

- Misilittariaqarpara. 2020-mi maajimi 600 kilometerinik isorartutigisumik arpareerlunga eqqarsarpunga: Suli arpannerusinnaavunga. 2021-mi maajimi 1000 kilometerinik isorartutigisumik arpareerlunga, aamma eqqarsarpunga: Suli arpannerusinnaavunga. Suliniut una 2021-mili eqqarsaatigilerpara, taamaammat arpanneq nuannarinngikkaluarlugu misiliinngikkuma peqqissimisussaavunga, oqaluttuarpoq nangillunilu:

- Qaammatip ataatsip ingerlanerani 3500 kilometerinik isorartutigisumik arpannissaq misileqqinnavianngilara. Maajimittaaq 2000 kilometerit angunavianngilakka, misilereerukkuli ingerlariaqqillungalu allamik ukkataqalersinnaavunga.

Kisiannimi maanna upperissavarput?

Orlap killissani nallerpaa, killissaami sumiippa? Orlaana maajip ingerlanerani 3500 kilometerinik isorartussusilimmik arpannissaminut nukissaqanngitsoq, imaluunniinuna tamanna kialluunniit angusinnaanngikkaa? Orlap apeqqusiiuarnera malugineqarsinnaavoq. Unikkusunneq. Ingerlaannarusunneq.

- Uniinnartoqarsinnaanngilaq. Pinngitsoorneqarsinnaajunnaartarpoq. Isorartuumut arpattartut eqqarsartaatsikkut qasuneq pinngitsoorsinnaajunnaartarpaat. Nassuiaruminaappoq. Nuanniilliornermi nuannisartoqartarpoq.

Qaammatip ataatsip ingerlanerani 1000 kilometerinik isorartussusilimmik arpanneq Orlap ingasagiunnaarnikuuaa. Killissani qaangertartillugu ulluinnarsiutai allanngoriartorsimapput, oqaluttuarpoq. Soorlu taamaaliortarneranut akissutit ilaat tassanerpiaq nassaarineqarsinnaavoq. Inuttut pisinnaasat qaffattuarneri.

- Arpannikkut eqqarsartaatsikkut nukittunerulertarpunga. Ulluinnarni atorsinnaavara. Ulluinnarni suarsuit uuminarsinnaasut pitsaanerusumik anigorsinnaavakka. Imminut ilikkarnerunera immaqa annerusumik angusaqarnissannut atorsinnaavara. Innaallagisserisuuvunga, inuunerali tamaat innaallagisserisoorusunngilanga. Suli angusarpassuaqarnerorusuppunga, taamaammat arpanneq immaqa alloriarnerma tulleraat.

Imminut piumaffigalunilu allaniit piumaffigineqarneq.

- Toqqaanissara ajornakusoorpoq Orla 35 kilometerinik isorartutigisumik arpareerluni Arssarnerinit biilimini, arpattarnermini aqqutinnaarisartakkamini RAL-ip saavani uninngasumi, unikkallarnermini oqarpoq.

Timaa qasulluinnarpoq, isikkani anniarai. Uppatimini talerperlermi ajoqusersimalluni malugigamiuk, arpanneranilu avannerluni nillernera oqilisaataananilu apingaatsiarsimammat ullormut arpannissani ullaakkulli pissangagisimavaa.

Apummut tullaraangat isigai siaartarput, tamannalu ajoqusissutigisinnaavaa. Orlap Qinngorput tungaanut isigaluni kiassaat tamakkiisillugu kissassernermini sunnertisimavoq. Orla sivisuumik eqqarsareerluni ullormut 35 kilometerinik isorartutigisumik arpareerluni uninniarluni aalajangerpoq.

- Arpakkusunngikkaluarlunga arpattariaqarlunga misigivunga. Piviusumi taamaanngikkaluartoq unikkaluaruma kikkorpassuit pakatsisissallugit misigisimavunga. Unneqqarissaguma uninnissamik aalajangerneq pitsaanerpaagaluartoq imminut pakatsisissaanga. Nuannarinngilarali. Tunniutiinnarusunngilanga. Orla taarserneqarsinnaanngilaq. Unammineq arsarnermituulli minutsit 90-it qaangiuppata uninnavianngilaq.

Arpaannassanerluni uniinnassanerluniluunniit nammineq aalajangertussaavaa. Imminut assortoruusaartuarpoq. Orlali ullormut arpakkunnaaraluartoq maajimi anguniagaqarnera uninngilaq:

- Uninnavianngilanga. Ullut marluk qaangiuppata misileeqqissaanga. Timima piumajunnaarnera uggornaannarpoq.

Isumaanik ujartuisoq

Orla ullormut arpareerluni qasuersaarnerani sooq arpattarnersoq apereqqippara. Sooruna taama isorartutigisumik arpattartoq? Akissutaa taannaaginnarpoq. Naluaa, oqarpoq.

Immaqali akissummut taama katitigaatigisumut apeqqut ajornanngippallaarpoq. Immaqa ”sooq taamaattoqarneranik” apeqqummut akissut ikkussortakkatut ataavartumik, immaqalu naammassinngisaannartussamik, ikkussugassaavoq.

Aammali illuatungaanut saatinneqarsinnaavoq: Orla arpattanngikkuni taava kinaava? Nipaaqalunilu eqqissimalluinnartoq, akivoq. Arpattaramilu kinaava?

- Naluara, akivoq. Immaqa paasinngisaannassavara. Soorli taamaannera Orlamut immaqa pingaaruteqarpallaanngilaq. Annerusumik anguniagaqarpoq. Akissut pappiaqqamut allanneqarsinnaanngitsoq, kisiannili avaqqutiinnarsinnaanngisaa. Spaniami niut qaqiimianngualugit issiavissuarmi issiaarnissaq ajornannginnerungaatsiassagaluarpalluunniit.