Nuummiut tilluuttartut nunat tamalaat unammiuaarneranni peqataassapput

Nuummi Fight Club Nanormit tilluuttartut arlallit sapaatip-akunnerini makkunani Sverigemi nunat tamalaat tilluuttartut unammiuaarneranni King of the Ringimi peqataanissamut piareersarlutik sungiusarput.

King of the Ringimi nunanit assigiinngitsorpassuarneersut, ilaatigut Danmarkimeersut, Tuluit Nunaanneersut, Ukrainemeersut maannakkullu aamma Kalaallit Nunaanneersut peqataasussat 700-nit amerlanerupput.

Unammiuaarneq novembarip aallartinnerani ingerlanneqassaaq, tilluuttartullu arfinillit peqataanissaat timersoqatigiiffiup naatsorsuutigaa.

Sungiusarsuataartut

Sungiusaasoq Mahmoud Minaei Sermitsiamut taama oqarpoq:

- Maannakkut sungiusarsuataarpugut. Angutinik tallimanik arnamillu ataatsimik peqataatitsinissarput naatsorsuutigaarput, maannakkullu sapaatip-akunneranut tallimariarlutik arfinileriarlutilluunniit sungiusartarput, Mahmoud Menaei oqarpoq.

Timersoqatigiiffik King of the Ringimi peqataarngaassasoq oqarpoq:

Nunat tilluuttartugissaartut peqataassasut

- Nunat tilluuttartugissaartut soorlu Ukraine, Norge Danmarkilu peqataassapput.

- Pikkorissunik tilluuttartoqarpugut, neriuppungalu angusarissaassalluta.

Unammiuaarnermi tilluuttartut tamarmik immikkut pingasoriarlutik unammisinnaasut sungiusaasoq nassuiaavoq. Unamminerit ajugaaffigineqarsinnaapput ajorsarfigineqarsinnaallutilluunniit, ajorsaraannilu ingerlaqqittoqarneq ajorpoq.

King of the Ring novembarip aallaqqaataanit pingajuanut ingerlanneqassaaq.