KNR arnat pissartanngorniunnerannik TV-kkut aallakaatitsisannginnera pillugu:
Pilersaarusiornerit peqataasussakinneralu unammillernarput
Arnat arsarlutik nuna tamakkerlugu pissartanngorniukkaangata TV-kkut toqqaannartumik aallakaatinneqartannginnera pillugu arsartartoq misilittagaqarluartoq Arnaq Bourup Egede ilaatigut isornartorsiuivoq. Angutimmi pissartanngorniukkaangata TV-kkut toqqaannartumik isiginnaarneqarsinnaasarput. KNR maanna isornartorsiummut akissuteqarpoq.
Foto: KNR
TV ikikkaanni angutit isikkammi arsaallutik nuna tamakkerlugu pissartanngorniuttut takuneqarsinnaasarput - kisianni arnat pissartanngorniukkaangata isiginnaarneqarsinnaaneq ajorput.
KNR nassuiaavoq sooq:
KNR-ip TV-mi pisortaata, Mathias Davidsenip nassuiaatigaa kattuffiit pilersaarusiornerat attaveqaqatigiinnerallu unamminarsinnaasartut. KNR-ip ilanngullugu oqaatigaa ukioq manna arnat silami pissartanngorniunnissaannut aningaasanik aallakaatitsinermilu sulisussanik missingersuuteqarsimagaluarlutik.
Arnani peqataaniarlutik nalunaartukippallaartoq
Naak 2024-mi arnat silami pissartanngorniunnerisa aallakaatinnissaannut missingersuutinut ilanngunneqareeraluartoq aammalu ullunut suliffissanut aallakaatitsisussanik toqqaasoqareeraluartoq, pissartanngorniunnissaq piviusunngussanersoq nalornissutigineqarsimavoq, unammersuarnissap qanilliartorneranni peqataasussat ikippallaarmata. Ilaatigut eqqaaneqartarluni qulingiluakkaaginnarlutik unammissasut imaluunniit taamaatiinnarneqassasoq.
Mathias Davidsenip aamma oqaluttuaraa angutit ukioq manna unammersuarnissaat sapaatip akunneranik ataatsimik siuartinneqartoq.
- Arnat unammersuarnissaat angutillu unammersuarnissaat imminnut qanittuararsuanngormat atortunik Qeqertarsuarmut nassiussinissaq sulisullu Qeqertarsuarmut angalanissaat pisussaammata KAK ilisimatipparput arnat unammersuarnerat aallakaatissinnaanagu, Mathias Davidsen, KNR-imi TV-mi pisortaasoq Sermitsiamut oqarpoq.
2025-mut unammersuarnissamut nalunaarfissaq oktobarip ulluisa 25-ani pivoq, piffissaritinneqartorlu qaangiummat arnat silami unamminissaannut nalunaartut pingasuinnaapput, unammersuarneq pisortatigoortuusinnaajunnaarluni.
Ataqatigiissaarisoqarluarnissaa KNR-ip kissaatigaa
Unammersuaarnerit ataatsikkoortinneqalermata KNR-i pingaarnersiuisariaqalersimavoq. Arnat unammersuarnissaat Arctic Sportsikkut GM-ernissaata nalaani pivoq, tassanilu KNR-i pingaarnersiuilluni issittumi unammiuaarnerit aallakaatippaat.
- Arnat angutillu assigiimmik pineqarnissaat anguniarneqartuaannarpoq. GIF-mut KNR-miit kajumissaarutigineqarpoq kattuffiit GIF-mut ilaasortaasut kajumissaarneqassasut pissartanngorniunnissamut ullut siumut nalunaarutigineqartut allanngortinnaversaarneqartassasut allannguisoqassappallu piffissaalluartillugu nalunaartoqartassasoq, Mathias Davidsen allappoq.
