Qalipaatigissaartunik qitequtilersuineq

Meeqqat, inuusuttut inersimasullu arlallit qitequtinik Nuuk Shotokan Karate-do-mik nutaanik sapaatip-akunnerata siuliani qitequtitaartorput, Liv Molich tusagassiuutinut nalunaarummi ilisimatitsivoq.

Taakkunani ilaavoq, Sensei Bech Ottosen, taanna qiteqummik 4. dannimik pissarsivoq. Taanna ukiorpannik klubbimi qitequtiliisarpoq, aasaq aamma Kasper Dyrberg qernertumik qitequtinnalluni 3. gradimik pissarsivoq, B-licensilu aamma pissarsiaralugu. Joseph Malby 2. dannimik qitequtinnappoq, aamma B-licensinnalluni.

Qitequtitaartut

Qitequtilersuinerit qaqortumit aallartittarput, japanimiusut taaneqatarluni 10. kyu. Ukiut affakkaarlugit qitequtitaartoqarsinnaavoq, gradimik ataatsimik qaffalluni. 1. kyu pereeraanni sukkulaataasamik qitequtaartoqarsinnaavoq, kingorna qernertumik qitequtaariarluni dan-imik qitequtitaartoqarsinnaavoq.

- Aallussilluarnissaq pisariaqarpoq, nalunaaquttap akunnerpassuarni sungiusarluarneq pisariaqarluni. Qitequtitaarnissaq naatsorsuutigineqartuaannarsinnaanngilaq, aamma ukiorpassuit qaangiussinnaapput suli nutaamik qitequtitaartoqarani, Liv Molich allappoq.

Meeqqat nukarliit

Liv Molichip aamma paasissutissiissutigaa meeqqani nukarlerpaani nutaamik qitequtitaartut qulingiluanik ukioqartut. Taakku inersimasut peqatigalugit misilitsinnerminni takutitsilluarput.

- Ingammik Pilo Evaldsen qulingiluanik ukioqartoq maluginiagassaavoq, taassuma misilitsinnermini akunnattuunngiivilluni angusaqarluarpoq. Maanna 4. kyumik imminut taasinnaanngorpoq, meeqqat allat tallimat 11-13-it ukiullit assigalugit.

- Silas Dalsgaard 4. kyu-mik Pilotulli qitequtitaarpoq. Silasi kusanartumik qajannaatsumillu misilitsippoq. Qanittukkut meeqqat timersoqatigiiffianni sungiusaasutut ikiortaalerpoq, tallimanngornikkullu Nathali Malek Pour, maanna 4. kyu-tut taaneqarsinnaasoq, peqatigalugu meeqqat mikisut timersoqatigiiffianni ikiortaalluni.

Melanie Væggemose 1. kyunngorpoq, tullianimullu qernertumik qitequtitaarnissaq anguniarsinnaanngorlugu. Taanna siorna 3.g-eerpoq, misilitsittaqattaarneratalu nalaani karatemut misilitsinnissaminut nalimmassartussaasimalluni.

- Ilinniarnertuutut angusarissaarluni timersornissaminut nukissaqarsimanera kusanarpoq. Nasartaaqqammerpoq, ilaqutariiullutillu qitequtitaarmat ataatsimoorput.

Niviaq Heilmann 13-inik ukiulik siullermeerluni misilitsippoq, maannalu qitequtini qaqortoq sungaartumik taarsersinnaalerlugu.

- Misilitsinnermini takutitsilluarpoq, angusanilu pillugu pissarsitinneqarluni.

Karen-Lisbeth Hansen seeqqulussimavoq putugualu napisimalluni, kisianni nikallussutiginngilaa, Liv Molich allappoq.

- Akerlianik isikkammik isikkamillu igeriussinermut akiuunnermullu tunngatillugu ilinniarsimalluinnarpoq, takutippaalu 60-it sinnerlugit ukioqaraluarluni karatemik aallartittoqarsinnaasoq. Karen-Lisbeth qorsummik qitequteqarpoq, meeqqallu inersimasullu sisamat allat peqatigalugit 6. kyu-mut naammassivoq.

Meeqqat, inuusuttut inersimasut ilaqutaallu misilitsinnerup kingorna nereqatigiinnermut nuannersumut qaaqquneqarpoq, nuannisarput høvdingebolderlutillu.