Suleqatigiinneq ukiunik marlunnik Elite Sport Greenlandip sivitsorpaa
Grønlandsbankenip Elite Sport Greenlandillu (ESG) suleqatigiinnertik ingerlatiinnassavaat, tamannalu ukiuni tulliuttuni marlunni elitesportimut aningaasanik qulakkeerinnippoq.
Elite Sport Greenlandip GrønlandsBANKEN-illu suleqatigiinnertik sivitsorpaat.
Assiliisoqarfik
2013-imiilli Elite Sport Greenlandimut (ESG) Grønlandsbanken aningaasaliisuuvoq, maannalu suleqatigiinneq 2025-p naanissaata tungaanut sivitsorneqarpoq.
Tusagassiuutinut nalunaarummi aningaaserivik taama allappoq.
Nunani tamalaani timersortarnerup pitsaanerpaartaanut peqataanissaq siunertaralugu, nunani tamalaani Kalaallit timersortarnerisa siuarsarneqarnissaat ESG-p siunertaraa.
ESG-p siulittaasuata Nikolaj Christoffersenip sivitsuineq naammagisimaarutigaa:
- Kalaallit Nunaanni elitesportimik ineriartortitsinermik suliniuteqarnerput iluatsilluartoq GrønlandsBANKEN-imik suleqateqarnitta ingerlaannarnerata uppernarsarpaa. Periuserput inissaminiippoq, aamma ESG-p iluani, elitesportimik ingerlataqartut inuusuttullu pikkorissut akornanni ineriartorneq pitsaasoq takusinnaavarput, Nikolaj Christoffersen oqarpoq.
ESG-p sulinera Grønlandsbankenip nersualaarpaa:
- Kalaallit Nunaanni neriunaatilinnik aaamma elitesportimik ineriartortitsinermi ESG qitiusumik inissisimavoq, suliniutaallu pingaartippavut. Elitesportimik ingerlataqartunut neriunaatilinnillu ineriartortitsinermut periusissiaanni anguniakkat ersarissut takusinnaavagut, tamannalu suleqatigiinnitta ingerlaqqinneranut tunngaviulluinnarpoq, Aarlerinaatinik isumaginninnermut pisortaq Mads Reimer Andersen oqarpoq.