TAAK aningaasaataaruppoq
Timersoqatigiiffiit Assammik Arsartartut Kattuffiata nunanut allanut unammisartut tamarmik unammiuaarnernik unitsitsigallarnissaat nalunaarutigeqqammerpaa. Aningaasaqarnikkut ajornartorsiorneq pissutigalugu taama aalajangerput, ukioq mannalu unammiuaarnerpassuit ingerlanneqareersullu tamanna kattuffimmut annertuumik eqquivoq.
TAAK-ip aningaasaataarunnertik Facebookikkut nalunaarutigaa:
- Maannakkorpiaq TAAK-mi aningaasatigut inississimaneq peqqutigalugu, siulersuisut oqimaatsumik aaliangiisariaqarsimavoq.
U18 nivissat nunarsuatsinni Kinami augustip qaammataani pissartanngorniuutereerpata nunanut allanut unammisartut pilersaarutaagallartut unitsikkallarneqassasut, Facebookikkut nalunaarutigaa.
Aningaasarsiaqarani sulineq
- Nunanut allanut unammisartut sungiusaasui isumaqatigiilluareerlugit, aningaasaqarnerup aaqqinnissaata tungaanut akissarsitinneqassanngillat. Taamaakkaluartut suli TAAK-mut attuumassuteqassapput.
- Taamatut aaliangiineq aallaaveqarpoq 2023-mi pisorpassuarnut aningaasaqarnitsinnut sunniuteqarsimaneri.
TAAK-ip assammik arsartartuutitik sungiusaasullu kaammattorpaat klubbertik sinnerlugu sungiusarneq piareersaanerillu ingerlatiinnaqqullugit, taamaasillutik periarfissaqaleqqippat pilersaarutit aallarteqqissinnaaniassammata.
- Neriuppugut piffimmi oqimaaffiusumi paasinnilluarlusi tapersersuiumaartusi, TAAK taama nalunaarpoq.
