Nassuiaat: Hash meeqqanut ilungersunartorujussuarmik kinguneqarsinnaavoq
Cannabisi inerteqqutaajunnaarsinneqarpat pitsaaqutaasinnaasut aamma ajoqutaasinnaasut pillugit Innutaasut Peqqissusiannik Ilisimatusarfiup nassuiaasiaani erserpoq angajoqqaat meerartallit amerlasuut hashimik ajornartorsiuteqartartut. Hashimik akulikitsumik atuisarneq ilungersunartorujussuarmik kinguneqarsinnaavoq, pingaartumik meeqqanut aamma inuusuttunut, taakkumi qarasaat tamakkiisumik suli inerissimaneq ajormata.
Assiliisoq: Mads Claus Rasmussen/Ritzau Scanpix
2023-mi ukiakkut ataatsimiinnermi Inatsisartunut ilaasortaq Kristian Jeremiassen (IA) siunnersuuteqarpoq Kalaallit Nunaanni cannabisip inerteqqutaajunnaarsinneqarsinnaanerata iluaqutissartai ajoqutissartaalu pillugit nassuiaammik suliaqarnissamik Naalakkersuisut piumaffigineqassasut. Siunnersuut akuerineqarpoq, Naalakkersuisullu nassuiaat 2024-mi upernaakkut ataatsimiinnermi saqqummiutissavaat.
Cannabis inerteqqutaajunnaarsinneqarpat iluaqutissartai ajoqutissartaalu pillugit nassuiaammi erserpoq angajoqqaat meerartallit amerlasuut hashimik ajornartorsiuteqartartut.
Allorfiup ukiumoortumik nalunaarusiaani allassimavoq innuttaasorpassuit 18-it inorlugit ukiulinnik meerartaqartut.
Katsorsarneqartut 27 procentii ataatsimik marlunnilluunniit angerlarsimaffimminni najugalinnik meeraqarput, 10 procentiilu pingasunik amerlanerusunilluunniit meeraqarlutik.
Aammattaaq ikiaroornartunik atornerluineq ilaqutariinni ajornartorsiutaagajuppoq. 2024-mi katsorsarneqartut 28 procentiisa angajoqqaavi ikiaroornartumik atornerluisuupput, 45 procentiilu assingusumik ajornartorsiutilinnik qatannguteqarlutik.
Kingunerit pitsaanngitsut annikitsutut isigineqartartut
Innutaasut Peqqissusiannik Ilisimatusarfiup nassuiaataa naapertorlugu hashimik akulikitsumik atuinerup kinguneri pitsaanngitsut annikitsutut isigineqartarput.
- Hashimik atuinerup pitsaanngitsumik kingunerisartagai annikitsutut isigineqaqqajaasarput. Hashimik akulikitsumik atuisarneq ilungersunartorujussuarmik kinguneqarsinnaavoq, pingaartumik meeqqanut aamma inuusuttunut, taakku qarasaat tamakkiisumik suli inerissimaneq ajormata. Allaat sivikitsumik atuinerit tarnikkut nappaateqalersitsisinnaapput, soorlu cannabisi pissutigalugu tarnikkut peruluuteqalerneq aamma annilaanganeq, pingaartumik inuusuttut taama eqqorneqarnissaminnut qaninnerullutik.
- Sivisuumik atuinerup ilikkarniarnermik piginnaasat aamma eqqaamasinnaassuseq pitsaanngitsumik sunnertarpai. Inuusuttut hashimik siusissukkut atuilersimasut atuarunnaaratarsinnaanerat aamma annertuneruvoq.
Kalaallit inuusuttut Danmarkimi inuusuttunut naleqqiullugit aanngajaarniutinik soorlu hashimik naamaarnermillu atuinerusarput, angajoqqaallu ikiaroortartuuppata atornerluinissamut marloriaammik navianartorsiornerusarput.
