Pinnguaatiniit YouTubemut: Taamaammat 7. klassini atuartut tuluttut ingerlalluarput
Digitalikkut atuarneq, inuit attaveqatigiittarfii pinnguaatillu atuartut tuluttut ingerlalluarnerannut peqqutaaqataasinnaasut, Ilinniartitaanermi Aqutsisoqarfimmi qallunaatut, tuluttut IT-lerinermullu siunnersorti oqaluttuarpoq.
Foto: Tôrtia Reimer-Johansen
Meeqqat atuarfiini atuartut 7. klassi atuarfimmi tuluttut ingerlalluarput. Tamanna Atuarfiit ataatsimoorlutik Pitsaassuseq pillugu nalunarutaanni allassimavoq. Alloriarfimmi tuluttut misilitsinnerit nuna tamakkerlugu naammassisat eqqortut procentinngorlugit 84-upput.
Tuluttut angusarissaarnermut suna peqqutaava? Sooq tuluttut atuartut ingerlalluarnersut Ilinniartitaanermut aqutsisoqarfiup misissuisimanermut takussutissaateqanngilaq, taamaakkaluartorli atuarfeqarnermut siunnersorti, Sigurs Kastrup Solvig peqqutaasinnaasunik oqaaseqarpoq
- Siullermik COVID-19-ip nunarsuarmi tuniluunnerata nalaani tamatumalu kingorna pissutaasimasinnaavoq. Tuniluunnerup nalaani ilinniartitsinerup annersaa internetikkut pisarpoq, tamatumalu kingunerisaanik atuartut amerlanertigut atortorissaarutit atortullu tuluttut atuartinneqartarput. Tamanna oqaatsitigut piginnaanerannut pitsanngorsaataasimasinnaaviq, Sigurd Kastrup Solvig Sermitsiamut oqarpoq.
Youtube
COVID-19-ip tuniluunnerata nalaani aneqqusaanngiffiup nalaani atuartut aamma Youtubekkut isiginnaartagaat tuluttut oqaaseqartuupput.
- Maluginiakkatta aappaat tassaavoq aneqqusaanngiffiup nalaani atuartorpassuit Youtubekkut isiginnaartarsimasut, tassani isiginnaartagaat amerlanerpaartaat tuluttut oqaluttuupput. Tassani oqaatsinik paasinnittariaasaat atuisariaasaallu pitsaasumik pitsanngoriaateqarsimapput.
- Pingajuattut maluginiagaraarput atuartut amerlasuut ullut tamaasa imminnut tuluttut oqaluuttartut, soorlu internetsikkut spillernerni oqaatsit tuluttut atorneqakkajuttut. Inuit attaveqaqatigiittarfiini aamma tuluttut atuisoqarpoq, atuartut peqataaffigisaannik.
- Atuartut imminnut tuluttut oqaluuttarput, soorlu internetsikkut imaluunniit anitsiarfinni, Sigurd Kastrup Solvig Sermitsiamut oqarpoq.
Ilinniarfinnut piumasaqaatit qaffassinnaasut
Ilinniartitsisunngorniaraanni matematikkimi tuluttuumilu angusaqarsimanermut piumasaqaatit D/4-miipput. Tuluttut qaffasissumik angusaqarsimaneq ilinniartitsisunngorniarnermi piumasaqaataanani. Piumasaqaatilli eqqartorneqaqqeriaannaasut, Sara Skifte Lynge, Ilinniarfissuarmi immikkoortortami aqutsisoq oqarpoq.
- Aammattaaq oqaatigisinnaavarput atuaqqissaaqatigiinnermut najoqqutassiat allanngortinneqarnissaat eqqarsaatigineqartoq, taamaattumillu immaqa aamma atuaqqissaaqatigineqarnissamut piumasaqaatit allanngortinneqarsinnaallutik.
