Biilini ilaasoq aalakoortoq ajutoornerup kingorna unnerluutigineqartoq
Ilulissani pingasunngornerup unnuaani aqqusinermi angallannermi ajutoortoqarmat biilimi ilaasut ilaat unnerluutigineqarpoq.
Assiliisoq: Leiff Josefsen
Ilulissani aqqusinermi angallannermi nalinginnaanngitsumik pingasunngornerup unnuaani nal. 00.38 ajutoortoqarsimasoq Kalaallit Nunaani Politiiniit Jeppe Andsager paasissutissiivoq.
Kunngarsuup eqqaani biilit tallimanik ilaasulik toqqavimmut aporput.
Politiit misissuinerat killisiuinerallu naapertorlugu biilimi ilaasup aquut ingerlanerup nalaani tigusimavaa tamannalu ajutoornermik kinguneqarsimavoq.
Ilaasoq imigassartorsimalluni allagartaqarnanilu biilersimasutullu unnerluutigineqarpoq:
- Ilaasup aquut tiguguniuk taava biilimik aquttunngussaaq, Jeppe Andsager biilimi ilaasoq sooq unnerluutigineqarnersoq taama nassuiarpaa.
Biilimik ingerlatitsisoq angutaavoq 48-nik ukiulik, unnerluutigineqartorlu arnaavoq 37-nik ukiulik.
Inuit pingasut sinneri biilimi ilaasut pisup kingorna ajoqusersimasunut nakorsiartarfiliaanneqarput.
