Trump: Allatut ajornartumik Danmarkip Kalaallit Nunaannik tigusitittariaqarpaatigut
PIngasunngormat Donald Trumpip Kalaallit Nunaata USA-p naalagaaffittut isumannaatsuuneranut pisariaqarneranik oqariartuutini uteqqippaa. Danmarkip tigusitittariaqarpaatigut, Trump ilaatigut oqarpoq.
- Kalaallit Nunaat piginngikkutsigu naalagaaffittut pitsaasumik isumannaatsuusinnaanngilagut, Trump aammaarluni Reutersimi tusagassiortumut oqarpoq
Assi: Mandel Ngan/AFP/Ritzau Scanpix
Marlunngornermi unnukkaa USA-p Kalaallit Nunaannut tikeraanissamini Nuup Sisimiullu ilaatittussaanerannit taamaalalat Pituffik Space Basemut tikeraarnissamut annikillisippaa.
Præsident Donald Trumpilli pingasunngornermi marloriarluni USA-p Kalaallit Nunaannik tigusisariaqarneranik oqaaseqaqqinnermini, aallartitaqarnikkut tatisinerminik annikillisaanissamik eqqarsanngilaq.
Amerikamiut Kalaallit Nunaannik tigusinerat nammineq takusinnaasani malillugit USA-p isumannaallisarneranut pingaaruteqartoq, præsidenti pingasunngornermi unnukkut oqarpoq.
- Kalaallit Nunaat piginngikkutsigu naalagaaffittut pitsaasumik isumannaatsuusinnaanngilagut, Trump aammaarluni Reutersimi tusagassiortumut oqarpoq.
DR-ittaaq Trumpip unnukkut oqaaseqarnera oqaaseqarneranik ilanngutassiaq tannerusoq aallakaatippaa.
Tassanilu USA-p pisariaqartuusorisani iliuuserissagai præsidenti ilanngullugu oqarpoq. Tamatumali qanoq paasisariaqarnera itisilinngilaa.
- Iliuuserisariaqarsinnaasagut tamakkerlugit iliuuseqassaagut, taanna oqarpoq.
- Kalaallit Nunaat pisariaqartipparput. Kalaallit Nunaannik tigusinissarput nunarsuup pisariaqartippaa. Aamma Danmarkip. Allatut ajornartumik Kalaallit Nunaannik tigusitittariaqarpaatigut.
Trumpi pingasunngornermi siusinnerusukkut Kalaallit Nunaat oqaluuseraa, tassani præsidenti podcastimik aallakkaatitassiortumik Vince Coglianesemik apersorneqarluni Kalaallit Nunaannik USA-mut ilanngutitsinissaminik anguniakkani oqaasertalerpaa.
- Oqaatiginissaa nuannarinngikkaluarpara, Kalaallilli Nunaat allatut ajornartumik pigisariaqarparput, taanna oqarpoq.
USA-p vicepræsidentia J. D. Vance nulialu Usha Vance tallimanngorpat Kalaallit Nunaaliassapput.
Tassani Pituffik Space Base pulaassavaat.
Vancekkut tassani issittumi isumannaallisaanermut apeqqummik ilisimatitsiffigineqassapput, Amerikamiullu sakkutuuinik naapitsillutik.
Coglianesemik apersorneqarluni Vancip tikeraarnermini suna suliassarineraa Trumpi aperineqarpoq.
- Nunarsuarmi isumannaallisaarnermi isumannaatsuunermilu Kalaallit Nunaat pisariaqartikkipput ilisimatitsissutigissavaat, Trumpi akivoq.
Ministeriunerup Mette Frederiksenip (S) pingasunngornermi Amerikamiut Kalaallit Nunaannik soqutiginnittuarnerat “pissutsit ajornakusoornerattut” taavaa.
- Pisoq uteqqiattussaq – immaqa piffissami sivisuumi, Facebookimi takkajaamik ivertitamini allappoq.
Mette Frederiksen naapertorlugu USA “nammineq kissaatini aallaavigalugit iliuuseqarpoq”.
- Kalaallit Nunaata tuniniagaannginnera nalunngilaat. Kalaallit Nunaata USA-mut ilaarusunnginnera nalunngilaat. Tamanna toqqaannartumik ammasumillu paatsoorneqarsinnaanngitsumik oqaatigineqareerpoq.
