Frede Kilime ulapaartuuvoq mobiilinilu
iperanngingajavittarlugu. Fabrikkimi ajutooqqanerit pillugit sianertoqanngippat
Sermitsiami tusagassiortoq tunitsivimmut pulaarusulluni sianertoq
oqaluutillattaagaanut ilaaginnarput. Tunitsiviup ammarnerani ulapissimaqaluni,
unammillernartullu imaaginnavissut aqqusaarsimallugit oqaluttuaraa.
- Tunitsiviit ammaqqaaraangamik
pinngitsoqaratik tamarmik arlaatigut unammillernartunik nalaatsiuaannarput. Tassa
pissutsit taamaapput, Frede oqarpoq.
SAMMISAQ: TUNU PUIGUINNAGAQ
Sermitsiamit Tasiilameeqqammerpugut,
angalanitsinnilu suliagut piffissami aggersumi saqqummiuttartussaallutigit.
Tasiilap eqqaani 2.500-t missaannik
innuttaasoqartumi unammillernartut periarfissallu allaaserisani ukkatariumaarpagut.
Frede Kilime ulapaartuuvoq mobiilinilu
iperanngingajavittarlugu. Fabrikkimi ajutooqqanerit pillugit sianertoqanngippat
Sermitsiami tusagassiortoq tunitsivimmut pulaarusulluni sianertoq
oqaluutillattaagaanut ilaaginnarput. Tunitsiviup ammarnerani ulapissimaqaluni,
unammillernartullu imaaginnavissut aqqusaarsimallugit oqaluttuaraa.
- Tunitsiviit ammaqqaaraangamik
pinngitsoqaratik tamarmik arlaatigut unammillernartunik nalaatsiuaannarput. Tassa
pissutsit taamaapput, Frede oqarpoq.
Unammillernartorpassuit Aammali ajuusaarutissaqarpoq. Naak
tunitsiviup 13-inik sulisoqartup ammarnerani ajoquteeqqat ulluinnarni
nalaanneqartartut pinngitsoorneqarsinnaanngikkaluartut, ajutoortoqartillugu
kikkut eqqugaasarneri nalunngilaa. Tunitsivimmi ukiut marluk matuma siorna
pisortanngunngikkallarami, inuunermi ilarujussua piniartuullunilu
aalisartuusimagami pissutsit ilisimalluarpai.
- Aalisartut 50-it sinnerlugit
tunisinissamut akuersissutaateqarput. Saniatigooralugu pinialuttartut
tunisisinnaanerat unitsikkallarnikuuarput, qerititsivigummi
malinnaasinnaanngillat, ajoqutaallu maani aaqqinneqarsinnaanatik, Frede
oqaluttuarpoq.
Qerigasuartitsiviup
ajoquteqarnera aalisagarpassuarnik annaasaqaataavoq.
- Saarulliit 242 tonsit 556 kiilullu
tunineqarnikuupput. Qerigasuartitsivik ajoquteqarsimanngitsuuppat tunisaqartoqarnerusimasinnaagaluarpoq,
Frede oqaluttuarpoq.
Saarulliit qerititsivimmiittut. Qerititsiviup ajoquteqarnera peqqutigalugu tunitsiviup tigusinnaasai annikinnerungaatsiarput.
Assiliisoq: Oscar Scott Carl
Qerigasuartitsiviup ajoquteqarnera
peqqutigalugu tunitsivik matugallarneqartariaqalernikuuvoq, novembarillu
aallartisimalernerani ammarneqaqqissasoq naatsorsuutigineqarluni.
Fredep tunitsivimmut isinnginnermini kamini
imermut kinissinnarlugit plastikkinik tungujortunik illersuutitut atortakkanik atisivoq,
tunitsivimmullu iserami nateq imaqanngitsoq tikkuarpaa. Saarullinnut niaquiaat
tamaaniittussaagaluarpoq. Sulili tikinngimmat sulisut namminneerlutik
niaquiaasariaqartarput. Qerigasuartitsiviup ajornartorsiutaasup
tungaanukarpugut. Sulisut qiteqqunnerata nalaaniimmat allanik inoqanngilaq.
- Ajoraluartumik sulisut
taarseraattorujussuupput, kisianni pisariaqartitagut massakkut sulipput.
Tunitsivittaani qulit sulipput, allaffimmioq ataaseq, eqqiaasoq ataaseq
uangalu. Katilluta 13-iuvugut.
Innuttaasut soqutiginnittorujussuit Aalisakkanik tunitsivik ukiorpassuarni
sorsuutigisimasani, innuttaasunut iluaqutaalereersoq maanna aqutsisuuffigaa.
- Suut tamarmik inissikkiartorneranni soorunami
nuannaanngitsoortoqarsinnaanngilaq. Iluaqutaanera siunissami
takulerumaarparput, naak saarulliit aggustimiit novembarimut
takkusimaartarnerat sivikikkaluartoq, ammarneranilu aporfialuppassuit
aqqusaaraluarlutigit, Frede oqarpoq nangillunilu.
Tunitsivimmi sulisut qiteqqunnerminni kaffisuupput.
Assiliisoq: Oscar Scott Carl
- Aalisakkanut tunitsivik innuttaasunut
aalisartunullu isaatitsissutaasinnaagami pingaaruteqarpoq.
Fredep siunissamut isumalluarnera
ullumikkut takuneqarsinnaallualereerpoq. Inuusuttut aalisalersut ilagaat Enos.
Taassuma tunisassiorfeqalernera atorluarpaa. Fredellu oqaluttuarnera
naapertorlugu aalisartut amerleriapiloorput.
- Aalisartut amerlinikuupput. Aalisakkanik
ukiut marluk matuma siorna tulaassuillattaallutik aallartinnikuupput, ukiullu
tamaasa amerliartorlutik. Tunitsivik ammareermat suli amerleqqinnerunikuupput.
Ikittuararsuusinnarlutik massakkut 50-it sinnerpaat. Taamaammat
amerleriangaatsiarnikuupput.
Siunissaq soqutiginartoq Frede allaffimminut, tunitsiviup
allaffimmiuata saavaniittumut, ingilluartitaarpoq. Aalisartuullunilu
piniartuusinnarluni suliffimmut allarluinnarmut saalluni allaffimmiunngornikuuvoq,
63-inillu ukioqalereerami allannguinerujussuaq malugisarpaa.
- Ima utoqqalisimatigaanga
aalisartoorusukkunnaarlunga. Pisortanngupiloorpunga. Qaaqquneqarnikuuvunga
pisortanngorusunnerlungalu aperineqarama eqqarsarpunga: Misilittariaqarpara. Soorunami
piniartuuneq aalisartuunerlu ilaanni maqaasisarpakka, kisianni suliffiga
nuannaraara, Frede oqarpoq.
Tunitsiviup siunissaa qanoq ikkumaassanersoq siulittoruminaatsillugu oqarpoq.
Neriuuteqarporli. Inuusuttut kulturikkut illuat suleqatigalugu aalisarnermik ilinniarfimmik
pilersitsisoqarnissaa neriuutigaa. Taama pisoqarpat tunitsiviup iluaqutaanera
suli siammarneqarnerusinnaasoraa. Tunitsiviullu siunissaa pillugu ima
oqaasertaliivoq.
- Siunissaq qanoq issanersoq ilisimanngisaannarparput, kisianni soqutiginaqaaq.
Frede Kilime Tasiilami tunitsivimmi pisortatut ulapaartuuvoq, aajuna unillatsiarnermini tunitsiviup silataani pujortataartoq.
Assiliisoq: Oscar Scott Carl
