Aatsitassarsiorfik pingaarutilimmik alloriaqqittoq
Naalakkersuisut Greenland Anorthosite Miningip VVM-imut VSB-mullu nalunaarusiai akueraat.
Aatsitassarsioqatigiiffik Greenland Anorthosite Miningip VVM-imik VSB-imillu nalunaarusiaat kiisalu tusarniaanermilu akissutit ataatsimoortillugit suliaat akuerineqarput. Tusarniaanermi suliffeqarfiit oqartussallu apeqqutaat ataasiakkaarlugit akineqarput.
Assi: Greenland Anorthosite Mining
Aatsitassarsioqatigiiffik Greenland Anorthosite Mining, qanittukkut piiaanissamut akuersissummik tunineqartoq, piiaaffeqalernissamut alloriaqqippoq.
Aatsitassarsiorfiup piaaffeqalernikkut avatangiisinut inuiaqatigiinnullu sunniutai pillugit VVM-imik VSB-millu nalunaarusiaat akuerineqartut Naalakkersuisut tusagassiuutinut nalunaarummi ilisimatitsipput.
Qeqertarsuatsiaat avannaata kangiani anorthositimik piiaanissaq pilersaarutaavoq.
Angusaq pingaarutilik
Akuersissummik tunniussinermi alloriarnerusoq pingaarutilik aatsitassanut naalakkersuisoq Naaja H. Nathanielsen (IA) oqarpoq:
- VVM-imut nassuiaat ilanngullugu VSB-imut nassuiaat aatsitassarsiorfimmut matusinissamullu pilersaarutissanut, suliassamik aatsitassarsiorfimmik ingerlatsinissamut qaninnerulersitsisussanut, tunngavissiivoq.
Tamatuma saniatigut VSB-imut nassuiaat ”IBA”-mik taagorneqartumut, tassa ingerlatseqatigiiffiup, kommunip aamma Naalakkersuisut akornanni isumaqatigiissummut sinaakkutissiivoq aamma oqaatigaa.
- Tassani ingerlatseqatigiiffiup aammalu najukkami sumiiffiup akornanni suliniutissat erseqqissarneqassapput. Kommuneqarfik Sermersooq qanimut suleqatigalugu ingerlatseqatigiiffiup pilersitsiviulluartumik oqaloqatiginerata ingerlateqqinnissaa qilanaaraara, Naaja H. Nathanielsen oqarpoq.
Piaaneq kingusinnerpaamik 2028-p naanerani aallartissasoq
Aatsitassarsiorfinnik nutaanik ineriartortitsinissamut atatillugu pinngortitap illersorneqarnissaa Naalakkersuisut pingaartikkaat avatangiisinut naalakkersuisoq Bentiaraq Ottosen oqarpoq:
- Ullumikkut ulloq kisiat eqqarsaatigissanngilarput – aammali kinguaariinnut tullissatsinnut akisussaaffeqarnerput eqqarsaatigissavarput, oqarpoq suliniullu suliffissanik nutaanik najukkanilu suliffissaqartitsinissamik periarfissaat ilanngullugu oqaatigaa.
Greenland Anorthosite Mining A/S aatsitassarsiorfimmut matusinissamullu pilersaarummik nassiussinissamut 31. december 2026 tungaanut piffissalerneqartoq Naalaakkersuisut aamma allapput.
Aatsitassarsiorfimmi ingerlatassat kingusinnerpaamik ulloq 31. december 2028 aallartinneqassapput
