Aatsitassarsiornermik nittarsaassinermi Kalaallit Nunaat soqutigineqarluartoq

Nunarsuarmi aatsitassarsiornermik saqqummersitsinerit annersaat PDAC (Prospectors & Developers Association of Canada) Torontomi ulluni 1. – 4. marsimi ingerlanneqarpoq, ukioq mannalu peqataasut 27.000-nit amerlanerupput.

Najuuttuni Kalaallit Nunaannit aallartitat, aatsitassanut naalakkersuisoqarfimmit, Sulisitsisunit kiisalu suliffeqarfinnit soorlu 60Northimit, Air Greenlandimit, Arctic Importimit, Arctic Lawimit, Blue Water Shippingimit, Cowimit, EMJ Atconimit Greenland Copterimit kiisalu Grønlandsbankimit sinniisuutitat peqataapput.

Tamatuma saniatigut ingerlatseqatigiiffiit arlallit Kalaallit Nunaanni akuersissutaateqartut, soorlu Amaroq Minerals, Lumina Sustainable Materials, GreenROC Mining, Tanbreez kiisalu Greenland Resources peqataapput. Aallartitat saqqummersitsivimmi nerriveqarput. Taamatullu aamma namminersorlutik oqartussat. Taakkunani ullut tamaasa soqutiginnittunik takkulluartoqartartoq Sulisitsisut oqaatigaat. Tamanna pivoq naak ukioq manna Inatsisartunut qinersineq peqqutigalugu naalakkersuisunit peqataasoqanngikkaluartoq. 

Greenland Day

Sulisitsisut, Namminersorlutik Oqartussat, Dansk Industri Udenrigsministerialu pisarneq malillugu ”Greenland Day”-mik ingerlatsisuupput, tassungalu 180-it ornigupput. Ullormi ilaatigut namminersorlutik oqartussat aatsitassarsiornermut ujarassiornermullu periusissiaat 2025-30 saqqummiunneqarpoq, taannalu Sulisitsisut Arctic Economic Councilillu peqatigiillutik isumagaat. 

– Ingerlalluavippoq periusissiarlu ingerlatsisut tungaanniit qanoq isigineqarnera oqaloqatigiissutigilluarparput, orniguttullu amerlanerit saqqummersitsinermi politikereqannginnera paasilluaraat isumaqarpunga. Ataasiakkaalli Kalaallit NUnaata aatsitassarsiornernik ingerlatsinerit annertusarnissaannik kissaateqarnerani, politikerit sinniisoqartariaqaraluarnerat oqaatigaat, Sulisitsisuni pisortaq Christian Keldsen oqaluttuarpoq, taassumalu Greenland Dayimi soqutiginnittoq ernummatigisatut annikitsiginani soqutigineqarluartoq erseqqissaatigaa. 

– Matumi paarsisoqarpugut, tusagassiorfinnimmi suliffeqarfinnillu amerlasuut takkunnissaat ilimagigatsigu, eqqissisimasumilli ingerlanneqarpoq. Tusagassiortut sisamat angullugit takkupput, inissallu 25-t tusagassiortunut immikkoortissimavagut, taamaalillunilu immikkut pisoqanngilaq.

 Aatsitassat pingaarutillit 

Ingerlatsisunut amerlanernut aatsitassanut pingaarutilinnut tunngatillugu taakku niuernermut tunnganerminnit politikikkut sakkuunerunerat pillugu ataatsimeersuarneq isinik uisitsivoq. – Manna tikillugu aatsitassat pingaarutillit niuernermi ingerlatatut isigaavut, taakkuli nakkutiginninnermut tunngatillugu politikikkut sakkuunerugunarlutillu nunarsuarmik aqutsiniutaanerupput. Taamaammat aatsitassat pingaarutillit nalitusiartortarnerannik isumannaarinninniarnermut tunngatillugu naalakkersuisut akuusariaqarput, Christian Keldsen oqarpoq.

Taassuma nunatsinni namminersorlutik inuussutissarsiortut ataatsimoorluarnerat misigaa, taamaattoq aamma sinaakkutitut atugassarititanut allaffissornikkullu ingerlatsinermut tunngatillugu suli pakatsisimaartoqartoq. – Assersuutigalugu EU 14-nik suleqatigiiffeqarpoq. Kalaallillu Nunaat taakku ilagiinnarpaat. Taamaalilluta kisitta qiteqatissaanngilagut, taamaammallu akitsortiinnarsinnaanata, Christian Keldsen oqarpoq, taassumalu siunnersortinik atuinikkut qinnuteqaatinik suliarinninneq ikiorserlugu inuussutissarsiortunik Kalaallit Nunaata naaperiaasinnaanera erseqqissaatigaa.