Microsoft: Mailinik kiffartuussineq nalinginnaasunngungajalerpoq

Ajutoornerup nunarsunaq tamakkerlugu qarasaasialerinermik suliffeqarfinnik arlalinnik eqquisup aaqqinniarlugu suliarinera suli ajunngitsumik ingerlasoq Microsoftip takusinnaavaa.

Suliffeqarfip nutarteraluni nalunnaqutaq 15.00 nalunaarutaani oqaatigineqarpoq mailit kinguaattooqqasut ikileriangaatsiartut, mailinillu kiffartuussivik nalinginnaasaunngoraluttualersoq.

- Atuisut ilaat piffissap ilaani iserniarnerminnik ajornartorsiuteqarsinnaapput imaluunniit e-mailit nassiunneri kinguaattoorsinnaapput, kisianni aaqqissuineq suli ingerlavoq.

Kiffartuussiviit arlallit atorneqarsinnaalerput, Europamilu pitsanngoriarneq misigineqartoq nalunaaqutaq 13.00 oqaatigineqarpoq.

Japanimi ingerlatsineq ajunnginnerpaavoq, Nordamerikami aamma pitsanngoriartorpoq.

- Atuisulli ilaat piffissap ilaani suli ajornartorsiuteqarput, oqartoqarpoq.

Microsoftip kiffartuussiviini soorlu Outlookimi, Teamsimi aamma Copilotimi ajutoortoqarnera sisamanngornermi unnukkut nalunaarutigineqarpoq.

Ajutoorneq ajortuliorniat iliuuseqarneraneersuuneranut ersiuteqanngitsoq Microsoft allappoq.

- Pisup uuma pinartutut pingaarnersiukkatullu suliarinera ingerlatiinnassavarput, aaqqinnissaata tungaanut.

Ajornartorsiutit aaqqinneqareerpata Microsoft peqqutaasut sillimaniarnermilu pitsanngorsaataasinnaasutut qajannaallisaataasinnaasutullu iliuuserineqarsinnaasut pillugit sukumiisumik nalunaarusiaralugit saqqummiussiniarpoq, tamanna Microsoftimiit ulloqeqqata missaani oqaatigineqarpoq.

Microsoft ajutoornermit ukioq manna aappassaa eqqorneqarpoq. Oktobarimi ukioq kingulleq aamma ajutoorput.

Amerikami AI-mik suliffeqarfiit OpenAI-p aamma Anthropicip Microsoftimik attaveqarniarnerminnik ajornartorsiuteqarnertik oqaatigaat.

Danmarkimi universitetit arlallit ajutoornermit aamma eqqorneqarput. Aalborgip aamma Aarhusip universitetii eqqorneqarsimallutik tallimanngornermi ullaakkut ilisimatitsipput.

Jeppe Engell Dansk Industrimi siunnersortit pisortaat naliliivoq, Danmarkimi suliffeqarfiit tamangajammik ajutoornermit eqqorneqarsimasut.

- Danmarkimi suliffeqarfiit amerlanerpaartai Microsoftip kiffartuussiviinik atuisuupput. Suliassaqarfiit arlaannaalluunniit eqqugaanngilaq, taanna Ritzauimut oqarpoq.

Nakkutilliinermi nittartagaq Downdetector naapertorlugu Microsoftimik atuisut nunat 74-it ajutoornermit eqqarneqarput.

RITZAU