KNI ikummatissaqarnermi ingerlatsivimmi pisortamik nutaamik atorfinitsitsisoq

Suliffeqarfimmi  ikummatissaqrnermi ingerlatsivimmi pisortaanerugallartutut atorfik Gert Nielsenip septembarip arfineq-aappaaniilli atorfigisimagaa decembarillu aallaqqaataaniit aalajangersimasumik atorfinissasoq Namminersorlutik Oqartussat suliffeqarfiutaat KNI nalunaarpoq.

KNI naapertorlugu Gert Nielsen nukissiuutinut, pilersuinermut inuussutissarsiornermullu suliffeqarfinni aqutsinermi ukiuni 25-nit amerlanerusuni misilittagaqarpoq.

Gert Nielsen Danmarkimi Jernbro Industrial Services A/S-imi Norgemilu Jernbro AS-imi nunat tamat akornanni sullissinermut ingerlatsinermullu akisussaasuulluni piffissami kingullermi pisortaaneruvoq. Naturgas Fyn Distribution A/S-imilu pisortaanerusimavoq.

KNI-mi pisortaanerugallartup (CEO) Peter Wistoftip atorfinitsitsineq nuannaarutigaa:

"Gert Nielsenip KNI-mi ikummatissaqarnermut ingerlatsivimmi pisortanngornissaminut akuersisimanera nuannaarutigaara. Ikummatissaqarnermut ingerlatsivimmi suliassatsinnut akisussaaffitsinnullu assingulluinnartunik aqutsinermut ingerlatsinermullu Gert misilittagaqarluartuuvoq.

Suleqatigiiginnarnissarput sulisullu peqatigalugit Gertip ingerlatsivimmik ineriartortitsinissaa qilanaaraara," Peter Wistoft KNI-mi pisortaanerugallartoq oqarpoq.

KNI novembarip aallaqqaataani aningaasaqarnermut aamma pisortartaarpoq, Najaaraq Christiansen atorfinitsinneqarluni.

KNI-mi pisortaanerusimasoq Jeppe Jensen novembarip aallaqqaataani Greenland Airportsimi pisortaanertut atorfimmut nuuppoq. Peter Wistoft KNI-mi pisortaanerugallartutut atuuttoq tusagassiuutinut nalunaarummi allassimavoq.