Aqqusinikkut angallannermi akimmisaartitsut

Aqqusinikkut angallannermut malittarisassat aamma inatsisit unammillernartuugajullutillu naalagaaffeqatigiinni attaveqaqatigiilluarneq ilungersunarnerulersissinnaavaat.

Danmarkimi biilimik pisineq

Maanna pisartunut assersuutigalugu innuttaasut Nunatsinni najugaqartut arlallit Danmarkimi illuuteqarlutillu, aamma illumik aasarsiortarfeqarput imaluunniit taamaallaat Danmarkimi ilaqutaqarlutik, taakkualu tikeraakulasarlugit. Tamatumunngalu atatillugu inuit ilaat sooq Danmarkimi biilimik pisisinnaanatillu nalunaarsortissinnaannginnerlutik eqqarsarsimapput. Apeqqut tamanna Aaja Chemnitzip angallannermut ministerimut Thomas Danielsenimut qanittukkut ingerlateqqippaa.

Aallaavittut biili taamaallaat Danmarkimi najugaqartumit imaluunniit Danmarkimi nunaqartumit piginnittoqarpat, imaluunniit ukiumut ulluni 185-ini Danmarkimi najugaqartartumit taamaallaat Køretøjsregistret-imi nalunaarsortittoqarsinnaasoq Angallannermut ministeri akissuteqarluni allappoq.

„Innuttaasut Danmarkimi najugaqanngitsut imaluunniit nunaqanngitsut, Naalagaaffeqatigiinnili sumiiffinni allani nunaqartut, biilinik piginnittutut nalunaarsorneqarsinnaanissaannik kissaatigisaqartoqarneranik siusinnerusukkut ilisimatinneqarsimanngilanga. Malittarisassat atuuttut allanngortittariaqarnersut misissorsinnaavara”, Aaja Chemnitzimut akissummini allappoq.

Biilersinnaanermut allagartaq elektroniskiusoq

Ajornartorsiut alla tassaavoq biilersinnaanermut allagartamut app-imik digitalimik atuisinnaaneq, taanna Digitaliseriinermut Aqutsisoqarfimmit, Aqqusinikkut Angallannermut Aqutsisoqarfik aamma Naalagaaffiup Politiivi suleqatigalugit ineriartortinneqarsimavoq.

Biilersinnaanermut allagartaq mobilimut ikkunneqarpat, biilersinnaanermut allagartaq biilimi nassartariaqanngilarput, tamannalu qallunaanit nuannaarutigineqarpoq. Ajornartorsiulli tassaavoq Danmarkimi aamma Nunatsinni biilersinnaanermut ataatsikkut allagartaqartut app-imik atuisinnaannginnerat. EU-p biilersinnaanermut allagartamut peqqussutaa naapertorlugu, taamaallaat biilersinnaanermut allagartaq ataaseq akuerineqarsinnaammat tamatumunnga pissutaavoq. Kalaallit biilersinnaanermut allagartallit app-imik atuisinnaasutut immikkut pisinnaatitaanngitsut, kingullertut tusarliunneqarpoq, suliarlu maanna Inatsisinik atortitsinermut ministereqarfimmut, kalaallit biilersinnaanermut allagartaannik nalunaarsuisarnermut akisussaasumut, ingerlateqqinneqarpoq.

Naleqqussarsinnaasunik aaqqiissutissarsiortoqartoq

Aaja Chemnitzip biilersinnaanermut allagartartaarnissamut tunngatillugu unammilligassat ukiorpassuarni erseqqissartarsimasani qatsulluinnarpai.

– Unammillernarnerpaat biilersinnaanermut allagartamut tunngapput, tamakkulu arlaleriaqalunga erseqqissarniartarpakka. Tamanna innuttaasunit saaffiginnittarnerpassuit tunuliaqutarineqartut, Aaja Chemnitz oqarpoq, taassumalu innuttaasut Danmarkimi biilersinnaanermut allagartallit, Nunatsinni najugaqarunik biilernermut allagartamik nutarternissaanut inatsisitigut aamma akimmisaartinneqartartut erseqqissarpaa. Tamannalu biilersinnaanermut allagartamut peqqussummi najugaqarnerup qanoq paasisariaqarneranik EU-p nassuiaataanik pissuteqarpoq.

Danmarkip tamatumunnga atatillugu, nunap najugaqarfigineqartup nassuiarneqarnera pillugu apeqqutip sakkukinnerunissaanik eqaannerunissaanillu kissaateqarnini nalunaarutigaa, tamannalu nunat ilaasortaasut biilersinnaanermut allagartamik tunniussisinnaanerannut nutarterisinnaanerannullu attuumassuteqarpoq. Biilersinnaanermut allagartamik nutarterineq suli suliarineqarpoq, peqqussummilu nutaami aaqqiissutissarsiorneq sulissutigineqartoq Danmarkimiit oqaatigineqarpoq.

EU-mi biilersinnaanermut allagartaq

Nunatsinni biilersinnaanermut allagartaq, EU-mi biilersinnaanermut allagartamut imaaliallaannarlugu aamma sanilliunneqarsinnaanngilaq.

Kalaallit biilersinnaanermut allagartaat akuerineqarsinnaanersoq, aamma kalaallit biilersinnaanermut allagartaat EU-mi biilersinnaanermut allagartamik taarserneqarsinnaanersoq, EU-mi nunat ilaasortaasut namminneq aalajangertussaavaat.

Piumasaqaatit ilaat tassaavoq Nunatsinni angallannermi pissutsit aqqusernillu Danmarkimut aamma nunat ilaasortaasut angallanneranni pissutsinut aqqusinernullu assersuunneqarsinnaanissaat. Angallannermullu ministeriaqarfiup naliliinera naapertorlugu, Nunatsinni angallannermi pissutsit aqqusernillu assersuunneqarsinnaasutut isigineqarnissaat ilimananngilaq.

Danmarkimi ilinniartut

Kalaallit Danmarkimi ilinniagaqartut killeqarfiit tungaatigut aamma akornutissaqartinneqartarput, tassami assersuutigalugu aasaanerani atuanngiffeqarnerminni Nunatsinnukarlutik Nunatsinni biilersinnaanermut allagartamik pissarsisinnaanngillat.

Naak biilersinnaanermut allagartamik pissarsinissami Nunatsinni najugaqarnissaq aqqusinikkut angallannermut inatsimmi piumasaqaataanngikkaluartoq, piumasaqaalli kaajallaasitamiittoq Kalaallit Nunaanni Politiit erseqqissarpaat.

Biilinik misissuisarneq

Aqqusinikkut angallannermi akornutaasut aaqqinneqarnissaat Danmarkip akisussaaffiginerpaagaa Aaja Chemnitzip oqaatigaa, tamannali anguniarlugu Naalakkersuisut erseqqissunik malersoqqinneqartussanik piumasaqaateqartariaqarput.

Assersuutigalugu biilinik misissuisarnermut tunngatillugu taamaappoq, Nunatsinni misissuineq kingullermik ukiut 25-t matuma siornagut ingerlanneqarpoq. Angallannermut ministeriaqarfik aamma Aqqusinikkut Angallannermut Aqutsisoqarfik misissuissarnissamut periusissamik suliaqartut, kingullertut oqaatigineqarpoq, tamatumani kalaallit tamatumunnga kissaataat sapinngisamik annerpaamik ilaatinniarneqarlutik.

Ikiaroornartutorsimanermut misissuissummik atuineq

Aqqusinikkut angallannermi killilersuinermut akornutaasoq alla tassaavoq, Nunatsinni aqqusinikkut angallannermut inatsimmi ikiaroornartutorsimalluni biilernermut killilersuisoqanngimmat. Taamatuttaaq politiit ikiaroornartutorsimanermut misissuissummik maannakkut atuisinnaatitaanngillat, taamaammallu politiit ikiaroornartutorsimallutik biilertunut akiuiniarnerminni atortussaminnik amigaateqarlutik. Ikiaroornartutorsimanermut killiliussamik pilersitsisoqassappat, aqqusinikkut angallannermut inatsit allanngortinneqartariaqarpoq, tamannalu Danmarkimi angallannermut ministeriaqarfiup akisussaaffigigaa, Kalaallit Nunaanni Politiit Sermitsiamut ilisimatitsipput.

Taxanik angallassisarneq

Aammattaaq taxaateqarnermut tunngasut tamarmik nalunaarummik nutaamik malitassaqalernissaat siunnersuutigineqarpoq, juulip aallaqqaataata tungaanut tusarniaassutigineqartumik.

Nalunaarummik taamaattumik inatsimmi amigaateqarmat, pilersitsisoqarniarpoq. Tamannami pissutigalugu taxartartut arlallit siorna upernaakkut akerliussutsimik takutitsimmata, tassami kinaluunniit biilersinnaanermut allagartalik biilertartut, unnerluutigineqarnissamut tunngavissaqanngitsumik taxatut angallassisarsinnaammat. 

ATV-nik aamma qamuteralannik ingerlatsisarneq

Aammattaaq ATV-t qamuteralaallu, inuusuttorpassuit nunalerinermut aalisarnermullu atortagaat, ingerlassinnaassagaanni Danmarkimi inatsisit naapertorlugit biilersinnaanermut allagartaqartariaqarpoq aamma 18-ileereersimasariaqarpoq. Tamatumunnga atatillugu Nunatsinni kissaatigineqarluni tamatuma sakkukillineqarnissaa, inuiaqatigiinnullu kalaallinut naleqqussarneqarluni.

Aamma sooq Danmarkimi 17-inik ukiullit biilersinnaanermut allagartaqarsinnaappat, Nunatsinnili 17-inik ukiullit taamaaliorsinnaanngillat? Aaja Chemnitzip oqaatigaa, Danmarkimi aaqqissuussinertut, 17-inik ukiulinnut biilersinnaanermut allagartaqarnissaannut misiligutitut suliniuteqartoqartariaqaraluartoq.