ILINNIARNEQ
Kalaaleq oqaatsit pillugit ilisimatusartoq Montréalimiittoq
Ilisimatusarfimmi ph.d-nngorniartoq Therese Lind Benhardt, Kalaallit Nunaanni assersuutigalugu oqalutsit nutserisullu oqaatsit inatsisilerinermut tunngasut qanoq ineriartortittarneraat pillugu ilisimatusarnerminut atatillugu, qaammatini sisamani Université de Montréalimeeqqammerpoq.
Montréal Canadap immikkoortuani Quebecimi illoqarfiit annersaaraat. Canadap illoqarfiisa annersaata tullia 2,2 millioninik inoqarpoq. Université de Montréalimi ilinniartut 70.000-it missaanniipput.
Assi: Nammineq pigisaq
Therese Lind Benhardt Kulturimik, Oqaatsinik Oqaluttuarisaanermilu Ilisimatusarfimmi ph.d-nngorniarnerminut atatillugu Université de Montréalimi qaammatini sisamani ilisimatusareerluni angerlaqqammerpoq.
– Ilisimatusarnermi misissuinermi kisermaassinartarmat ilisimatusarninnut atatillugu Montrealimukarpunga, Therese Lind Benhardt oqarpoq, taassumallu ilisimatusarnermini kalaallit oqaasii inatsisilerinermut tunngatillugu qanoq ineriartortarnersut tamannalu qanoq ersertarnersoq misissuiffigaa.
Ilisimatusaataa Namminersorlutik Oqartussani nutserisoqarfiannit aamma Oqaasileriffimmi sulisut inatsisilerinermut tunngasuni qallunaatuumiit kalaallisuunngortitsinerannit aallaaveqarpoq - tassa Kalaallit Nunaanni inatsisilerinermi oqaatsit qanoq ineriartortinneqartarnerat sammineqarluni.
Therese Lind Benhardt ph.d.-liornerminut atatillugu upernaaq qaammatini sisamani Montrealimiippoq.
Assi: Nammineq pigisat.
– Oqalutsit nutserisullu ukiorpassuani inatsisinik kalaallisuunngortitsisartuupput, taamaalillutillu inatsisilerinermi oqaatsit naqqanit pilersittarlugit. Inuiaqatigiinni inatsisit amerliartortillugit suliaq annertusiartuinnarpoq. Naak suliaq nunasiaataajunnaariartornermut, inatsisitigut isumannaatsuunermut ilisimasanillu avitseqatigiinnermut pingaaruteqarluinnartuugaluartoq tamanna takussaanngitsumik ingerlanneqartoq isumaqarpunga.
Oqaatsinut nutserinermullu immikkoortortaqarfik Pavillon Lionel-Groulx-imiippoq, tassa illu tungujortoq talerpiup tungaaniittoq. Ilisimatusarfiup isertarfia napasulialik tunuani takuneqarsinnaavoq.
Assi: Nammineq pigisaq.
Canadami ilisimasanik avitseqatiginneq
Theresep Montrealimi ilisimatusarfimmik toqqaanera ilisimatusarnermini siunnersuisuata aappaata Marie-Claude L’Hommep Université de Montréalimi oqaatsinut immikkoortortami professoriuneranik pissuteqarpoq, taamaalillunilu ilisimatusartunut tamatumunnga tunngasunut ilanngussinnaasimavoq.
– Isumassarsiama Canadami ilisimatusartunut saqqummiunneri suliannut annertuumik iluaqutaavoq. Ph.d-mik suliaqarnera maannakkut patajaatsumik tunngavissaqarnerulerpoq, Therese oqarpoq, taanna Københavnip Universitetiani Ilisimatusarfimmilu inatsisilerinermik, oqaatsinik kalaallisullu ilinniarsimallunilu 2013-imili Kalaallit Nunaanni najugaqarpoq.
- Suliatigut avitseqatigiinnerup pingaarnertut angerlaassama saniatigut nunami inunnik ilisimasaqarfiginngisanni nutaanik takusarpassuaqarlungalu misigisarpassuaqarpunga. Angalalluni - taamatuttaarlu suliniummik piareersaajutigaluni - imminut avataaniit takuneq kiisalu nutaanik soqutiginartunillu misigisaqarneq peqqinnarpoq. Montrealimi tikilluaqquneqarpunga, sorpassuilli aamma namminersuutassaallutillu nammineq aallarnigassaapput. Nunanut allanut ilisimatusariarnermi sorpassuit nammineerluni suliarineqarsinnaasariaqarput.
Nunami allamiinneq attaveqaateqarnerulersitsiluni misilittagaqarnerulissutaasoq
Tamanna ilisimatusarnikkut attaveqaateqalernermik nunanilu tamalaani misilittagaqarnernik ineriartortitsisarmat Ilisimatusarfiup ph.d-nngorniartut tamaasa ilisimatusarnerminni nunamut allamut angalanissaannik kajumissaartarpai. Tamannalu Theresep paasilluarsinnaavaa:
Rue Saint-Laurentimi, Montréalimi aqqusinermi eqqumiitsuliorneq
Assi: Nammineq pigisaq
– Nutaanik isumassarsiorfiusarpoq, ingammik Ilisimatusarfimmi mikisumi ilinniartilluni. Taamaattumik avataanit ilisimasanik avitseqateqartarnissaq pisariaqartinneqarpoq. Nunamut allamut angalanissaq kajumissaarutigilluarsinnaavara, Therese Lind Benhardt oqarpoq. Taassuma Montrealimi ilisimatusarfimmi ilinniartut 70.000-it akornanni ilinniartuuneq misigaa.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
