Securityqannginnera Jettimep aallarfissaanik kinguartitsisoq

Nuummi One Stop Securityqalernissaq ulluligaanngitsumik kinguartinneqartoq

Air Greenland sapaatip akunnerata tulliani Nuummit Københavniliarnissat arlallit kinguaattornissaannik nalunaaruteqarpoq. Taakku ataasinngornermi maajip 25-iani tallimanngornermilu maajip 29-iani ullaaralaakkut aallarnissanut Jettimemit isumagineqartunut tunngapput. Timmisartuussinerit taakku nalunaaqutaq 10.30-mut kinguartinneqarput.

Air Greenland naapertorlugu, Greenland Airports pilersaarutaaqqaartutut taama siusitsigisukkut securitymi naammattunik sulisussaqannginneranik patsiseqarpoq. Siusissukkulli suli nassatanik tunniussisoqarsinnaavoq.

Maanna angallannermut paasissutissaatimini Air Greenlandip sapaatip akunnerata tulliani timmisartuussinissat marluinnaat taavai. Sermitsiamili sulisoq tallimanngornermi juunip tallimaani kinguartitsinermik taamaattumik aamma kalerrinneqarpoq.

Aamma tassani Jettimep Nuummit ullaakkut aallarfissaa pineqarpoq, taannalu nal. 08.00-mit 10.30-mut kinguartinneqarpoq.

Tamatuma saniatigut Air Greenlandip nunatta kangiani aammaarluni helikopterinik ajornartorsiuteqartoqarneq nalunaarutigaa. Tassa arfininngornermi maajip 23-iani Kulusuup Tasiilallu akornanni timmisartuussisoqassanngilaq.