Nunap kommunillu karsiisa umiarsuit takornariartaatit iluanaarfigaat 

Umiarsuit takornariartaatit nunatta kommunillu karsiinut toqqaannartumik siorna qanoq iluanaarutaallutik aningaasarsissutaappat? Tamanna maanna takussutissaqalerpoq. 

Aningaasaqarnermut naalakkersuisoqarfiup aningaasaqarnikkut ingerlatsineq pillugu nalunaarusiaa naapertorlugu nunatta karsia umiarsuarnit takornariartaatinit taakkualu ilaasuinit 2025-imi 29 millionit koruuninik isertitaqarpoq.

Taakkua imatut agguataaqqapput: Umiarsuaatileqatigiiffiit nunap karsianut 18,7 millionit koruuningajalluinnarnik akiliipput. Taakkununngalu ilaasut 10,3 millionit koruuninik aamma akiliisut, nalunaarummi allaqqavoq. Ilaasunut akitsuut ilaasumut ataatsimut 50 koruuniuvoq.

Kommunit aamma isertitaqartut

Nunatsinni kommunit tallimaasut avatangiisinut aserfallatsaaliinermullu akitsuusiinikuunermikkut umiarsuit takornariartaatit ilaasuinit aningaasanik aamma pissarsipput. Kommunit tallimaasut katillugit 12,2 millionit koruuninnapput. Tamanna missingersuutaasumit 2,8 millionit koruuninik inorsarpoq.

- Umiarsuit takornariartaatit akuttunngitsumik angalaffissaminnik piffissaq kingulleq atorlugu silamik imaluunniit allamik peqquteqarlutik allannguisarneri nikingassutsip annerusumik peqqutigai, nalunaarummi allassimasoqarpoq.

Kommunit avatangiisinut aserfallatsaaliinermullu akitsuusiissagunik akisunerpaamik takornariamut ataatsimut koruuninik 50-inik akiliititsisarnissaat inatsisaavoq.

Nunatta Naatsorsueqqissaartarfiata kisitsisaatai naapertorlugit takornariat umiarsuarnut takornariartaatinut ilaallutik Kalaallit Nunaannukartut siorna 93.897-pput. Nunatsinnilu talittarfiit umiarsuarnit takornariartaatinit 555-riarlutik tikinneqarput.