Nipilersortartoq, ilinniartitsisoq skakkertartorlu

Johannes Sigurdsen maligassanik eqqarsartartuuvoq.

Skakkernermi. Nipilersornermi. Arsaattarfimmi inissisimanermi. Immaqa taamaattarnermigut siuttuujuaannarpoq.

Ikerasammi meeqqat atuarfianni 2. klassi qaangiinnarpaa, ilinniarnertuunngorniarfimmilu atuartut nukarlersaattut angusarissaarnerpaanikuullunilu nunatsinni nipilersortartut nuimanerpaat nipilersoqatiginikuuai.

Skakkimi ima pikkoritsigaaq nikisitsinissanik arlalinnik eqqarsaatiginneqqissaarsinnaalluni, Liverpoolilu ima nuannaritigaa allaat klubbip ilisarnaataa taliminut kakiortissimallugu.

Anneruniartunngoriaannaagaluarpoq. Naapikkaannili angut angusanik ulikkaartutut innani sanilimut eqqissisimasumut assersuunneqarnerusinnaavoq.

Immaqa inuunermi aamma allamik ilikkagaqarsimagami: ataataminik, qatanngumminik inunnillu qanigisaminik annaasarsimanermi nipilersorneq qanoq katsorsaataasinnaasoq.

Ullumikkut pinngorartitsisoq 34-nik ukiulik tallimanik meeraqarpoq — nukarliit marluliaapput qaammatip ataatsip matuma siorna inunngortut - taamaalillunilu aliasunnerup, anguniakkat ilaqutariittullu nalinginnaasumik inuunermi oqimaaqatigiissitsinissaq suli ilikkarniarsaraa.

Johannes Sigurdsen Uummannami 1992-imi maajip 13-ani inunngorpoq.

- Inunngorama sapaatip-akunnera ataaseq qaangiummat ataatama anaanagalu qimussimik aariarluta Ikerasammut angerlaappaatigut, tassanilu peroriartorpunga, Johannes Sigurdsen oqaluttuarpoq.

Nipilersoqatigiinni SIGU-mi erinarsortuullunilu guitarertartuuvoq, taakkualu Miké Thomsen suleqatigalugu saqqummersitaq “SIGU" aamma "Miké: Malungivara”, ukioq manna Kodap nersornaasiinerani ‘Ukiup Nersornaasiuttagaanik’ nersornaaserneqarsimasoq, saqqummersippaat. Nipilersoqatigiit SIGU aamma ilaatigut Nunat Avannarliit Siunnersuisoqatigiivisa nipilersornermut nersornaasiuttagaannut 2023-mi innersuunneqarsimapput.

Nipilersoqatigiit Uummat pilersitseqataaffigai nipilersortartullu tusaamasat soorlu Rasmus Lyberth aamma SUME peqatigalugit tusarnaartitsisarsimavoq. Pingaarnertulli meeqqanut tallimanut ataataavoq.

Maligassiuisut kalattuullu

Johannes Sigurdsenip angajoqqaavi tassaapput Helga aamma Aqqa Sigurdsen. Arnaa ilinniartitsisuuvoq angutaalu, ullumikkut toqoreersoq, aalisartuusimalluni. Johannes Sigurdsen angutinik marlunnik qatannguteqarpoq, nukarlersaallunilu. Aleqaqarluni kingusinnerusukkut paasivaa.

- Nukarlersaagama uteriitsuuvunga. Qatanngutima kinaassusaat soqutigisaallu peroriartuutigaakka, taakkunanngaanniillu akuerineqarniarsariinnaavissimagunarpunga - taama piginnaasaqalertiginissannut immaqalu taakkunanngaanniit piginnaasaqarnerulernissannut, taanna oqaluttuarpoq

Angajuata Niisip arsaattalersillugulu guitarertalersippaa, angajuatalu Luisip skakkernermik soqutiginnilersippaa. Angajuni ulloq manna tikillugu maligassiuisorinerpaasamisut isigai.

Johannes Sigurdsenip qatanngunni Niisi kræfterluni ukiup ataatsip matuma siorna toqummat annaavaa. Annaasaqarnermik misigisaqarneq ilaatigut pissutigalugu Koda Awards-imi nersornaaserneqarnerminit aningaasat inuusuttumut kræftimik nappaatilimmut tunniuppai.

Uummannap eqqaani Ikerasammi nunaqarfimmi inuuneq eqqaamasaani siullersaavoq, piniartoqarfik aalisartoqarfillu, ukiukkut taartarnerani eqqissisinartoq, sikusimatilluni nipaattoq, aatakkumini kissalaarfiusumiittarnini, kalattuunillu inunnik nunaqarfimmiunik katersuutsitsisunik nipilersorfiusoq.

Ikerasammi meeqqat atuarfianni atualerpoq.

- Eqqaamavara siallersoq. Atualersut tallimaavugut, nukappiaqqat pingasut niviarsiaqqallu marluk. Allaat skemara eqqaamavara: Ataasinngornermiit sisamanngornermut nalunaaqutaq qulinut atuariartorutta ualikkut marlunut soraartarpugut, tallimanngornikkullu qulingiluanoorutta ataatsimut soraartarpugut. Eqqumiinnerpaat eqqaamavakka, Johannes Sigurdsen illarluni oqarpoq.

Sunngiffimmini akkami pattagiaq atorunnaagaa akunnialuit atorujoortarpaa. Pattaffiit allamut saasaatigilluarlugit nipilersornermut tiguartissinnaasarpoq.

- Qulinik ukioqarlunga inuit qitsikkaangata kalattuunik nipilersortarpunga. Erinaat tusarnaaginnarlugit ilikkartarpakka, taanna oqarpoq.

Annaasaqarnini inuunerminik allannguissutigigaa

Johannes Sigurdsen 11. klassimi atuarluni inuunermi sinneranut sunniisussamik misigisaqarpoq.

- Ataataga qimussimik angalaartilluni aanaartoorsimavoq, taanna oqarpoq.

Tamanna 2008-mi pivoq. Ulloq nuannersuulluni nalliuttorsiorfiusussaagaluarpoq. Angutaa Avannaata Qimussersuanut anngunniunnernut peqataasussaavoq. Anngunnissaa qularnanngilluinnarpoq.

Angusarissaarnissaa naatsorsuutigineqarpoq. Johannes 15-inik ukiulik Uummannami meeqqat atuarfianni atuartoq ataatani tapersersorniarlugu Ikerasammut tikippoq.

- Ullaaq taanna eqqaamavara. Marsip 16-iat. Ataatama qimmini piareersarlugillu anulersorpai. Unnuami qanoq sinnattorsimanersunga aperaanga, Johannes Sigurdsen oqaluttuarpoq.

Pisiniarfimmukarniarluni aqqusaarpaa, eqqumiitsumillu misigisaqarpoq. Soorlu arlaannik unitsinneqaraluarluni. Aallartikkusunngikkaluarlugulu qimakkusunngikkaluarpa, soorli taamaannerluni naluaa.

Johannesip ima oqarfigiinnarniarpaa: „Ingerlalluarina.“ Kisiannili soorlulusooq angumerisinnaanngikkaa. Taamanimi taamaaliornissaminut periarfissaqaqqinnaviarani naluaa. Angunni ullut sisamat qaangiuppata annaassallugu.

- Unammineq aallartingajalersoq qimussit tamarmik sikumi piareersimasut allunaasaq isiginnaartunut killiusoq takuara. Suli ornikkusuppara, kisianni allunaasaq akornatsinniippoq. Nikorfaannarpunga qimussinillu aallartoq isiginnaarlugu, taanna oqaluttuarpoq.

Qimussit sikukkut aallarmata Johannesip ataatani siulliit pingasut akornanniittoq takusinnaavaa. Tassanili anngunnissaa qularinngilaa.

- Qimusserli siulleq apuuttoq taannaanngilaq. Taava aappaat, pingajuat, sisamaat tallimaallu apuupput, suli apuunnani. Qulingiluassaat tikimmat ajortoqartoq paasivara. Qulissaat aqqanilissaallu aamma tikipput. Aatsaat aqqaneq-aappassaat tikimmat taannaasoq takusinnaavara. Pallungavoq, Johannes Sigurdsen oqaluttuarpoq.

Angunni pakatsilluni palluinnarsimasoq aallaqqaammut isumaqaraluarpoq. Ajortoqartorli paasileriataarpaat. Milikartuungaatsiarsimavoq. 41-nik ukioqarluni toquvoq.

- Misigisaq tamanna inuuninni allannguissutiginerpaavara, taanna oqaluttuarpoq.

Aasianni nipilersorneq

Ullut arriitsumik ingerlapput, qaammatillu tulleriiaarlutik.

- Ataatama toqunerata kingorna klassitsinni ilinniartitsisuma ikiortorujussuuaanga. Taamaalillungalu Aasianni ilinniarnertuunngorniartussanngorpunga, Johannes Sigurdsen oqarpoq.

Piffissaq tamanna artornartorujussuuvoq, atuarunnaaginnarnissanilu arlaleriarluni eqqarsaatigisarsimavaa. Ingerlaqqinnissaminulli suli piumassuseqarpoq.

- Inuunerli sunaaffa pitsanngussasoq. Ataatama toqunera periarfissanik allanik aamma ammaassivoq, taanna oqaluttuarpoq.

Johannes Sigurdsen Aasianni, illoqarfimmi nipilersortartorpassualimmi festivalertitsingaatsiartartutullu ilisimaneqarluartumi, nipilersortartunut akuliutilertorpoq. Tassani soqutiginninnera ulluinnarsiutinngoraluttuinnarpoq.

Johannes Sigurdsen 2011-mi ilinniarnertuunngorlunilu ukiumi ataatsimi atuanngiffeqarpoq.

- Taava ilinniartitsisunngorniarnialerpunga. 30-liitinnanga ilinniakkannik naammassinnissallunga aalajangernikuuvunga. Ilinniagaqassasunga ataatama oqarfigiuartarnikuuaanga. Tamanna aalajangiusimavara, taanna oqaluttuarpoq.

Tamanna inuunermini najoqqutaraa. Ilinniagaqarnissani ataatami toqunerata kingorna suli kissaatiginerulerpaa. Johannes ilinniartariaqarpoq. Naak qamuuna — angummisulli - aalisartoorusunnerugaluarluni.

- Kisianni 2016-imi ilinniartitsisunngorpunga. Ilinniarfissuarmi 2012-imiit 2016-imut ilinniartut akornanni angusarissaarnerpaavunga, taanna oqaluttuarpoq.

Ilinniartitsisunngorniarnermini 2014-imi ernertaarpoq. Nanoq.

- Ernerma arnaa aamma kræftimut annaanikuuara. Aatakkukka, ajaga angagalu aamma toqunikuupput. Inuppassuit toqumut annaanikuuakka, taanna oqaluttuarpoq.

Nipilersorneq katsorsaatitut

Nipilersortarnermigut eqqissisinnaallunilu nukissanik katersisarpoq. Aliasunnerminut inissaqartitsillunilu erloqissutigisaminik iliuuseqarfiginnissinnaanngortarpoq.

- Saqqummersitara siulleq, Ujartaraat Qaamaneq, mamisaatigipajaarpara. Aanama toqunerata kingorna allataraara. Aanaga iperarniassagakku allappara, taanna oqaluttuarpoq.

Johannes Sigurdsen nipilersornermi masterinngorluni 2024-mi naammassivoq. Nipilersorneq ullumikkut, nuannarigamiuk inuussutissarsiutigalugulu, ulluinnarni sammingaatsiartarpaa.

- Nipilersorneq ulluinnarni qitiuvoq. Sumi tamaaniippoq, soorlu meeqqerivinni, meeqqat atuarfiini sunngiffimmilu ornittakkani. Ullumikkut nipilersornermik ilinniarfimmi ilinniartitsisuuvunga, nipilersornerlu peqqinnartumik aallullugu misigisimavunga, taanna oqaluttuarpoq.

Suna tamarmi ingerlalluarsorinarpoq, taamaakkunnaarnissami tungaanut. Johannesip killissani nallerpaa unittoorlunilu. Naggataagut qaqeqqinniarluni ukiup affaa sulinngiffeqarpoq.

- Anguniagaqartuaannarlunga paasilerpara. Ilinniartitsisunngorpunga, futsalimi nunanut allanut unammisartunut ilannguppunga, nipilersortartut silarsuaanni nersorniarneqarlungalu nipilersukkanik saqqummersitsisarpunga. Soorlulusooq angut toqoreersoq tulluusimaartinniaannavikkiga, Johannes Sigurdsen oqarpoq.

Suli mianersortoq

Ullumikkut ajunnginnerullunilu nipilersornermut ilinniarfimmi ilinniartitsisutut sulileqqissimavoq. Inuunermili allatut ingerlaniarluni aalajangernissaq suli mianersuutigaa.

Ajunngilaq, aaqqissaqqaarpoq. Ilisimariikkani imaassinnaavoq ullut ilaanni iperarsinnaalerai. Imaassinnaavoq angummisut aalisartunngortoq. Immaqa arlaanni namminersortunngussaaq. Suli periarfissarpassuaqarpoq. 34-innarnimmi ukioqarpoq.

- Nuliara meeqqagullu sapaatip-akunnerata naanerani ullaakkut iffiugartoqatigiikkaangatta pilluarnerpaasarpunga. Liverpoolikkut unammisut isiginnaaraangakkit, nipilersoraangama timersoraangamalu pilluarnerpaasarpunga. Nerilluataaraangama skakkeraangamalu, taanna oqaluttuarpoq.

Siunissami peqqinnartumik atugarissaartumillu inuuneqalerumaarluni pingaarnertut neriuutigaa.

- Immaqa illutaarsimassaagut. Immaqa allamik suliffittaarsimassaanga. Immaqa politikkilerilersimassaanga. Anguniagartuujunissara takorloortarpara. Soorlu ataataga taamaannikuusoq, taanna oqaluttuarpoq.

Nipilersorneq Johannes Sigurdsenip suli aalluppaa. Aliasunnermit qimarratituunngitsoq, kisiannili aliasunnermini iluaqutigissallugu.

Angunni suli eqqaamavaa — nipaatsumi, nipilersornermi immaqalu imaani inuunermik allamik takorluugaqarnermini.