Deres Auto kalaallinit piginnittoqaannassasoq

Nuummi suliffeqarfik annertuumik pisariusumillu isumaqatigiissuteqaqqammerpoq, taamaalilluni pisortaaneq Michael Østergaard tuniniaanermilu pisortaaneq Palle Frederiksen marluullutik suliffeqarfik, 40-rut sinnerlugit sulisoqarlunilu ilinniartulik ukiumullu 300-rut missiliorlugit biilinik tunisaqartartoq, tamakkiisumik piginnittuuffigilerpaat.

– Taamatut suliaqarneq suliffeqarfissuit Kalaallit Nunaanniiginnarnissaannik assersuutissatsialaavoq, Michael Østergaard oqarpoq, taassumalu suliffeqarfik maanna siumut ingerlaqqissinnaanngormat oqiliallaatigeqalugulu nuannaarutigaa. Ukiunimi marlunni isumaqatiginninniarnerit ilungersunartut, kinguaarit nikinnerisa qanoq ingerlanneqarnissaannik akuersissuteqarneq aamma periusissiamik suliaqarneq naammassineqarput.

Taamaalilluni piginneqataasimasoq Per Laugesen suliffeqarfimmi piginneqataassutai pisiaralugit taarserneqarpoq, ukiunilu tulliuttuni tallimaniit 20-nut pilersaarusiortoqarpoq, tassungalu atatillugu Michael Østergaardip kingusinerinnerusukkut suliffeqarfimmit tunuarnissaa aamma sulisunit allanit ilaqutaasunillu taarserneqarnissaa ilanngunneqarluni. Taanna 2020-miilli piginneqataasuuvoq, kalaallillu ilinniartitaanissaat pingaartitaralugu, nukippassuit atorlugit suliffiit ataavartut pilersittarsimallugit.

Biilit innaallagiatortut plug-init hybridillu

Deres Auto 1978-imi pilersinneqarpoq, ullumikkullu biilinik suliaqarfiuinnarani aamma saffiorfimmik, tuniniaavimmik, attartortarfimmik asaasarfimmillu immikkoortoqarluni ingerlanneqarpoq. Suliffeqarfik ukiumut hunnorujut millionilikkaanik kaaviaartitaqartarpoq. 

- Ukiut kingulliit tallimat arfinillillu ingerlanerini kaaviartitat angusallu marloriaatinngortissimavagut. Tamanna ilaatigut pitsaasumik kiffartuussinermik piffissamillu eqquilluarluta iliuuseqartarnitsinnik peqquteqarpoq. Biilinik innaallagiatortunik plug-in-inillu tuniniaanermi siulliit ilagaatigut, aammattaaq inuit eqqortut atorfinitsittarpavut, mekanikerillu assartuisartullu qaffasissumik ilinniagaqarsimasut atorfinitsittarpavut. Sulisut ilinniarluarsimasut atorfinitsittarpavut – ilinniartunik atorfinitsitsisarnitsigut aamma sulisut plug-in-inik innaallagiatortunillu biilinik teknikkikkut siuarsimasunik ilinniartittarnerisigut.

- Tamatuma saniatigut biilinik attartortitseqatigiiffissuaqarnerput ukiuni kingullerni siuariartorfiuvoq. Ukiut tallimat matuma siorna biilinik attartortittakkatsinnik 15-inik peqarsimavugut. Ullumikkulli 100-ngajannik peqarpugut. Tamanna ingerlalluarsimanitsinnik takutitsivoq. Michael Østergaard ima oqarpoq: “Ullumikkut sisamanik patajaatsunik tunngavissaqarpugut: Biilinik tuniniaanermik, biilinik attartortitsinermik, ajoqusersimasut ikiorserneqartarnerannik mekanikerillu sullitaannik.”

Allaaserisaq Motoorimi saqqummersinneqarpoq. Motoori uani atuarneqarsinnaavoq