Neriuffiit Kattuffiat 5,8 millioner koruunit sinnerlugit katersuiniarpoq

Tallimanngornermi unnukkut Neriuffiit Kattuffiat Katuami Nuummi qitiusoqarfilerlugu katersuiniartoqarpoq.

Aningaasat katersuiniarnermi pissarsiarineqartut 5.818.630 koruuniupput, tamannalu tassaavoq nutaamik rekord-iliorneq. Agguaqatigiissillugu Kalaallit Nunaanni innuttaasut ataasiakkaarlutik tamarmik 102 koruuninik tunniussaqarsimanisa assigaa.

Inger Eriksen, Neriuffiit Kattuffianni siulittaasuusoq, assut attortisimaarpoq, ippassaq unnukkut unnuup ingerlanerani KNR-imit oqaloqatigineqarami.

- Nuannaarnerup pianik qullilerusuppunga, taanna oqarpoq nassuiaallunilu, katersuiniarnissap tungaanut tamaviaarlutik sulisimallutik.

Ilallugullugu oqaluttuarpoq aningaasat katersorneqartut januarimiit decembarip tungaanut atorneqartussaasut, maannalu tullinnguuttoq kattuffiup siulersuisuisa ataatsimiinnissaat aalajangernissaallu aningaasat siunertanut sunut atorneqassanersut.

Ilanngullugu oqaluttuarpoq, siunnersuisarfittaaq Nuummiittoq kattuffimmut assorujussuaq isumaqartoq.

- Ukioq manna illoqalernikuuvugut.Tamattaalluta katersuussinnaavugut illu taanna periarfissiimmat, aammalu aningaasanik katersuiniarnitsigut pilersitaammat. Ammarnerata kingorna, inuppassuit illuutitsinni isersimasorinikuuagut, illulu assut iluarisimaarneqarpoq.

- Assorujussuarlu pilluarnarpoq, tassani sulisinnaagatta, nalunnginnatsigumi aamma qanoq annertutigisumik atorfissaqartinneqarnersoq, aammalu tassanngaaniit ikiuussinnaagatta, Inger Eriksen oqarpoq tapersersuillutillu aningaasanik tapiisimasunut tamanut qujassuteqarluni.

Neriuffiit Kattuffiata illutaava, Kalaallit Nunaanni nappaassuarmik kræftimik eqqugaasimasunut siunnersuisarfittut atorneqarpoq ukiorlu manna oktobarimi atoqqaarfissiortinneqarluni.

Illumi tassani inuit kræftimik eqqugaasimasut akeqanngitsumik siunnersorneqarsinnaapput, paasissutissanik tunineqarsinnaapput allanillu assingusumik inissisimasunik naapitsisinnaallutik.

Anguniagaavoq, ikiuisinnaaneq Kalaallit Nunaat tamakkerlugu ingerlanneqalissasoq, ilaatigut qarasaasiat attaveqaatillu iluaqutigalugit ikiorneqarnissamik neqerooruteqalissasoq.