Iran mianersoqqusivoq USA-p saassuteqqippani sakkortuumik akissalluni

Iran-ip siuttuisa qullersaat, Mojtaba Khamenei, USA-mut mianersoqqusivoq nuna saassuteqqilissappagu akisiumaarlutik.

Taanna taamak oqarpoq nutaarsiassaqartitsivimmut AFP-mut.

Tamatuma ilutigisaanik Reuters naapertorlugu, sioorasaarineq sunaluunniit "ingerlaannartumik, sakkortuumik aammalu nunarsuup suatungaanut killiligaanngitsumik " akisinissamut piareersimasoqarpoq.

- Akeqqat sakkutuulerlutik imaluunniit peqqarniisaarniarlutik aallarteqqissappata, sakkutuutta sakkullit aalajangissavaat qaqugu akiniaasoqassanersoq aammalu akiniaaneq qanoq unitsinneqassanersoq pillugu piumasaqaatit suussanersut, oqaatigineqarpoq.

Taamatuttaaq sakkutuut atorlugit akiniaanissamut amerikamiut israelimiullu naliliutaat ”saassutissallugit inornanngitsut” suut saassunneqassanersut pillugit Khamenei peqqusinikuuvoq nutartikkamik allattorsimaffimmik suliaqartoqassasoq.

Taamatuttaaq saassussisoqarnissaanut eqqanaarsarluni imassat sakkussallu sanaartorneqarnerat annertusineqassasut peqqussutaavoq.

Iran-ip siuttuisa qullersaata taamak ilisimatitsinermini itisilinngilaa, sioorasaarneqarneq tunngavigalugu taamatut sillimmartaartoqarsoq.

Taamaattorli USA-p præsidentia, Donald Trump, siusinnerusukkut oqalunnikuuvoq, nutaamik saassussineq periaannaasoq.

Taamatut ilisimatitsinermini oqaatigaa, USA-p naalakkersuisui "ilimanarsinnaasoq nutaamik annikinnerusumik Epic Fury-tut ittumik saassussisoqarsinnaasoq".

"Epic Fury" tassaavoq amerikamiut sakkutuulersorluni saassussinerminnut atatillugu taaguutitigititaat, taamani februarip 28-iani USA-p aamma Israel-ip Iran saassullugu aallartimmassuk.

USA aamma Iran septembarip aallartilaarneraniilli nunatigoorlutik imminnut saassuteqqinnikuunngillat, taamaattorli umiarsuit imaatigullu angallassissutit Hormuzstræde-kkoortut akuttunngitsumik qaartartumeerlugit eqqorneqartarput.

Eqqissisaasussatut isumaqatigiinniartitat Qatar-imeersut sapaatiummat Teheran-imi saqqummiuppaat isumaqatigiissutissatut missiliut, taannalu siunertaqarpoq USA-mut Israel-imullu sorsunneq unitsinneqassasoq.

Siusinnersukkut eqqissisaasussatut isumaqatigiinniartitat misiliinerat junip 17-iani inerneqarpoq allagaammik paaseqatigiinnermik imalimmik.

Taamaakkaluartoq taamanili eqqisseqatigiinnissaq aammalu taanna allagaat siunertamisut sunniuteqanngitsoornikuupput.

Paarlattuanimmi suli Kangiani Qiterlermi sumi tamani eqqissiviilliorneq ingerlaannarpoq, tamatumalu malitsigisaanik nunarsuaq tamakkerlugu imaatigut angallanneq aammalu uuliamik pilersorneqarneq akornusersorneqartuarsinnarput. Sapaatip akunnerini kingullerni saassussisartoqatigiit houthibevægelsen-ikkut Yemen-imeersut arlaleriarlutik Saudi-Arabien saassuttarpaat.

RITZAU